Sealm 46
46
Sealm 45
Dauid sang þysne fif and feowertigoþan sealm, þanciende Gode þæt he hine oft alysde of manegum earfoðum; and eac he witgode þæt þæt ylce sceoldon don þa men, þa þe Twa Scira hatte (þæt ys, Iude and Beniamin), þæt hy sceoldon þam Gode þancian þe hy gefriðode fram þære ymbsetennesse and fram þære heregunge þara twega kynincga, Facces, Rumeles suna, and Rasses, Syria cyncges - næs þæt na gedon for þæs cynincges geearnuncga Achats, ac for Godes mildheortnesse and for his yldrena gewyrhtum hit gewearð þæt þa twegen kyningas wæron adrifene fram Assyria cynge; and eac þæt ylce he witgode be ælcum rihtwisum menn þe ærest geswenced byð and eft gearod; and eac be Criste and be Iudeum he witgode þæt ylce.
1Dryhten ys ure gebeorh and ure mægen
and ure fultumend on earfoðum
þa us swiðe swiðlice oft on becomon.
2For þam we us ne ondrædað,
þeah eall eorðe sy gedrefedu,
and þeah þa muntas syn aworpene on midde þa sæ.
3Ure fynd coman swa egeslice to us
þæt us ðuhte for þam geþune
þæt sio eorþe eall cwacode;
and hy wæron, þeah, sona afærde fram Gode
swyþor þonne we, and þa upahafenan kynincgas
swa þær muntas wæron eac gedrefde
for þæs Godes strenge.
4Þa wæs geblissod seo Godes burh on Hierusalem
for þam cyme þæs scures þe hy geclæsnode;
se hyhsta gehalgode his templ inon þære byrig.
5For þam ne wyrð seo burh næfre onwend,
þa hwile þe God byð unonwendedlic on hire midle.
God hyre gehealp swyþe ær on morgen.
6And gedrefed wæron þa elðeodgan folc,
and hiora rice wæs gehnæged;
se hyhsta sende his word and gehwyrfed wæs ure land and ure folc to beteran,
and hi and heora land to wyrsan.
7Drihten, mægena God, ys mid us,
and ure andfengend is Iacobes God.
8Cumað and gesioð Godes weorc
and his wundru þe he wyrcð ofer eorðan.
9He afierð fram us ælc gefeoht
ut ofer ure landgemæru,
and forbrycð ura feonda bogan,
and eall heora wæpn gebryt,
and heora scyldas forbærnð.
(Þa andswarode God þæs witgan mode and cwæð eft þurh þone witgan:)
10“Geæmetgiað eow nu, and gesioð
þæt ic eom ana God
and me nu upahebbe ofer ða elðeodegan folc,
and eac on þysum folce ic beo nu upahæfen.”
11Dryhten, mægena God, ys mid us,
and ure andfengend ys Iacobes God.
Currently Selected:
Sealm 46: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
