Dute 4
4
UMose ulaya abakoIsrayeli ukuba bagcine imilayo
1Khathesike, lina bakoIsrayeli, zwanini izimiso lezahlulelo engilifundisa zona, lizenze ukuze liphile, lingene lilithumbe ilizwe elinika lona iNkosi uNkulunkulu wabokhokho benu. 2Kaliyikwengezelela lutho elizwini engililaya ngalo, lingaphunguli lutho kulo, ukuba ligcine imilayo yeNkosi uNkulunkulu wenu engililaya yona.#Isam 22:18, 19 3Lakubona okwenziwa yiNkosi eBali‐Peyori; ngoba iNkosi uNkulunkulu wenu yabhubhisa phakathi kwenu bonke abantu abalandela uBali wasePeyori;#Nani 25:1–9 4kodwa lina elabambelela eNkosini uNkulunkulu wenu lisekhona lonke lalamuhla. 5Khangelani, ngilifundisile izimiso lezahlulelo, njengokungilaya kwayo iNkosi uNkulunkulu wami, ukuba lizenze elizweni elizakungena kulo ukulithumba. 6Zigcineni, lizenze; ngoba ngokwenza njalo lizatshengisa ukuhlakanipha lolwazi ebantwini abazakuthi besizwa lezizimiso zonke bathi: Impela isizwe lesi esikhulu ngesabantu abahlakaniphileyo labaziyo. 7Ngoba yisiphi isizwe esikhulu esilonkulunkulu oseduze laso njengeNkosi uNkulunkulu wethu iseduze lathi nxa sikhuleka kuyo na? 8Futhi yisiphi isizwe esikhulu esilezimiso lezahlulelo ezilungileyo ezinjengawo wonke lumlayo engiwubeka phambi kwenu lamhla na?
Ukukhunjulwa kwalokho okwenzakalayo eHorebe
9Ngakhoke qaphelani, ligcine kuhle umphefumulo wenu, funa likhohlwe izinto elizibonayo, zingasuki emikhumbulweni yenu insuku zenu zonke. Libazise zona abantwana benu labazukulu benu, 10ukuthi mhla wosuku elema ngalo phambi kweNkosi uNkulunkulu wenu eHorebe, iNkosi yathi kimi: Ngibuthanisela abantu ukuba ngibazise amazwi ami, ukuze bafunde ukungesaba zonke insuku zokuhamba kwabo emhlabeni, bafundise njalo labantwana babo. 11Laselisondela, lema ngaphansi kwentaba eyayivutha umlilo waze wafika phezulu, ilomnyama omkhulu lamayezi amnyama.#Eks 19:16–18; Heb 12:18, 19 12INkosi yakhuluma kini iphakathi komlilo; lawezwa lamazwi akhulunywayo, kodwa kalibonanga simo somuntu; kwakukhona ilizwi kuphela. 13Yamemezelela kini isivumelwano sayo, eyalilaya ukuba lisigcine, imithetho elitshumi eyayiloba ematsheni amabili.#Eks 31:18 14INkosi yangilaya ngalesosikhathi ukuba ngilifundise izimiso lezahlulelo, ukuze lizenze elizweni elizakungena kulo ukulithumba.#Eks 21:1
AbakoIsrayeli baxwayiswa ukuba bangoni
15Ngakhoke qaphelani. Njengoba lingabonanga isimo somuntu mhla wosuku iNkosi ikhuluma lani eHorebe iphakathi komlilo, 16xwayani funa lone, lizenzele isithombe esibaziweyo sowesilisa loba sowesifazana,#Eks 20:4; Levi 26:1; Dute 5:8; 27:15 17loba senyamazana esemhlabeni, loba senyoni ephaphayo,#Roma 1:23 18loba sokuhuquzelayo emhlabeni, lenhlanzi esemanzini angaphansi komhlaba. 19Futhi lapho liphakamisela amehlo enu phezulu, libone ilanga lenyanga lezinkanyezi, konke okusezulwini, xwayani, funa liyengwe, likudumise likukhonze. INkosi uNkulunkulu wenu lokhu ikunike bonke abantu abangaphansi komthunzi welanga ukuba bakukhonze. 20Kodwa lina iNkosi yalithatha, yalikhupha esithandweni sensimbi, eGibithe, ukuba libe ngabantu bayo njengalamuhla.#Eks 19:5; Dute 7:6; 14:2; 26:18; Tit 2:14; 1 Pet 2:9 21Futhi iNkosi yangithukuthelela ngenxa yenu, yafunga ukuthi kangiyikuchapha iJordani, lokuthi kangiyikungena elizweni elihle elinika lona iNkosi uNkulunkulu wenu ukuba libe ngelenu.#Nani 20:12 22Kodwa mina ngimele ukufela kulelilizwe, ngingachaphi iJordani; kodwa lina lizakulichapha, lilithumbe lelolizwe elihle. 23Qaphelisani funa likhohlwe isivumelwano seNkosi uNkulunkulu wenu eyasenza lani, lenze isithombe esibaziweyo salokho iNkosi uNkulunkulu wenu elinqabele khona. 24Ngoba iNkosi uNkulunkulu wenu ingumlilo oqothulayo loNkulunkulu olomona.#Heb 12:29
25Lapho lizuza abantwana labazukulu, lalapho selihlale elizweni isikhathi eside, uba lisona, lenze isithombe esibaziweyo solutho oluthile, lenze okubi emehlweni eNkosi uNkulunkulu wenu ukuze limthukuthelise, 26ngibiza izulu lomhlaba lamhla ukuba kufakaze ngani ukuthi lizabhubha masinyane elizweni elichapha iJordani ukuya kilo ukuba libe ngelenu; kaliyikuhlala kilo isikhathi eside, kodwa lizabhujiswa isibili. 27INkosi izalichithachitha phakathi kwabantu, lisale liyingcosana nje phakathi kwezizwe iNkosi ezakulixotshela kuzo.#Dute 28:36 28Lapho lizakukhonza onkulunkulu abenziwe ngezandla zabantu ngezihlahla langamatshe, abangaboniyo, abangezwayo, abangadliyo labanganukiyo. 29Kodwa uba lilapho liyifune iNkosi uNkulunkulu wenu, lizayifumana uba liyidinga ngenhliziyo yenu yonke langomphefumulo wenu wonke.#Jer 29:13 30Lapho lisekuhluphekeni lisehlelwa yilezizinto zonke, ensukwini ezizayo lizakuphendukela eNkosini uNkulunkulu wenu, lilalele ilizwi layo; 31ngoba iNkosi uNkulunkulu wenu inguNkulunkulu olomusa, kayiyikulitshiya, kayiyikulibhubhisa, kayiyikukhohlwa isivumelwano eyasifunga kubokhokho benu.
32Ake libuze ngensuku ezidlulileyo ezazingaphambi kwenu, kusukela osukwini uNkulunkulu adala ngalo umuntu emhlabeni, libuze kusukela komunye umkhawulo wezulu kuze kube komunye, ukuthi kwake kwenzakala loba kwezwakala yini into engangale. 33Abantu bake balizwa yini ilizwi likaNkulunkulu likhuluma phakathi komlilo, njengalokhu lilizwile lina, baphila na? 34Futhi omunye unkulunkulu wake wazama yini ukuzithathela isizwe phakathi kwesinye isizwe ngezinhlupheko, langezibonakaliso, langezimangaliso, langempi, langesandla esilamandla, langengalo elamandla, langezinto ezesabekayo, njengakho konke iNkosi uNkulunkulu wenu eyalenzela khona eGibithe phambi kwamehlo enu na? 35Lina lakutshengiswa lokho ukuba lazi ukuthi iNkosi inguNkulunkulu, kakho omunye onjengayo.#Mark 12:32 36Isezulwini yalivumela ukuzwa ilizwi layo, ukuba ilifundise; emhlabeni yalivumela ukubona umlilo wayo omkhulu, lezwa amazwi ayo evela emlilweni. 37Njengoba ibathandile okhokho benu, yakhetha inzalo yabo emva kwabo, yalikhupha yona ngokwayo eGibithe ngamandla ayo amakhulu, 38yaxotsha phambi kwenu izizwe ezinkulu ezilamandla kulani ukuze ilingenise elizweni lazo, ilinike lona libe ngelenu njengalamhla. 39Ngakhoke yazini lamuhla, likugcine enhliziyweni zenu ukuthi iNkosi inguNkulunkulu phezulu ezulwini laphansi emhlabeni; kakho omunye. 40Ngakhoke lizagcina izimiso zayo lemilayo yayo engililaya yona lamhla, ukuba kulilungele lina labantwana benu emva kwenu, lokuba liphile isikhathi eside elizweni iNkosi uNkulunkulu wenu elinika lona kuze kube nini lanini.
Ukukhethwa kwemizi emithathu yokuphephela
41UMose wasekhetha imizi emithathu ngasempumalanga ngaphetsheya kweJordani,#Josh 20:8, 9 42ukuba ibe zindawo zokubalekela umbulali ongabulalanga umakhelwana wakhe ngabomu, obekade engamzondi, ukuze ekubalckeleni kwakhe komunye waleyomizi asile: 43imizi yile, iBezeri elisenkangala emagcekeni, libe ngumuzi wabakoRubeni; iRamothi eGileyadi, libe ngowabakoGadi; iGolani eBashani, libe ngowabakoManase.
44Yiwo lo umlayo uMose awubeka phambi kwabantu bakoIsrayeli; 45yilobu ubufakazi, yizo lezi izimiso lezahlulelo uMose azimemezela ebantwini bakoIsrayeli ekuphumeni kwabo eGibithe, 46ngaphetsheya kweJordani, esigodini maqondana leBeti‐Peyori, elizweni likaSihoni inkosi yamaAmori, owayehlala eHeshiboni, owanqotshwa nguMose labantu bakoIsrayeli ekuphumeni kwabo eGibithe. 47Balithumba ilizwe lakhe lelizwe likaOgi inkosi yaseBashani, amakhosi amabili amaAmori ayehlala ngasempumalanga ngaphetsheya kweJordani, 48kusukela eAroweri eliseduze kwesihotsha saseArinoni kuze kufike entabeni yaseSiriyoni, iHermoni, 49kanye lalo lonke iAraba ngaphetsheya kweJordani ngasempumalanga, kuze kube solwandle lwaseAraba, ngaphansi kwamawa ePisiga.
Currently Selected:
Dute 4: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
