Roma 14
14
Indlela yokuphatha ababuthakathaka ekukholweni
1Lowo obuthakathaka ekukholweni mamukeleni, kodwa kungabi ngokuphikisana laye.#Kol 2:16 2Omunye ukholwa ukuthi angadla konke, kodwa obuthakathaka udla imibhida yodwa. 3Lowo odlayo kangamdeleli ongadliyo; ongadliyo kangamsoli odlayo; ngoba uNkulunkulu umamukele. 4Ungubani wena osola inceku yomunye na? Ngoba ukuma ingabe ukuwa kwayo kuyindaba yeNkosi yayo; izakuma isibili, ngoba iNkosi ilamandla okuyimisa. 5Omunye wazisa olunye usuku kulolunye, omunye wazisa insuku zonke. Kakube yilowo lalowo aqiniseke engqondweni yakhe. 6Ohlonipha usuku, uluhlonipha ngenxa yeNkosi; odlayo, udla ngenxa yeNkosi, ngoba ubonga uNkulunkulu; ongadliyo, wenza njalo ebonga uNkulunkulu laye. 7Ngoba kakho phakathi kwethu ozisilela yena, kakho lozifela yena; 8ngoba uba siphila, siphilela iNkosi; uba sisifa, sifela iNkosi. Ngakhoke loba siphila loba sisifa, singabeNkosi. 9Ngenxa yalokhu uKristu wafa, wabuya waphila, ukuba abe yiNkosi yabafileyo labaphilayo.
10Wenake, umsolelani umzalwane wakho na? Futhi umdelelelani umzalwane wakho na? Ngoba sonke sizakuma phambi kwesihlalo sokuthonisisa sikaNkulunkulu.#2 Kor 5:10 11Ngoba kulotshiwe ukuthi:
Lokhu ngiphila, itsho iNkosi, wonke amadolo azaguqa phambi kwami,
lendimi zonke zizakudumisa uNkulunkulu.#Isa 45:23
12Ngakhoke ilowo lalowo wethu uzakuziphendulela kuNkulunkulu.
13Ngakho kasingabe sisasolana; kodwa asizimisele ukuba singambekeli umzalwane isikhubekiso loba ulutho lokumwisa. 14Ngiyazi ngeqiniso eNkosini uJesu ukuthi kakulalutho olungcolileyo ngokwalo; kodwa kulowo othi lungcolile, kuye lungcolile. 15Uba umzalwane wakho elinyazwa yikudla kwakho, kawusahambi ngothando. Ungambhubhisi ngokudla kwakho lowo amfelayo uKristu. 16Ngakho okuhle kini kakungahlanjazwa. 17Ngoba umbuso kaNkulunkulu kawusikho ukudla lokunatha, kodwa uyikulunga lokuthula lokuthokoza eMoyeni oNgcwele. 18Okhonza uKristu kulokhu uyamukeleka kuNkulunkulu, uthandekile ebantwini. 19Ngakho asidingisise izinto eziletha ukuthula lokwakhisana. 20Ungawuchithi umsebenzi kaNkulunkulu ngenxa yokudla. Konke kuhlambulukile, kanti kubi kulowomuntu okhubekisa abanye ngokudla kwakhe. 21Kuyinto elungileyo ukungadli inyama lokunganathi iwayini loba ukungenzi lutho olukhubekisa umzalwane wakho. 22Ukukholwa olakho kakwaziwe nguwe loNkulunkulu. Ubusisiwe lowomuntu ongathandabuzi ngalokho akukhethayo! 23Kodwa othandabuzayo, uba esidla, ulahliwe, ngoba engadli ngokukholwa; konke okungaveli ekukholweni kuyisono.
Currently Selected:
Roma 14: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
