Sealm 50
50
Sealm 49
Dauid sang þysne nigen and feowertigoðan sealm be ægrum tocyme Cristes; on þam sealme he cydde hu egeslice Crist þreatode Iudeas, and ealle heora gelican þe þæt ylce doð þæt hy dydon: for þam hy sealdon ælmesan and ofredon Gode heora nytenu, næs hy sylfe.
1Dryhtna Drihten wæs sprecende
þæt he wolde cuman to eorðan (swa he eft dyde)
and cliopode eorðlice men to geleafan.
Fram sunnan upgange oð hire setlgang,
2of Sion aras se wlite his andwlitan.
3And eft cymð se ylca God swiðe openlice,
þæt ys, ure God,
and he þonne naht ne swugað.
Fyr byrnð for his ansyne,
and ymb hine utan strange stormas.
4And he cleopað to þæm heofone;
hæt hine þæt he hine fealde swa swa boc;
and he bebyt þære eorðan þæt heo todæle hyre folc,
5and gegadrie on þa swyðran hand his halgan,
þa þe heoldon his bebodu ofer ælcere offrunga.
6Heofonas bodiað his rihtwisnesse,
for þam se God is demend and þonne cwyð to him:
7“Gehyrað nu, min folc.
Ic sprece to eow Israelum,
and ic eow secge soðlice,
for þam ic eom Drihten eower God.
8Ne þreage ic eow na æfter offrunga,
for ðam eowra offrunga synt symle
beforan minre ansyne.
9Ne onfo ic na of eowrum huse cealfas,
ne of eowrum heordum buccan,
10for þam min synt ealra wuda wildeor,
and ealra duna ceap and nytenu, and oxan.
11Ic can ealle heofones fugelas,
and eall eorþan wlite is mid me.
12Gif me hingreð ne seofige ic þæt na to eow,
for ðam min is eall earðan ymbhwyrft
and eall hyre innuncg.
13Wene ge þæt ic ete þæra fearra flæsc,
oþþe þara buccena blod drince?
14Ac ofriað Gode þa offrunge lofes
and gyldað þam hyhstan eower gehat,
15and cleopiað to me on þam dagum eowra earfoða.
Þonne gefriðie ic eow, and ge weorðiað me.”
16Ac to þam synfullan cwyð God:
“For hwy bodast þu mine rihtwisnesse,
oððe for hwy onfehst þu
on þinne fulan muð mine æ,
17for þæm þu hatodest symle leornunga
and forwurpe min word symle underbæc fram þe?
18Gif þu gesawe þeof, þu urne mid him,
næs na ongean hine;
and þu dydest þe to þam wohhæmendum.
19Þin muð wæs symle ful unrihtes,
and þin tunge ontynde facn.
20Þu sæte ongean þinne broðor and tældest hine,
and worhtest wrohte betwuh þe
and þinre modor suna oðrum.
21Eall þis yfel þu dydest,
and ic swugode and þolode swylce ic hit nyste.
Þu ræswedest swiðe unryhte þæt ic wære þin gelica,
swylce ic ne meahte þe forgyldan swylces edlean.
Ic þe þreage nu, and stæle beforan þe,
and þe cyðe eal þas yflu.”
22Gehyrað nu ðiss and ongytað ealle þa þe Godes forgytað,
þy læs he eow gegripe,
for þam nys nan oþer þe eow mæge gefriðian
of his handa:
23“Seo ofrung lofes me licað swiðost
and me eac swyðost weorþað,
and on þære offrunga is se rihtwisa weg;
on þære ic getæce Godes hælo
eallum þam þe swa doð.”
Currently Selected:
Sealm 50: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
