2 Corinto 5

1Nadid, tukoy tam a masida u bággi tam a luta a kumán a bilay a páppágyanan tam mentaras a katoy kitam palla ti munduwáy. Pero tukoy tambe a te inhanda u Diyos a para nikitam a bággi a panglanget. Iye ay awan mata-matay magpakahanggan dipo iye ay ginimet nu Diyos, bakán a ginimet nu tolay.#5:1 Basaán tu 2 Samuel 7:27, Juan 14:1-2. 2Mágdadaingán kitam dipo gustu tamon a mapalitan u bággi tam ti bággi a panglanget. 3Ni mabihisan kitamon ti iye a bigu a bággi, ay awan kitamon kedemáttan a uba. 4Mentaras a hed palla nikitam u date tam a bággi, ay makán daingán kitam dipo tu kahirapan tam. Bakán a dipo gusto tamon a matay, nan dipo gusto tamon a mesulot u bigu a bággi, tánni u bággi a matay ay mapalitan ti bággi a awan mata-matay. 5U Diyos be u nánghanda nikitam tánni tanggapán tam u bigu a bággi. U patunay ay inyatád na nikitam u Banal na a Ispirito.#5:5 Basaán tu Ezekiel 36:27, 2 Corinto 1:22.

6Kaya pirme a mabegsák u pággisipan me maski ni tukoy me a mentras biyag kitam palla, ay awan kitam palla makasáddáp tu bilay a inhanda nu Panginoon. 7Dipo mabiyag kitam ayun tu pánnampalataya tam tu Diyos, bakán a tu bagay hide a ketan. 8Kaya awan kame panghinaan ti isip maski u gusto me ay iwahak dán i bággiyan iye tánni makaguman mi dán u Panginoon.#5:8 Basaán tu Awit 116:15, 1 Cor. 15:18-22. 9Kaya ngani, u pinakagugusto me ay makasaya kame tu Diyos, he man ti munduwáy oni ti langet. 10Dipo atanan tam ay umatubang ni Cristo, sakay hatulan na u ginimet tam hide maganda man oni madukás, mentaras biyag kitam palla he ti munduáy. Tanggapán nu balang essa u karapat-dapat a hatul ayun tu ginimet na.#5:10 Basaán tu Job 34:11, Ro. 14:12.

Nákpagkasundo tu Diyos tu Pamamag-itan ni Cristo

11Kaya ngani, dipo te ánteng kame tu Diyos, ay gimitán me u atanan para maakit me u tolay hide a sumole nikuna. Tukoy nu Diyos u tunay me a pagkatolay, nakwa ay tukoy moy kami be. 12Kinagi me iye nikam a huway, bakán a para ipagmadakál nikam i sadile miyáy, nan para atádden kam ti rason a mepagmadakál moy kame, tanni matábbeg moy u tolay hide a mangpuri la tu bagay hide a pangluwas bakán a u maganda a ugale.#5:12 Basaán tu 2 Cor. 3:1. 13Ni kumán kame man a nasidaan ti isip, alang-alang iye tu Diyos, sakay ni matino kami man ay para iye tu kapiyyaan moy. 14U págmahal ni Cristo nikitam, ay ina u mangatád tu kasipag me a sumunud tu kaluuban na. Maniwala kame a natay siya para tu atanan a tolay. Kaya nadid, u atanan a tolay ay mebilang a natay.#5:14 Basaán tu Juan 11:5, Roma 8:35-37. 15Natay siya para tu kapiyaan nu atanan a tolay, tánni u atanan a biyag, ay awan dán mabiyag para tu sadile de, nan para ni Cristo, a natay sakay nabiyag a huway para nide.

16Kaya nadid, u pangileng mi dán tu atanan ay awan dán neayun tu sukatan nu tolay hide a awan mangkilala tu Diyos. Tu itod ay konna hod u pákkatukoy me ni Cristo, pero nadid ay awan dán. 17Kaya ni deya man u nákpagkaessa ni Cristo ay essa dán a bigu a nilalang. Awan dán u date na a pagkatolay; siya ay binagu dán.#5:17 Basaán tu Roma 16:7, Galacia 6:15. 18Iye a atanan ay gábwat tu Diyos, a nángsole nikitam nikuna tu pamamag-itan ni Cristo. Sakay inyatád na nikame u tungkulin a mangpasole tu tolay hide nikuna.#5:18 Basaán tu 1 Corinto 11:12, Colosas 1:20, Roma 5:10. 19Gusto ni iye a kagiyán, a tu pamamag-itan ni Cristo, ay pinagsole nu Diyos u tolay hide nikuna, imbilang na hide a amigu na, sakay nilimon na dán u kasalanan de hide. Impagkatiwala na nikame u págbahagi ti iye a baheta.

20Kaya hikame ay inutusan ni Cristo; a u Diyos a mismo u mákpágguhon nikam tu pamamag-itan me. Mákpágguhon kame nikam alang-alang ni Cristo; a magsole kamon tu Diyos.#5:20 Basaán tu Efeso 6:20. 21Maski nikan ay awan nagkasala ti Cristo, pero dipo nikitam, ay nebilang siya a makasalanan tánni meturing kitam nu Diyos a matuwid tu atubang na tu pamamag-itan nu pákpágkaessa tam ni Cristo.#5:21 Basaán tu Hebreo 4:15, Hebreo 7:25, 1 Pedro 2:22, 1 Juan 3:5, Gimet 3:14.

Currently Selected:

2 Corinto 5: MBJC

Highlight

Compare

Copy