لاویأن ۳
۳
سلأمتی قوربأنی
1 «هر وخت اینفر بٚخأیه خوداوندٚ رِه سلأمتی قوربأنی پیشکش بوکونه، تأنه اَ کأرٚ وأسی ایتأ ورزأ یا لِیشه جَا ایستفأده بوکونه» وأستی او حیوأن کی خوداوندٚ رِه پیشکش بِه سأق و سألیم و هیذره عأیب و ایرأد نأشتی بی. 2 او آدم کی او حیوأنَ پیشکش کونه، وأستی خو دٚسَ بٚنه حیوأنٚ سٚر و مولأقأتٚ خیمه برأسومٚ ورجأ اونَ سرأ بینه. هارونٚ پٚسرأن اونٚ خونَ مذبح چأرتأ ور بٚپأشأنٚد. 3 کأهین وأستی ایتأ سأم جٚه اَ سلأمتی قوربأنییَ ایتأ مخصوصٚ پیشکش مأنستَن خوداوندٚ رِه پیشکش بوکونه. اَ پیشکشی اَشأن ایسٚه، شکمٚ دورونی پی، 4 دوتأ قلوه و اوشأنٚ رو پی آبتکٚ میأن و جگرٚ رو سیفیدی نٚهأ. اَشأن وأستی قلوهیأنٚ اَمرأ بأیٚد بیرون، 5 و هارونٚ پٚسرأن وأستی اوشأنَ مذبح سٚر، سوجأنِئنی قوربأنی سٚر بوسوجأند. اَ پیشکشی، خوداوندٚ رِه ایتأ خوشبو و مخصوصٚ پیشکش ایسٚه.
6 «سلأمتی قوربأنی وأسی شأ نر یا مأده گوسوٚند و بوز کی سأق و سألیم و هیذره عأیب نأشتی بییٚم خوداوندٚ رِه پیشکش کودن. 7 اگه قوربأنی، گوسوٚند بٚبه، او آدم کی اونَ خوداوند رِه پیشکش کونه وأستی اونَ بأوٚره خوداوندٚ حوضور، 8 خو دٚسَ بٚنه حیوأنٚ سٚر و مولأقأتٚ خیمه برأسومٚ ورجأ اونٚ سٚرأبینه. بأزون هارونٚ پٚسرأن اونٚ خونَ بٚپأشأنٚه مذبح چأرتأ ور. 9 کأهین وأستی اَ سلأمتی قوربأنی پییَ ایتأ مخصوصٚ پیشکشٚ مأنستَن خوداوند رِه پیشکش بوکونه. اَ پییَ اونٚ دونبه شین کی مأزو ورجأ سیوأ بوبوسته و تومأمٚ ترنه پییَ، 10 دوتأ قلوه و اوشأنٚ رو پی آبتکٚ میأن و جگرٚ رو سیفیدی نٚهأ. اَشأن وأستی قلوهیأنٚ اَمرأ سیوأ بٚبد. 11 و کأهین اوشأنَ ایتأ مخصوصٚ خوردنی پیشکشٚ مأنستَن خوداوندٚ رِه پیشکش بوکونه، مذبح آتشٚ سٚر بوسوجأنه.
12 «اگه قوربأنی، بوز بٚبه، او آدم کی اونَ خوداوند رِه پیشکش کونه، وأستی اونَ بأوٚره خوداوندٚ حوضور، 13 خو دٚسَ بٚنه حیوأنٚ سٚر و مولأقأتٚ خیمه برأسومٚ ورجأ سرأ بینه. بأزون هارونٚ پٚسرأن اونٚ خونَ بٚپأشأنِه مذبح چأرتأ ور 14 کأهین وأستی ایتأ سأم جٚه اَ قوربأنییَ ایتأ مخصوصٚ پیشکشٚ مأنستَن خوداوند رِه پیشکش بوکونه. اَ پیشکشی اَشأن ایسٚه، شکمٚ دورونی پی، 15 دوتأ قلوه و اوشأنٚ رو پی آبتکٚ میأن و جگرٚ رو سیفیدی نٚهأ. اَشأن وأستی قلوهیأن اَمرأ سیوأ بٚبد. 16 بأزون کأهین تومأمٚ اوشأنَ ایتأ خوردنی مأنستَن مذبح سٚر بوسوجأنه. اَ پیشکشی، خوداوندٚ رِه ایتأ خوشبو و مخصوصٚ پیشکش ایسٚه. تومأمٚ او حیوأنٚ پی خوداوندٚ شین ایسٚه. 17 هیتأ جٚه شومأن نوأستی خون یا پی بوخورید. اَن شِمِره و شیمی نتأجٚ رِه ایتأ همیشٚکی قأنون ایسٚه، هرتأ جأجیگأ کی بِئیسید.»
Currently Selected:
لاویأن ۳: GCB
Highlight
Copy
Compare
Share
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org