2 Corinto 6
6
1Nadid, bilang kaguman tu gawain nu Diyos, ay mákkekakagbi kame nikam a dyan moy sayangán u inyatád nikam nu Diyos a pagpapala. 2Dipo kinagi nu Diyos:
“Sinaneg takam tu tama a panahun,
Sakay tinulungan taka tu aldew nu págligtas.”
Mágsaneg kam! Nadid dán u tama a panahun! Nadid dán u aldew nu págligtas!#6:2 Basaán tu Isaias 49:8.
3Iniwasan me a makagimet ti makasaket tu agum, tánni awan hide ti makagi tu págserbi me tu Diyos. 4Nan impeta me tu atanan a gimitán me a tagapagserbi kame nu Diyos: tu pamamag-itan nu págtiis tu atanan kalase nu kahirapan, kalungkutan, sakay kagipitan.#6:4 Basaán tu 2 Corinto 4:8-11, 2 Corinto 11:23-27. 5Binálbág di kame, impireso, sakay ginulo kame nu katolayan. Nadanas me a magtrabaho ti husto, awan mátdug ti magdamag sakay awan kuman ti sangan a aldew.#6:5 Basaán tu Gimet 16:2. 6Pinatunayan me a tagapagserbi kame nu Diyos tu pamamag-itan nu malinis a kákkabiyag, karunungan, págtiyaga, kabaitan, tu pamamag-itan nu pángdipalongo nu Banal a Ispirito sakay tapat a págmahal. 7Tapat me a impangaral u Maganda a Baheta tungkul tu kapangyariyan nu Diyos. U matuwid a kákkabiyag u armas me a panglaban sakay pangsangga.#6:7 Basaán tu 2 Corinto 10:4, Roma 13:12, Efeso 6:11-12. 8Bilang tagapagserbi nu Diyos, nadanas me a ahakán sakay imetmet, puriyán sakay sestiyan. Neturing kame a mabule, maski ni tatahoden u kagiyán me. 9Inturing kame nu agum a awan di kame kilala, maski tanyag kame lagi a dilikadu u biyag me pero biyag kame palla hanggan nadid. Maski ni pinahirapan di kame, ay awan kame padi natay.#6:9 Basaán tu Roma 8:36. 10Maski maglungkut kame, ay tehhod kame padi a kasayaan; maski ni mahirap, pero mapayaman be u agum; lubu-lubus, pero u tatahoden kao me u atanan a bagay.#6:10 Basaán tu Roma 8:32, 1 Corinto 3:21.
11Tapatan kame a nagupos nikam taga-Corinto hide. Ni ánya u katoy tu puso me ay siya u ingkagi me nikam.#6:11 Basaán tu Ezekiel 33:22, Isaias 60:5. 12Awan kame nagkulang tu págmahal me nikam, pero hikam u nagkulang tu págmahal moy nikame. 13Mákpagguhunák nikam a konna tu essa ama, mahalán moy kame a konna tu págmahal me nikam.
U Pákpággagum tu Awan Mánnampalataya
14Dyan kam mákkaessa tu awan hide mánnampalataya. Dipo awan maare a magkaessa u malinis sakay u madukás, oni demlag sakay u diklám. 15Ni kodya a awan magkasundu ti Cristo sakay ti Satanas konna bi hod u mánnampalataya tu awan mánnampalataya. 16U Diyos u hed nikitam kaya hikitamon u Templo nu Diyos a biyag dipo hina madukás nite ugnayan u Templo nu Diyos tu diyos-diyosan. Siya dán u nagkagi:
“Mágyanák sakay mákkabiyagák nide,
Hikán u magin Diyos de,
sakay hide ay magin kao ko.#6:16 Basaán tu 1 Corinto 10:21, 1 Corinto 3:16, Exodo 25:29, Exodo 29:45, Levitico 26:12, Ezekiel 37:27, Jeremias 31:1.
17Kaya umadeyo kam tu tolay hide a awan sumássunud nikán,
Humiwalay kam nide,”
kagi nu Panginoon.
“Dyan kam kumahap tu
ánya man a neturing a madangát,
tánni tanggapán takam.#6:17 Basaán tu Isaias 52:11.
18Hikán u magin ama moy,
sakay hikam be u magin anak ko hide.
Kagi nu Panginoon a Makapangyariyan.”#6:18 Basaán tu 2 Samuel 7:14, 1 Cronica 17:13, Isaias 43:6, Jeremias 31:9.
Currently Selected:
2 Corinto 6: MBJC
Highlight
Share
Compare
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
