Eks 38
38
Ukwenziwa kwealtare lomnikelo wokutshiswa
1Wenza ialtare lomnikelo ngesihlahla somvagazi, ubude balo babuzingalo ezinhlanu lobubanzi balo babuzingalo ezinhlanu, lilingana inxa zonke, ukudepha kwalo kwakuzingalo ezintathu.#Eks 27:1–8 2Walenzela impondo engonsini zalo zozine, ukuba lona lempondo zalo kube yintonye; walibhada ngethusi. 3Wenza zonke izinto zealtare, izimbiza lamafotsholo lemiganu yokuchela lamafolokwe lezitsha zokuthwala umlilo, wazenza zonke ngetliusi. 4Walenzela ialtare isihlengo sethusi esenziwe njengembule, wasifaka ngaphansi komphetho, sehla saze safinyelela phakathi kwalo. 5Walikhandela amasongo amane engonsini zozine zesihlengo sethusi ukuba abe zindawo zemijabo. 6Wayenza imijabo ngesihlahla somvagazi, wayibhada ngethusi. 7Wayifaka imijabo emasongweni asenhlangothini zealtare ukuba lithwalwe ngayo; walenza ngamapulanka, lafana lomkolo. 8Wenza umkolo ngethusi, lenyawo zawo ngethusi; wakwenza ngezibuko zabesifazana abakhonza ngasemnyango wethente lokuhlangana.#Eks 30:18
Ukwenziwa kweguma leTabernakeli
9Wenza leguma; ohlangothini olungaseningizimu kwakukhona amakhetheni elembu elihle lentambo ephothiweyo, ubude bawo babuzingalo ezilikhulu;#Eks 27:9–19 10insika zawo ezingamatshumi amabili lenyawo zawo ezingamatshumi amabili zazingezethusi, ingwegwe zenzika lezibopho zazo zazingezesiliva. 11Kwakukhona ohlangothini olungasenyakatho amakhetheni, ubude bawo babuzingalo ezilikhulu, insika zawo ezingamatshumi amabili zazingezethusi, ingwegwe zensika lezibopho zazo zazingezesiliva. 12Ohlangothini olungasentshonalanga kwakukhona amakhetheni, ubude bawo babuzingalo ezingamatshumi amahlanu, kanye lensika ezilitshumi lenyawo ezilitshumi; ingwegwe zensika lezibopho zazo zazingezesiliva. 13Ohlangothini olungasempumalanga ubude bawo babuzingalo ezingamatshumi amahlanu. 14Kwelinye icele lomnyango kwakukhona amakhetheni, ubude bawo babuzingalo ezilitshumi lanhlanu, kanye lensika ezintathu lenyawo ezintathu; 15kwakunjalo lakwelinye icele; kwakukhona ngapha langapha komnyango weguma amakhetheni, ubude bawo babuzingalo ezilitshumi lanhlanu, kanye lensika ezintathu lenyawo ezintathu. 16Wonke amakhetheni eguma ayengawelembu elihle lentambo ephothiweyo. 17Inyawo zensika zazingezethusi, ingwegwe lezibopho zazo zingezesiliva, zonke insika zeguma zazilesibopho sesiliva. 18Iveli lomnyango weguma lalenziwe ngumthungi ngelembu eliluhlaza leliyibubende lelibomvu lelembu elihle lentambo ephothiweyo; ubude balo babuzingalo ezingamatshumi amabili, ukuphakama kwalo kwaba zingalo ezinhlanu ukuba lilingane lamakhetheni eguma. 19Insika zawo ezine lenyawo zawo ezine zazingezethusi, ingwegwe zawo zazingezesiliva, inhloko zawo lezibopho zazibhadwe ngesiliva. 20Zonke izikhonkwane zeTabernakeli lezeguma inxa zonke zazingezethusi.
Imali eyachithwayo ngawo wonke umsebenzi
21Lokhu kuyimali yezinto zeTabernakeli, iTabernakeli lobufakazi; njengokubalwa kwayo ngokulayeza kukaMose ngomsebenzi wamaLevi, bephathwa ngulIthamari indodana kaAroni umpristi. 22UBezaleli indodana kaUri indodana kaHuri owesizwe sakoJuda wakwenza konke njengalokho iNkosi ebimlayile uMose; 23wayeloOholiyaba indodana kaAhisamaki owesizwe sakoDani, umbhali wamatshe, lengcitshi, lomthungi welembu elihle lentambo ephothiweyo eluhlaza leyibubende lebomvu.
24Igolide lomnikelo elasetshenziswa emsebenzini wonke wendlu engcwele lalingamathalenta angamatshumi amabili lesificamunwemunye lamashekeli angamakhulu ayisikhombisa lamatshumi amathathu ngokweshekeli lendlu engcwele. 25Isiliva sabantu ababebalwa sasingamathalenta alikhulu lamashekeli ayinkulungwane lamakhulu ayisikhombisa lamatshumi ayisikhombisa lanhlanu ngokweshekeli lendlu engcwele;#Eks 30:11–16 26omunye lomunye owayebalwa oleminyaka engamatshumi amabili langaphezulu, wanikela ingxenye yeshekeli lendlu engcwele; babezinkulungwane ezingamakhulu eziyisithupha lantathu, lamakhulu amahlanu lamatshumi amahlanu.#Mat 17:24 27Amathalenta alikhulu esiliva ayengowokukhanda inyawo zendlu engcwele lenyawo zeveli, kwasetshenziswa amathalenta alikhulu ngenyawo ezilikhulu, ithalenta linye ngonyawo lunye. 28Amashekeli ayinkulungwane lamakhulu ayisikhombisa lamatshumi ayisikhombisa lanhlanu ayesetshenziswa ukwenza ingwegwe zensika, lokubhada inhloko zazo lokwenza izibopho zazo. 29Ithusi lomnikelo lalingamathalenta angamatshumi ayisikhombisa lamashekeli ezinkulungwane ezimbili lamakhulu amane. 30Wenza ngalo inyawo zomnyango wethente lokuhlangana, lealtare lethusi, lesihlengo salo sethusi, lezinto zonke zealtare, 31lenyawo zeguma inxa zonke, lenyawo zomnyango weguma, lazo zonke izikhonkwane zeTabernakeli, lezikhonkwane zonke zeguma inxa zonke.
Currently Selected:
Eks 38: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
