خروج ۵
۵
موسا و هارون فرعونٚ قصرٚ میأن
1 موسا و هارون قومٚ پیله‌کسأنٚ دِئنٚ پٚسی، بوشؤده فرعونٚ ورجأ و اونَ بوگفتٚده: «اَمأن جٚه ایسرأییلٚ یهوه خودا ور تِرِه ایتأ پیغأم بأوٚردیم. اون فرمأیه: "می مردومَ سٚرأدن کی می پرستِئنٚ رِه عَیدٚ مرأسیمَ بٚشٚد بیأبأنٚ میأن بجأ بأوٚرٚد."» 2 فرعون بوگفته: «یهوه کیسه کی من اونی گبأنَ بٚشتأوٚم و بنی‌ایسرأییلَ آزأدَ کونٚم؟ من خوداوندَ نشنأسم و بنی‌ایسرأییلم آزأدَ نوکونٚم.» 3 موسا و هارون بوگفتٚده: «عبرانیأنٚ خودا اَمٚرَه بیدِه. اَسه سه روج سفر کودنٚ اَندر اَمٚرَه وئأل بیشیم بیأبأنٚ میأن و اویَه اَمی خوداوند خودا رِه قوربأنی فأدیم اگه اَطؤ نٚبه اون اَمٚرَه بلأ یا شمشیرٚ اَمرأ کوشِه.» 4 مصرٚ پأدیشأ موسا و هارونَ بوگفته: «چٚره ولأنید بنی‌ایسرأییل خوشأنٚ کأرَ بوکونٚد؟ وأگردید شیمی کأرٚ سٚر! 5 هسأ کی شیمی جِمئیت زیأدَ بوسته، خأیید کأرٚ جَا دٚس فأکشید؟» 6 فرعون او روجٚ میأن خو ایسرأییلی پأسبأنأن و مصری سرکأرگرأنَ اَطؤ دستور بٚدأ: 7 «اَنٚ پٚسی خشت چأکودنٚ رِه ایسرأییلیأنَ، کأکلوش فأندید؛ اوشأن وأستی خودشأن کأکلوش جمَ کونٚد. 8 ولی نوأستی خشتأنم ایتأ دأنه کمَ بٚد. اَطؤ نیشأن دِهه اوندر کی وٚست بٚبه کأر نأرٚده اگه اَطؤ نوبؤبی شؤئؤن و قوربأنی کودنٚ فیکر اَشأنٚ کله میأن دنکفتی. 9 ایجور اَشأنَ کأر فأکشید کی بیخودی گبأنٚ ایشتأوٚستٚنٚ رِه فورصت نأشته‌بید.»
10 پٚس سرکأرگرأن و پأسبأنأن ایسرأییلٚ مردومَ بوگفتٚده: «فرعونٚ فرمأنٚ اَمرأ اَنٚ پٚسی خشت چأکودنٚ رِه، شٚمٚره کأکلوش فأدأ نیبه. 11 خودتأن بیشید خشت چأکودنٚ رِه جٚه هرتأ جأجیگأ کی خأیید کأکلوش جمَ کونید. خشتأنم نوأستی ایتأ دأنه جٚه پیشتر کمتر بٚبه.» 12 پٚس، بنی‌ایسرأییل مصرٚ اَسر تأ اوسرٚ میأن پخشٚ پلأ بوبوستده کی کأکلوش جمَ کونٚد.
13 هه میأن، مصری پأسبأنأنٚم اوشأنٚ سٚر فیشأر اَوٚردیدی کی هو پیشترأنٚ اَندر خشت چأکوند 14 و ایسرأییلی سرکأرگرأنَ زئیدی و گفتیدی: «چٚره پیشترأنٚ مأنستَن شیمی کأرَ انجأم ندیدی؟»
15 ایسرأییلی سرکأرگرأن شیکأیت کودنٚ وأسی بوشؤده فرعونٚ ورجأ، بوگفتٚده: «چٚره اَطؤچی اَمی اَمرأ کردٚکأر بِه؟ 16 پأسبأنأن اَمٚرَه کأکلوش فأندٚده و رأفأ ایسأده پیشترأنٚ اَندر خشت چأکونیم! اوشأن اَلکی اَمٚرَه بٚزٚن بیگیل کونٚده، اوجور کی اَمأن تقصیر نأریم، بلکی خودشأن تقصیر دأرٚده.»
17 فرعون بوگفته: «شومأن تنبلید! تنبل! اَطؤ نوبؤبی نوگفتیدی: "وئأل کی بیشیم و خوداوندٚ رِه قوربأنی فأدیم." 18 هسأ وأگردید شیمی کأرٚ سٚر، هوطؤ کی دستور بٚدأم شٚمٚره کأکلوش فأدأ نیبه و وأستی پیشترأنٚ اَندر خشت فأدید.»
19 ایسرأییلی سرکأرگرأن کی فرعونٚ گبأنَ بٚشتأوٚستٚد کی نوأستی خشتأنٚ جَا ایتأ دأنه کمَ بٚه، بٚفأمستٚد کی بد وضعٚ میأن دکفته دأرٚده.
20 اوشأن هطؤ کی فرعونٚ قصرٚ جَا بأمؤده بیرون، موسا و هارونٚ اَمرأ کس‌بٚکس بوخوردٚد کی قصرٚ بیرون رأفأ ایسأ بود.
21 پٚس اَشأنَ بوگفتٚده: «خوداوند شیمی جَا اَمی دأدَ فأگیره کی امّا همٚتأنَ فرعون و اونی قصرٚ آدمأنٚ چومٚ جَا بِئگأدید اَشأنٚ دٚس بهأنه فأدأیید کی اَمٚرَه بوکوشٚد.»
موسا شیکأیت و خودا جوأب
22 پٚس، موسا بأمؤ خوداوندٚ ورجأ و بوگفته: «خوداوندا، چٚره تی مردومَ سختی فأدی؟ ینی هنٚ وأسی مٚرَه اوسه کودی؟ 23 جٚه او زمأت کی تی پیغأمَ فرعونَ فأرٚسأنِئم، اَ مردومٚ سٚر ظولم کونه و تونم اَشأنٚ دأدَ فأنرٚسی.»
Currently Selected:
خروج ۵: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org