Ïïjjïn 49
49
Yaagüüp Merkä Yeeke Ŋüülkede
1Aŋ Yaagüüp merkä yeeke bärkene ti, aŋ kiinne ogo, “Wüüke ti ika ti, aŋ ikee nüütke a ŋaaka ken bi näŋï ḍoŋe ikee ti nïïnkä yaaka äätïdï ye ti.
2Ääte ti aŋ tiiŋe, ikee merkälen yeeki,
tiiŋe wääc Yaagüüp ti.
3Robïïn, ïkï agä kaygon yeeni, aŋ teynä yeeni
ke ïkï agä minneni ïïjïnï woo yen dürkïtïnï,
aŋ ïkï agä kültü yen eemdin ke kültü yen teynä.
4Ïkï beelä bata piik tääl wiñe yaaka ïïjïdï ti ye,
aŋ ïkï batta bi küülüküül ŋuca,
nääŋka attii kä bür yen wääc ti
aŋ ḍäälleeda kä yok ye.
5Camoon ke Laawï a mädin
gaaḍalli yeeken a yek ïïrrä teynä.
6Dale ŋana ika kaaccädä ti nänṭa ḍülte yoken ye,
aŋ dale ŋana yori coorcudu ti jiik yeeken yaaka ḍiikä ye ti.
Kä piinkä yeeken iken nääkin me,
aŋ iken yätkä naŋe a ŋolku kä ñääy.
7Tuummu wäätï piinkä yeeken ti kä yaana yejgene yejok ye,
aŋ piinkä yeeken yejgaŋ kä yaac,
aŋ iken bi piirjä woo kaaynä yeeki gïtï,
aŋ iken bi gääjä gïtï mä Icärayiil ti.
8 Yahüüja, mädgic ïkï bi maaŋgi.
Ïṇtü bi wäätï ädäŋŋi yüükü ḍuuggen ti.
Aŋ merkä yek wääc muure bi ḍüŋjïdï ïñï ñomü ti.
9Yahüüja a geel ṭuule yaana ḍaŋŋä kä ammä waak'a näge ye.
Aŋ yore meecce woo aŋ baati m'ana ike cükü yok ye.
10Yätkïtïn batta bi kaacï woo paa ba' Yahüüja,
aŋ kilkä yeeke kamat ken bi mügït
aŋ ṭoŋ ike bi äckätä iñdinni
aŋ ike bi tiiŋkätä.
11Aŋ tüürüŋle yeene bi weene kä jaan beel bata lüütkon meen,
erele yeene bi weene kä jaan beel bata lüütkon meen yaana ŋeraŋ ye,
aŋ buruŋgu yeeke bi pure kä määk,#49.11 pure kä määk. Purru kä määk yaanna, a yaana jengä yaakka ṭulgen ḍiirene kä yaac baanne ye.
jïbbani yeeke bi pure kä piik yek jaan yaana beel bata lüütkon ye ṭulge.
12Aŋ waŋge bi tïdaŋ kä maaṇṇä määk kä yaac,
aŋ leke bi bowaŋ kä maaṇṇä aak.
13Aŋ Jabuloon bi cääy ṭiŋal koon mooye jï,
aŋ ike bi wäätï a nänṭ'a yuutcete ïñï kuudgu mäyken ye,
aŋ tügge bi ḍakcïdï Cïdoon.
14Yacakïïr a tüürüŋ teyconḍe
yaana nïïn waadgä baliṇṇi ye.
15Aŋ naana nänṭä yïïktäŋ yoorre ŋeraŋ,
aŋ ŋommañ ŋeraŋ ye,
i büyke gääŋe ïñï ḍürdee kä waak pekkä
aŋ ike bi engä me ñuugal bata kiingon.
16Ḍaan bi mä yeeke müge
aŋ iken bi belok bata kurku mä Icärayiil aŋan.
17Aŋ Ḍaan bi beel bata kaaŋ yaana cääy päy mooye taaŋ ye,
aŋ a pääññä yaana cääy päy taaŋ ye,
a yaana kääjä bagal ŋubduŋgene ti ye,
aŋ taapdo ḍïmjï ṭarkic.”
18Aŋ Yaagüüp jaajjin ogo,
“Ika kiijä maŋŋä yüünü, ay Pïṭo.
19Gaat bi irkätä mäddoŋŋi,
aŋ bi ñoole aŋ baadde.
20Acïïr ŋommañ yeene bi giit waak äämkä ñapken.
Aŋ ike bi ḍüccïdï waak äämkä yek yätkä.
21Naptaalï a pääy yaana kälit kä tettä
yaana giit päykälen ŋerken ye.
22Yuucip a jaan yaana giit kä yaac ye,
a jaan yaana giit kä ceere yen piik ye,
kimke muulu kaal wic.
23Aŋ ädäŋŋi yeeke ike irki kä yaacken,
aŋ ike ḍiŋi kä cäwgä aŋ ike baaydi kä yaac.
24Aŋ kaay yeene agee kä yïïcon,
aŋ bugge bïtäraŋ
kä teynä Jooŋ yen Yaagüüp yaana Lïïṭït ye,
aŋ kä kaaydo yaana daŋit, a yen mä Icärayiil ye,
25a Jooŋ yen wääc ken ïkï yüükkedey ti,
aŋ a Jooŋ yaana Lïïṭït ye,
ken ïkï ŋüülkedey kä ŋüülkïnni yek ñaal yaaka ñaalok polloŋ jï ye,
ke ŋüülkïnni yek piik yaaka lürgaŋ ïñï ŋommañ jï ye,
ke ŋüülkïnni yek tingä ke kun.
26Ŋüülkïnni yek wääc yäwaŋ käälcïdï woo ŋüülkïnni yek pämkä dänken
ke waak ŋerkä yek tüümoni yaaka ke cüle ye ti.
Aŋ dale ŋüülkïnni yaakka muure wäätï a Yuucip wiñe ti,
yaana a woydo waadgä mädgen ye.
27Aŋ Benyamïïn a bäw yaajgonḍe yaana meken jiije gïtï ye,
kä tïṇṇäŋänä aŋŋi ämï yäŋgä yaaka näge ye,
aŋ biigin ti aŋŋi waak'a näge ye pääge gïtï.”
28Yaakki muure a kurku kä caay witken kä yew yek Icärayiil, aŋ a waak'a kiinene daa wäyen ye ikki, wääna ŋüülkedeeda kä ye, yaŋkalaŋ daa ŋüülkene kä ŋüülkïn yaana päjjïdï ke ike ye.
Tüwnü Yaagüüp
29Aŋ iken iingene kiinne ogo, “Ika bi yori cooṭu ti dänkä yurgo ti kä bïraŋ. Aŋ ika jïga ke wäygo ṭuum yaana yiil yen Aproon ti män Haat ti ye. 30A ṭuum yaana yiil Makapeela jï cokulaŋ ti Mamar ŋommañ mä Kanaan ti ye, yaana kiyi Abrayiim Aproon män Haat ti, ogo wääto ogo yen jïïgïn ye. 31Aŋ a nänṭä yaana jïkkene me Abrayiim ke iiŋe Caarra ye ke nänṭä yaana jïkkene me Icaak ke iiŋe Rïpga ye. Aŋ Leya jïŋŋä wïca. 32Aŋ yiil ke ṭuum yaana jïñe ti yaanna kiygä me mä Haat ti.”
33Wääna Yaagüüp ḍaŋŋee kä iingin merkä yeeke ye, kïïge nuulene ñaalok bür wic, aŋ ike wääkcin woo wääktäŋ tüwnü aŋ tüwnü, aŋ cooṭi me ti dänkä yurge ti.
Currently Selected:
Ïïjjïn 49: JBT
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
