Sealm 39
39
Sealm 38
Dauid sang þysne eahta and þrittigoþan sealm seofigende to Drihtne mid hu manegum unrotnessum he wæs ofðrycced under Sawle; on þæm sealme he lærde and tælde ealle men þe worulde welan gaderiað mid unrihte, and nytan hwam hi hine læfað; and eac he witgode þæt ælc þæra þæt ylce don sceolde, þe þysne sealm æfter him sunge; and eac he witgode be Criste, þæt he wolde seofian swa ylce his nearonesse þe he hæfde under Iudeum. And eac on æfteweardum þæm sealme he wilnode ealra swiðost þæt him God sealde sume frofre and sume rothwile on þysan andweardum life ær his ende.
1-5 [Missing from manuscript]
6 [Line 1 missing]
ælces libbendes mannes mægen and anwald is idelnes;
and swa þeah ælc man hæfð Godes anlicnesse on him,
þeah hit idel sy þæt hy mid gedrefde synt.
Þæt ys, þæt hy gaderiað feoh,
and nyton hwam hy hyt gadriað.
7Hwæt ys þonne min tohopa, hwæs anbidie ic butan þin, Drihten,
for þam mid þe is eall min æht.
8Ac of eallum minum unrihtwisnessum gefriða me.
Þu me sealdest to bysmrianne þam unrihtwisan.
9Þa geswugode ic and ne ondyde na minne muð,
for þæm ic ongeat þæt þu hit geðafodest.
10Ac awend nu fram me þine witnunga,
for þam ic eom nu geteorod for þæm.
For þære strenge þinra handa and þinre þreaunga
ic geteorode on þære þrowunga.
11Ælcne man þu þreast for his agenre scylde
and gedest þæt he aswint on his mode
and wyrð swa tedre swa swa gangewifran nett,
for þam byð ælc man gedrefed and abysgod
on idlum sorgum and on ymbhogum.
12Drihten, gehyr min gebed and mine healsunga;
onfoh mid þinum earum minne wop and mine tearas;
ne swuga wið me, ac andswara me mid þine fultume,
for þam ic eom nifara hider on eorþan beforan ðe
and ælðeodig swa swa ealle mine fæderas wæran.
13Forlæt me nu, Drihten, to sumre rothwile on þisse weorulde,
ær ic hire swa of gewite þæt ic eft an ne sy.
Currently Selected:
Sealm 39: ASPsa
Highlight
Share
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
