1 Tesalonica 1
1
1Hikán ti Pablo sakay kaguman ku he di Silas#1:1 Sakay ti Silvanus a mabasa tu libro nu Gawa ay eessa la. ay ti Timoteo a summulat nikam a mánnampalataya hide a taga-Tesalonica, sakay sakup nu Diyos a Ama sakay nu Panginoon a ti Jesu-Cristo.
Magkahod kam nakwa ti págpapala sakay kapayapaan a gábwat tu Diyos.
U Kákkabiyag sakay Pánnampalataya nu Taga-Tesalonica hide
2Pirme kame a magpasalamat tu Diyos dipo nikam a atanan sakay pirmi mikam a ipagdasal,#1:2 Basaán tu 2 Tesalonica 1:3; 2:13; Roma 1:9. 3dipo kada magdasal kame tu Diyos a Ama tam ay maisip me u maganda moy a gimet a bunga nu pánnampalataya moy ni Jesu-Cristo. Sakay u pághirap moy dipo tu págmahal sakay tu págtággád moy dipo umasa kam a sumole u Panginoon tam a ti Jesu-Cristo.#1:3 Basaán tu 2 Tesalonica 1:11; 1:3; Roma 8:25; 15:4; Galacia 1:4. 4Kákkapatkákka mi hide, tukoy me a mahal kam nu Diyos sakay pinili nakam a ipisan tu tolay hide a sakup na #1:4 Basaán tu 2 Tesalonica 2:13; Roma 1:7; 2 Pedro 1:10. 5Impakapos-pos me nikam u Maganda a Baheta a awan kame nagduwwa-duwwa, sakay bakán la a tu pággupos nan tu kapangyariyan nu Diyos sakay tu tulung nu Banal a Ispirito. Sakay netan moy ni kodya kame a nabiyag nikuna nákpágyan kami hina. Ginimet mi ina para tu kapiyaan moy.#1:5Basaán tu 2 Tesalonica 2:14; Roma 15:19. 6U kakkabiyag me sakay u Panginoon tam a ti Jesu-Cristo u inaheg moy. Sakay nikuna a tanggapan moy u Maganda a Baheta ay nagdanas kam ti makpal a kahirapan, pero maski konna paman hod ay katoy padi nikam u kasayaan a inpagkaluub nu Banal a Ispirito.#1:6 Basaán tu Colosas 2:2 1 Tesalonica 2:10; 1 Corinto 4:16; 11:1; Gimet 17:5-10; 13:52. 7Kanya nagin halimbawa kam tu kákkapatkákka tam ti Macedonia sakay ti Acaya.#1:7 Basaán tu Roma 15:26; Gimet 18:12. 8Dipo tu maganda a halimbawa moy ay kimmalat u upos nu Panginoon ti Macedonia sakay ti Acaya. Maske u pánnampalataya moy tu Diyos ay nebaheta be tu atanan a lugar. Kanya ngani awan dán kailangan a magupos kame tungkul nikam.#1:8 Basaán tu 2 Tesalonica 3:1; Roma 1:8. 9Dipo hide dán a mismo u nágbaheta tu maganda moy a pángtanggap nikame. Sakay hide dán be u nágbaheta ni kodya moy a inadággen u pagsamba tu diyos-diyosan hide tánni sumunud tu tatahoden sakay biyag a Diyos. 10Kinagi di pa a áuhayán moy dán u kássole ni Jesus a Anak nu Diyos a gábwat ti langet a biniyag nu Diyos a huway. Ti Jesu-Cristo u mángligtas nikitam tu pádemát a iyamut nu Diyos.
Currently Selected:
1 Tesalonica 1: MBJC
Highlight
Share
Compare
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
