١ بُطْرُس 2
2
الحَجَر الحَي و الشَّعب المُختار
1عَشان كِدا، أرمو مِنَّكُم كُلّو #2:1 شَماتَه: لَمّا يَكون مَبسوط مِن تَعب زول مَكروه.شَماتَه و كُلّو غِش و النِّفاق و الحَسَد و كُلّو شَتيمَه. 2زي أطفال إتوَلَدو هَسَّع، دورو اللَّبَن الرّوحي الما فيهو غِش، عَشان تَكبَرو بيهو لِلخَلاص، 3ما دام ضُقتو أن الرَّب طَيب.
4قَرِّبو ليهو، لِلحَجَر الحَي، المَرفوض مِن النّاس، و لَكِن المُختار مِن الله و مُحتِرَم ليهو. 5و إنتو كَمان مِثِل حُجار حَيَّه، تِنبَنو بيت روحي و قُسُس مُقَدَّسين، عَشان تَقَدِّمو ضَبايح روحيَّه مَقبولَه عِند الله بِيَسُوع المَسيح. 6عَشان كِدا يَزكُر في الكِتاب:
”شوفو، أنا بَخُت في صِهيون حَجَر الرُّكُن مُختار و مُحتِرَم.
و البِآمِنو بيهو ما بِخجَل.“
7ليكُم البِتآمِنو، هو المُحتِرَم. لَكِن لِلما بِآمِنو:
”الحَجَر الرَّفَضوهو البَنّايين،
هو بِقى راس الرُّكُن.“
8و:
”حَجَر عَترَه و #2:8 صَخرَة: حَجَرَه كَبيرَه.صَخرَة وقوع.“
يَقَعو عَلَشانُم ما بِطيعُو الكِلمَه، و كِدا كانو مُعَينين لِدا.
9و لَكِن إنتو جِنس مُختار، و قُسُس مُلوكي، و أُمَّه مُقَدَّسَه، و شَعب مَخصوص لِلَّه، عَشان تَخَبِّرو بِحَمد النّاداكُم مِن الضَّلام لِنورو العَجيب. 10إنتو الما كُنتو مِن قَبِل شَعب، لَكِن هَسَّع إنتو شَعب الله. و ما كُنتو قِبِلتو الرَّحمَه، و لَكِن هَسَّع قِبِلتو الرَّحمَه.
11يا مَحبوبين، أطلُب ليكُم زي غَريبين و مِسافِرِين تَرفُضو الشَّهوات الجِّسميَّه البِتحارِب النَّفس. 12عيشو حَياة طَيبَه بين الأُمَم، عَشان إذا يَشكوكُم زي عامِلين الشَّر، يَشوفو أعمالكُم الطَّيبَه، و يَمَجِّدو الله في يوم زيارتو.
طيعو السَّلاطين
13طيعو كُلّو تَرتيب النّاس عَشان خاطِر الرَّب، إذا لِلمَلِك زي العِندو السُّلطَه العاليَه، 14ولّا لِلحُكّام، المُرَسَّلين مِنّو لِلإنتِقام مِن عامِلين الشَّر، و عَشان حَمد لِعامِلين الخير. 15عَشان إرادَة الله هي أن تَسَكِّتو #2:15 جَهَل: الحال بِدون مَعرِفَه.جَهَل النّاس الغُشّام بِأعمالكُم الطَّيبَه. 16عيشو زي ناس حُرّين، لَكِن ما تِستَعمِلو حُريّاتكُم زي غَطا لِلشَّر. لَكِن عيشو زي خَدّامين الله. 17إحتَرِمو كُل النّاس. حِبّو الأخوان. خافو الله. إحتَرِمو المَلِك.
18يا خَدّامين، طيعو أسيادكُم بِكُلّو إحتِرام، ما لِلكوَيسين و اللُّطَفاء بَس، لَكِن لِلظالِمين كَمان. 19عَشان دا مَقبول إذا واحِد يِتحَمَّل الضّيق و يِتوَجَّع بِظُلم فِشان الضَّمير عَشان يَطيع الله. 20لَكِن كيف بِكون حَمد ليكُم إذا يَضرُبوكُم و إنتو عامِلين الشَّر، و تَصبُرو؟ و لَكِن إذا تِتوَجَّعو و إنتو عامِلين الخير، و تَصبُرو، دا مَقبول قِدّام الله. 21الله ناداكُم لِدا، عَشان المَسيح كَمان إتوَجَّع عَشان خاطِركُم، و خَلّى ليكُم مَثَل، عَشان تَتبَعو دَربو. 22و هو ما عَمَل خَطيَّه، و ما كان مَوجود في خَشمو غِش. 23لَمّا شَتَموهو، هو ما رَدَّ الشَّتيمَه، و لَمّا إتوَجَّع، ما هَدَّد، لَكِن إتَّكَل عَلى البِحكُم بِالعَدِل. 24هو نَفسو حَمَل خَطايانا في جِسمو عَلى الصَّليب، عَشان نِحنا نَموت عَن الخَطيَّه و نَعيش لِلبِر. و بِجُروحو، هو شَفاكُم. 25عَشانكُم كُنتو زي خِرفان ضايِع، لَكِن رَجَعتو هَسَّع لِراعي نُفوسكُم و مُلاحِظكُم.
Currently Selected:
١ بُطْرُس 2: APD2024
Highlight
Copy
Compare
Share
Want to have your highlights saved across all your devices? Sign up or sign in
© 1978 SIM, adapted in 2024 by Pioneer Bible Translators
