Sealm 48
48
Sealm 47
Dauid sang þysne seofon and feowertigoþan sealm, mycliende þone wundorlican sige Godes, þe he þa - and oftor ær - dyde: hu hrædlice he oferswiðde swa ofermode kyningas; and eac he lærde ælcne man þe geswære wære and ofercumen and eft gefriðod, þæt he swa ylce Gode þancode and his anweald herede; and þæt ylce he witgode be Criste, þæt he þæt ylce sceolde cweðan to his Fæder æfter ðære æriste.
1Mycel ys se Drihten ure God,
and swyþe to herianne on þære byrig ures Drihtnes
and on his þam halgan munte.
2He tobrædde blisse ofer ealle ure eorþan.
Sio mycle burh þæs myclan kyninges is aset
on þa norðhealfe þæs muntes Syon.
3Se God ys cuð on þære byrig,
for þam he hire symle fultumað.
4Eala, hwæt! Ge sawon hu egeslice
gegaderode wæron eorðkyningas,
and hu hi togædere comon.
5And sona swa hi gesawon Godes wundru,
hy wæron wundriende and wæran gedrefde,
and wæran styriende and onwende,
6for þam ege and fyrhto þe hi gegripon,
for þam him com swa hrædlic sar
and wracu swa þam cennendan wife cymð færlic sar;
7and hy wæron gebrytte swa hrædlice
swa swa hradu yst windes scip tobrycð on þam sandum,
neah þære byrig þe Tarsit hatte
(seo is on þam lande þe Cilicia hatte).
8Swa swa we geogeare hyrdon
þæt God dyde be urum fæderum,
swa we geseoð nu þæt he deð be us
on þæs Godes byrig þe myclu wundru wyrcð
þæt ys, on ures Godes byrig þe he gestaþelode on ecnesse.
9We onfoð, Drihten, þinre mildheortnesse
on middum þinum temple.
10Swa swa þin nama is tobræd
and gemyclad geond ealle eorðan,
swa ys eac þin lof;
þin swiðre hand is full rihtwisnesse.
11Blissie nu Syon se munt, and fægnie Iudea cyn,
for þinum domum, Drihten.
12Hweorfað ymb Sion
and gað ofer þone weall Hierusalem and ymbutan;
heriað God mid ælces cynnes heringe and lufiað hine;
and secgað his wundru on þam torrum
and on þam wighusum þære byrig;
13and fæstniað eower mod on his wundrum,
and dælað hire weorðias swiðe rihte;
and secgað swylc wundru eowrum gingrum,
þæt hy hy mægen eft secgan of cynne on cynn,
14for þam he is ure God on ecnesse
and on weorulda woruld;
and he ræt us and recð on weorulda weorld.
Currently Selected:
Sealm 48: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
