Eks 37
37
Ukwenziwa komtshokotsho wesivumelwano
1UBezaleli wawenza umtshokotsho ngesihlahla somvagazi, ubude bawo babuzingalo ezimbili lengxenywe, lobubanzi bawo babuyingalo lengxenye, lokudepha kwawo kwakuyingalo lengxenye. #Eks 25:10–40 2Wawubhada ngegolide elihle ngaphakathi langaphandle, wawenzela umqolo wegolide inxa zonke. 3Wawukhandela futhi amasongo amane egolide enyaweni zawo zozine, amasongo amabili kolunye uhlangothi lamasongo amabili kolunye uhlangothi. 4Wenza imijabo ngesihlahla somvagazi, wayibhada ngegolide. 5Wayifaka imijabo emasongweni asenhlangothini zomtshokotsho ukuba uthwalwe ngayo. 6Wenza isihlalo somusa ngegolide elihle, ubude baso babuzingalo ezimbili lengxenye, lobubanzi baso babuyingalo lengxenye. 7Wenza amakherubi amabili ngegolide elikhandiweyo ezihlokweni zombili zesihlalo somusa, 8elinye ikherubi kwesinye isihloko lelinye ikherubi kwesinye; wawenza amakherubi aba yintonye lesihlalo somusa ezihlokweni zombili. 9Amakherubi elula amaphiko awo ngaphezulu, ambomboza isihlalo somusa, akhangelana; ubuso bawo babukhangelene lesihlalo somusa.
Ukwenziwa kwetafula
10Wenza itafula ngesihlahla somvagazi, ubude bayo babuzingalo ezimbili lobubanzi bayo babuyingalo, ukuphakama kwayo kwakuyingalo lengxenye. 11Wayibhada ngegolide elihle, wayenzela umqolo wegolide inxa zonke. 12Wayenzela inxa zonke ibhanti elilingana lobubanzi besandla somuntu, wenza kulo umqolo wegolide. 13Wayikhandela amasongo amane egolide, wawafaka amasongo enyaweni zozine ezisemagumbini womane. 14Amasongo ayengasebhantini ukuba abe zindawo zemijabo yokuthwala itafula. 15Wenza imijabo yokuthwala itafula ngesihlahla somvagazi, wayibhada ngegolide. 16Wazenza izitsha zetafula yegolide elihle, imiganu yayo lenkezo zayo zempepha lenditshi zayo lezitsha zayo zokuthela.
Ukwenziwa koluthi lwesibane
17Wenza uluthi lwesibane ngegolide elihle; ngegolide elikhandiweyo walwenza kanye lesidindi salo lomzimba walo; imbizana zalo leziduku zalo lamaluba alo kwaba yintonye kanye lalo. 18Kwakukhona ingatsha eziyisithupha ziphuma emzimbeni walo, ingatsha ezintathu ziphuma kolunye uhlangothi lengatsha ezintathu ziphuma kolunye. 19Ilolo lalologatsha lwaba lezimbizana ezintathu ezenziwe zafana lamaluba esihlahla sealimondi, kanye lesiduku leluba; kwakunjalo kuzo zonke ingatsha eziyisithupha eziphuma oluthini lwesibane. 20Kwakukhona oluthini lwesibane imbizana ezine ezenziwe zafana lamaluba esihlahla sealimondi, ileyo laleyo yayilesiduku leluba; 21kwakukhona isiduku ngaphansi kwengatsha ezimbili esihlangene kanye lazo, kwaphindwa ngaphansi kwengatsha ezinye ezimbili langaphansi kwezinye ezimbili, kwaba njalo kuzo zonke ingatsha eziyisithupha eziphuma oluthini lwesibane. 22Iziduku lezingatsha zaziyintonye kanye lalo, umsebenzi munye okhandiweyo lowegolide elihle. 23Walwenzela izibane eziyisikhombisa, lezindlawu, lemiganu yalo ngegolide elihle. 24Walwenza kanye lezitsha zalo zonke ngethalenta legolide elihle.
Ukwenziwa kwealtare lempepha
25Wenza ialtare lempepha ngesihlahla somvagazi, ubude balo babuyingalo lobubanzi balo babuyingalo, lilingene inxa zonke; ukudepha kwalo kwakuzingalo ezimbili; lona lempondo zalo kwaba yintonye.#Eks 30:1–5 26Walibhada ngegolide elihle, ngaphezulu lezinhlangothi zalo lempondo zalo; walenzela inxa zonke umqolo wegolide. 27Ngaphansi komqolo walo, enhlangothini ezimbili ezikhangeleneyo, walenzela amasongo amabili egolide, ukuba abe yindawo yemijabo yokulithwala. 28Wayenza imijabo ngesihlahla somvagazi, wayibhada ngegolide. 29Wenza amagcobo angcwele okugcoba, lempepha enhle yamakha amahle enziwe ngobungcitshi bomenzi wamakha.#Eks 30:22–38
Currently Selected:
Eks 37: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
