لاویأن ۲
۲
آردی پیشکش
1 «هر وخت اینفر خوداوند رِه آردی پیشکشی بأوٚره، اونٚ پیشکش وأستی جٚه خورومٚ آرد بٚبه. اون وأستی روغن زیتون اونٚ سٚر فوکونه و اونٚ سٚر کندُر بٚنه. 2 بأزون ایتأ موشته اونٚ جَا کی تومأمٚ پیشکشی مأنستَن ایسهیَ فأدٚه ایتأ کأهینأنَ کی اونَ بوسوجأنه. اَ پیشکشی، خوداوندٚ رِه ایتأ خوشبو و مخصوصٚ پیشکش بِه. 3 البأقی آردی پیشکشَ فأدٚد هارون و اونٚ پٚسرأنَ کی خوردنی رِه اونٚ جَا ایستفأده بوکونٚد. او سأم کی کأهینأنَ فأدٚه بِه خٚیلی موقدس ایسٚه، چونکی او مخصوصٚ پیشکشٚ جَا اوسأده بوبوسته کی خوداوندٚ رِه پیشکش بٚده.
4 «هر وخت اینفر او نأنَ خوداوندٚ رِه پیشکش بأوٚره کی تنورٚ میأن بٚپخته بوبوسته، او نأن وأستی خمیرمأیه نأشتی بی و هطؤیم خورومٚ آردٚ جَا بٚپخته بی کی روغن زیتونٚ اَمرأ قأطی بوبوسته. جٚه او نأنم کی هیذره خمیرمأیه نأره کی اونٚ سٚر روغن وأسِه بوبوسته شأ ایتأ پیشکشٚ مأنستَن ایستفأده کودن. 5 اگه اینفر بٚپخته نأن سأجٚ سٚر پیشکشی بأوٚره، او نأن وأستی ایتأ خورومٚ آردٚ اَمرأ بٚبه کی هیذره خمیرمأیه نأشتی بی و روغن زیتون اَمرأ قأطی بوبوسته بی. 6 اون وأستی اونَ تکستکسَ کونه و روغن اونٚ سٚر فوکونه اَنٚم ایجور آردی پیشکشی ایسٚه. 7 اگه شیمی پیشکشی خٚکأره میأنی بٚپخته بی، اونم وأستی خورومٚ آرد و روغن زیتونٚ اَمرأ بٚبه.
8 «اَ آردی پیشکشیأنَ بأوٚرید کأهینٚ ورجأ کی بٚبره مذبح سٚر و خوداوندٚ رِه پیشکش بوکونه. 9 کأهینأن وأستی ایپچه او پیشکشی جَا نومونه وأسی بوسوجأند. اَ پیشکشی، خوداوندٚ رِه ایتأ خوشبو و مخصوصٚ پیشکش ایسٚه. 10 البأقی آردی پیشکش، فأدأ بٚبه هارون و اون پٚسرأنَ کی خوردنی رِه اونٚ جَا ایستفأده بوکونٚد. او سأم کی کأهینأنَ فأدأ بِه خٚیلی موقدس ایسٚه، چونکی مخصوصٚ پیشکش جَا اوسأده بوبوسته کی خوداوندٚ رِه پیشکش بٚده.
11 «آردی پیشکشٚ چأکودنٚ وأسی کی خوداوندٚ رِه پیشکش بِه خمیرمأیه جَا ایستفأده نوکونید، چونکی او مخصوص پیشکشأن کی خوداوندٚ رِه پیشکش بٚده قأبیلٚ قوبیل نییٚه کی اونٚ میأن عسل یا خمیرمأیه دوکودن. 12 او وخت تأنیدی شیمی مأصولٚ نوبرَ پیشکش کودنٚ رِه جٚه او نأن کی خمیرمأیه دأرِه و عسل ایستفأده بوکونید، ولی نوأستی اَ پیشکشَ ایتأ خوشبو پیشکشٚ مأنستَن مذبح سٚر بوسوجأنید.
13 «تومأم شیمی پیشکشیأنَ وأستی نمک بٚزنید، چونکی نمک خودا عهدٚ خأطر اَوٚره.»
14 «هر وخت شیمی مأصولٚ نوبرَ خوداوندٚ رِه پیشکش فأدیدی. دأنهیأنَ خوشهیأنٚ جَا سیوأ بوکونید، بوکؤبید و بٚپچید. 15 بأزون روغن زیتون اونٚ سٚر فوکونید و اونٚ سٚر کندُر بٚنید، چونکی اَنٚم ایجور آردی پیشکشی ایسٚه. 16 او وخت کأهینأن ایپچه جٚه او بوکؤبوسته غله کی روغن اَمرأ قاطی بوبوستهیَ تومأمٚ کندُرٚ اَمرأ ایتأ نومونه مأنستَن آتشٚ رو بوسوجأنٚد و ایتأ مخصوصٚ پیشکشٚ مأنستَن خوداوندَ پیشکش بوکونٚد.
Currently Selected:
لاویأن ۲: GCB
Highlight
Copy
Compare
Share
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org