خروج ۴
۴
موجیزه کودنٚ قودرتَ خودا موسایَ بخشه
1 بأزون موسا خودایَ بوگفته: «اگه بنی‌ایسرأییل می گبأنَ بأوٚر نوکونٚد و می گبأنَ نشتأوٚد و بٚگد: "چوطؤ وأستی دأنستن کی خوداوند تٚرَه ظأهیرَ بوسته؟" من اوشأنَ چی جوأب بدم؟»
2 خوداوند موسا جَا وأوٚرسِه: «تی دٚسٚ دورون چی دأری؟»
جوأب بٚدأ: «عصأ.»
3 خوداوند بٚفرمأسته: «اونَ بِئگأن بیجیر!» موسا هطؤ کی خو عصأیَ بِئگأده زیمینٚ سٚر، ایوأرکی او عصأ بوبوسته لأنتی و موسا اونی جَا بوگروخته! 4 خوداوند بٚفرمأسته: «تی دٚسَ رأستَ کون و اونی دومَ بیگیر!» موسا خو دٚسَ رأستَ کوده و لأنتی دومَ بیگیفته و لأنتی ایوأردِه اونی دٚسٚ میأن بوبوسته عصأ!
5 بأزون خوداوند بٚفرمأسته: «اَ کأرَ بوکون کی تی گبأنَ بأوٚر بوکوند و بدأند کی اَشأن پیله‌بابایأن ایبرأهیم، ایسحأق و یعقوبٚ خوداوند خودا تی رو ظأهیرَ بوسته.» 6 بأزون خوداوند بٚفرمأسته: «تی دٚسَ بٚبر تی رختٚ دورون!» موسا خو دٚسَ بٚبرده خو رختٚ دورون و هطؤ کی اونَ بأوٚرده بیرون، بیدِه کی اونی دٚس جذامٚ وأسی ورفٚ مأنستَن سیفیدَ بوسته. 7 اون بوگفته: «هسأ ایوأردِه تی دٚسَ بٚبر تی ردأ دورون!» موسا کی ایوأردِه خو دٚسَ بٚبرده خو رختٚ دورون و اونَ بأوٚرده بیرون، بیدِه کی اونی دٚس ایوأردِه سأقٚ سألیم ایسٚه.
8 بأزون خوداوند موسایَ بٚفرمأسته: «اگه اَطؤ بٚبه کی مردوم اوّلی موجیزه‌یَ بأوٚر نوکونٚد، دویُمی‌یَ بأوٚر کونٚده. 9 ولی اگه اَ دوتأ موجیزه پٚسی ایوأردِه تی گبأنَ قوبیل نوکودٚد، او وخت نیلٚ روخأنٚ آبٚ جَا اوسأن و فوکون زیمینٚ سٚر. آب خون بِه!» 10 موسا بوگفته: «خوداوندا، من هیوخت خورومٚ گب بٚزٚن کس نوبوم، نه پیشترأنٚ رِه نه اَسه کی می اَمرأ گب بٚزِیی. من آرأم آرأمِی گب زنٚم.» 11 خوداوند بٚفرمأسته: «کی اینسأنَ زوأن بٚبخشه؟ کر و جوت و کور و دِئن کسَ کی خلق بوکوده؟ آیا نه من کی خوداوند ایسٚم؟ 12 هنٚ وأسی، بوشو و من گب زِئنٚ قودرتَ تٚرَه فأدم و هر چی کی وأستی بیگی‌یَ تٚرَه آموجٚم.» 13 ولی موسا بوگفته: «خوداوندا، خأهیش کونٚم می عوض اینفر دیگه‌یَ اوسه بوکون.» 14 پٚس خوداوند موسا رِه برزخَ بوسته و بٚفرمأسته: «تی برأر هارون کی لاوی ایسٚه خورومٚ گب زِئن کسٚه و اَسه تی دِئنٚ رِه اَیِه. اون تی دِئنٚ جَا خوشألَ بِه. 15 اونچی کی وأستی بیگی‌یَ هارونَ بوگو کی جٚه تی ور گب بٚزٚنه. من شومأ هردوتأنَ گب زِئنٚ قودرتَ بٚخشم و شٚمٚره گم کی چی وأستی کودن. 16 اون مردومٚ ورجأ تی عوض گب زٚنِه و تو اونی رِه هچین خودا بی و هرچی کی اونَ بیگی‌یَ گه. 17 او موجیزه‌یأن کی می جَا بید‌ِیی نیشأن دٚئنٚ وأسی اَ عصأیم تی اَمرأ بٚبر.»
موسا وأگرده مصرٚ میأن
18 موسا وأگردسته خو زن پِئر یترونٚ ورجأ و اونَ بوگفته: «وئأل وأگردم می فکٚ فأمیلأنٚ ورجأ مصرٚ میأن کی بیدینٚم زٚنده ایسٚد یا نه.» یترون بوگفته: «بوشو بٚسلأمت.» 19 پیشتر جٚه اَنکی موسا مدیانٚ سرزیمینٚ بٚنه و بٚشه، خوداوند اونَ بوگفته: «بوشو مصرٚ میأن، چونکی اوشأن کی خأستید تٚرَه بوکوشٚد، دِه زٚنده نییٚده.» 20 پٚس، موسا «خودا عصأیَ» بٚدٚسَ گیفته و خو زن و زأکأنَ اوسأده و اولأغٚ سٚر بینیشأنه، وأگردسته مصر. 21 خوداوند اونَ بٚفرمأسته: «هطؤ کی فأرٚسِئی مصرٚ میأن، بوشو فرعونٚ ورجأ و او موجیزه‌یأنَ کی می جَا بید‌ِیی اونَ نیشأن بٚدٚن. ولی من فرعونٚ قلبَ سختَ کونٚم کی بنی‌ایسرأییلَ سرأ نٚده. 22 اونَ بوگو کی خوداوند فرمأیه: "ایسرأییل، می اوّلی زأی و پیله پٚسر ایسٚه؛ 23 هنٚ وأسی، تٚرَه دستور دٚهٚم وئألی اون مصرٚ جَا بٚشه بیرون و مٚرَه عیبأدت بوکونه. اگه انجأم نیدی، تی پیله پٚسرَ کوشٚم."» 24 پٚس موسا و اونی خأنوأر آدمأن بوشؤده مصرٚ ور. رأ میأن کی نفَس گیفتأندوبود، خوداوند اونی رِه ظأهیرَ بوسته و اونَ مرگٚ رِه پأترس بٚدأ. 25 ولی صفوره، موسا زن، ایتأ تیجٚ سنگَ اوسأد و خو پٚسرَ سونٚت بوکوده و اونٚ بمأنسته پوستَ وأسِه موسا لنگَ و بوگفته: «شک نٚنأ کی مِرِه خونٚ زأمأ ایسی.» «خونٚ زأمأ» سونٚتَ ایشأره دأشتی 26هنٚ وأسی، خودا موسا کوشتنٚ جَا بی‌خیألَ بوسته. 27 او وخت خوداوند هارونَ بٚفرمأسته کی خو برأر موسا رِه بٚشه پیشوأز صأرأیی میأن. پٚس هارون بوشؤ حوریبٚ کوهٚ ور کی اونَ «خودا کوه» گفتیدی. اوشأن هطؤ کی فأرٚسِده کس‌کسَ بینأ کودن مأچی دٚئن. 28 بأزون، موسا هارونٚ رِه نقل بوکوده کی خوداوند چی دستورأن اونَ فأدأ، و مصرٚ پأدیشأ ورجأ چی موجیزه‌یأن وأستی بوکونه. 29 بأزون موسا و هارون وأگردستٚده مصر و تومأمٚ بنی‌ایسرأییلٚ ریش سیفیدأنَ جمَ کودٚد. 30 هرچی کی خوداوند موسا رِه بٚفرمأسته بو، هارون اَشأنٚ رِه نقل بوکوده و موسایٚم اوشأنَ موجیزه‌یأنَ نیشأن بٚدأ. 31 او وخت ایسرأییلٚ آدمأن بأوٚر بوکودٚد کی اوشأنَ خودا اوسه بوکوده، و هطؤ کی بٚشتأوٚستٚد خوداوند اَشأنٚ موصیبتأنَ فأندرسته و خأیه اوشأنَ نیجأت بٚده، فوچومستده، خودایَ عیبأدت بوکودٚد.
Currently Selected:
خروج ۴: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org