خروج ۲۸
۲۸
کأهینٚ رخت
1 «تی برأر هارون و اونی پٚسرأن ناداب، ابیهو، العازار و ایتامارَ البأقی آدمأنٚ جَا سیوأ بوکون، کأهینی موقأمٚ رِه اینتخأب بوکون کی مٚرَه خیدمت بوکونٚد. 2 چنتأ مخصوصٚ رخت هارونٚ رِه فرأهمَ کون کی موشخص بٚبه کی اون می خیدمتٚ رِه سیوأ بوبوسته. اونٚ رختأن قشنگ و اونٚ موقدسٚ کأرٚ رِه شأیسته بٚبه. 3 اوشأنی کی دوختٚ دوج دأنٚده‌یَ دستور بٚدٚن هارونٚ رختأنَ آمأدَه کونٚد او رختأن کی البأقی مردومٚ رختأنٚ مأنستَن نٚبه و موشخص بٚبه کی اون مٚرَه کأهینی موقأمٚ میأن خیدمت کودأندٚره. 4 اَشأن او رختأن ایسٚد کی وأستی بودؤخته بٚبد: سینه‌پوش، ایفود، ردأ، نقشدأرٚ پیرهن، دستأر و کمرٚ رِه شأل. تی برأر هارون و اونی پٚسرأنٚ رِه جٚه هه رختأنٚم وأستی دؤختٚن کی بٚتأنٚد مٚرَه کأهینی موقأمٚ میأن خیدمت بوکونٚد. 5 پٚس اوشأنَ آبی، ارغوأنی و سورخٚ نخأن و طلأ و هوطؤ ریز بأفٚ کتأن فأدأن.
ایفود
6 «ریز بأفٚ کتأنٚ جَا وأستی صنعتگرأن ایفودَ آمأدَه کونٚد، اونَ مهأرتٚ اَمرأ آبی، ارغوأنی و سورخٚ نخأن و طلأ اَمرأ گولدوجی بوکونٚد.
7 «اَ بولندٚ جردقه جٚه دو قیسمت، پوشت و جولو، کی شأنه‌یأنٚ رو دوتأ بندٚ اَمرأ کس‌کسَ دوچوکده، چأکوده بٚبه. 8 ایفودٚ قئیشم وأستی هونٚ جینس و اونَ دوچوکسته بٚبه، ینی طلأ رشته‌یأن و ریز بأفٚ کتأن و آبی، ارغوأنی و سورخٚ نخأنٚ جَا.
9 «دوتأ جزع سنگ آمأدَه کون و بنی‌ایسرأییلٚ دوأزده طأیفه نأمأنَ اونٚ رو بٚکن. 10 ینی دأل بٚدأل اوشأنٚ سنٚ سٚر هرتأ سنگٚ رو شیش‌تأ نأم. 11 ایتأ مأهرٚ خأتم‌کأر و حکأکٚ مأنستَن سنگأن رو نأمأنَ بٚکن و او قأبأنٚ میأن بٚنه کی طلأ جَا ایسٚه. 12 بأزون اوشأنَ ایفودٚ چأنٚ رو دوچوکأن کی اَطؤیی هارون بنی‌ایسرأییلٚ طأیفه‌یأنٚ نأمأنَ بأوٚره می حوضور و من اوشأنَ خأطر بأوٚرم. 13 هطؤیم چنتأ طلأیی قأب چأکون 14 خألیصٚ طلأ جَا دوتأ زینجیل چأکون و اوشأنَ دوچوکأن طلأیی قأبأنَ کی ایفودٚ چأنٚ رو نٚهأ.
سینه‌پوش
15 «خوداوندٚ خأسته فأمستنٚ وأسی ایتأ سینه‌پوش کأهینٚ رِه چأکون. اونَ ایفودٚ مأنستَن جٚه ریز بأفٚ کتأن، آبی، ارغوأنی و سورخٚ نخأن و طلأ رشته‌یأن چأکون و دیقّت اَمرأ اونٚ رویَ گولدوجی بوکون. 16 اَ سینه‌پوش وأستی دولأ و ایتأ چأرگوشٚ جؤأل کی اونٚ هرتأ بٚر ای وجبٚ مأنستَن بٚبه. 17 چأر رٚج سنگ کی خٚیلی اَرزِه اونٚ رو دوچوکأن. اوّلی رٚج سورخٚ عقیق، زردٚ یأقوت و آتشی یأقوت بٚبه. 18 دویُمی رٚج زمُرد، کبودٚ یأقوت و المأس. 19 سیومی رٚج فیروزه، یمأنی عقیق و بنفشٚ یأقوت. 20 چأرومی رٚج زبرجد، جزع و یشم. تومأمٚ اوشأن وأستی طلأ جَا قأبأن بٚدأرٚد. 21 هرتأ جٚه اَ سنگأن ایتأ جٚه بنی‌ایسرأییلٚ دوأزده طأیفه نیشأنه‌یأن بِه و او طأیفه نأم او سنگٚ رو بٚکنده بِه.
22 «خألیصٚ طلأ جَا بٚبأفته زینجیلأن چأکون کی سینه‌پوشَ دوچوکأنٚد ایفودٚ سٚر. 23 بأزون دؤنه طلأیی حلقه چأکون و اوشأنَ دوچوکأن سینه‌پوشٚ دوتأ گوشه رو. 24 دوتأ زینجیلَ بٚنه سینه پوشٚ دو تأ گوشه‌یأنٚ حلقه میأن، 25 و زینجیلأنٚ او دوتأ دِه سٚرَ جٚه جولو دوچوکأن شأنه‌یأنٚ سٚر او طلأیی قأبأنٚ رو. 26 دوتأ دِه طلأیی حلقه‌یٚم چأکون و اوشأنَ دٚوٚد سینه‌پوشٚ بیجیری لأیه رو کی دوتأ گوشه جیر نٚهأ. 27 دوتأ دِه طلأیی حلقه‌یٚم چأکون و اوشأنَ دوچوکأن ایفودٚ جولو قئیشٚ جَا ایپچه بوجؤرتر. 28 اونٚ وأسی کی سینه‌پوش ایفودٚ جَا سیوأ نٚبه سینه‌پوشٚ حلقه‌یأنَ آبی رنگٚ نوأرٚ اَمرأ دٚوٚد او ایفودٚ حلقه‌یأنَ کی قئیشٚ جَا بوجؤرتر نٚهأ.
29 «اَطؤیی او وخت کی هارون شِه قدسٚ میأن بنی‌ایسرأییلٚ تومأمٚ طأیفه‌یأنٚ نأمأنَ خو اَمرأ بٚرِه کی سینه‌پوشٚ رو بٚکنده بوبوسته، اَطؤیی همیشٚک قوم، خوداوندٚ چومٚ جولو بِئیسٚد. 30 اوریم و تُمیمَ بٚنه سینه‌پوشٚ میأن کی او وخت کی هارون اَیٚه می حوضور اوشأن همیشکٚ رِه اونٚ دیلٚ رو بٚمأنٚد و اونٚ بٚتأنه می خأسته‌یَ ایسرأییلٚ قومٚ رِه بٚفأمه.
کأهینٚ البأقی رختأن
31 «او ردأ کی ایفودٚ جیر نٚهأ وأستی آبی پأرچه جَا بٚبه. 32 اونٚ میأن ایتأ درزٚ شکأف، سٚرٚ رِه بٚمأنه. اَ درزٚ شکأفٚ لبه دٚسٚ اَمرأ وأستی بٚبأفته بٚبه کی پأرَه نٚبه. 33 انأرٚ مأنستَن چنتأ منگوله، آبی، ارغوأنی و قرمزٚ نخأنٚ اَمرأ چأکون و اونَ وأرگأن ردأ دأمنٚ لبه دؤرتأدؤرَ و طلأ جَا چنتأ زنگوله اوشأنٚ مأبین بٚنه. 34 انأرأن و طلأ جَا زنگوله‌یأن وأستی ایتأ درمیأن ردأ دأمنٚ دؤرتأدؤر بٚمأنٚد. 35 هارون او ردأیَ وأستی خوداوندٚ خیدمت کودنٚ زمأت دوکونه کی او وخت کی اَیِه می حوضور قدس میأن یا کی شِه بیرون، زنگوله‌یأنٚ صدا بٚشتأوٚسته بٚبه، نوکونه بیمیره.
36 «خألیصٚ طلأ جَا ایتأ نیصفه تأج چأکون و اَ کلمه‌یأنَ ایتأ مُهرٚ مأنستَن اونٚ رو بٚکن: "موقدس خوداوندٚ رِه".
37 اَ نیصفه تأجَ ایتأ آبی رنگٚ نوأرٚ اَمرأ دٚوٚد هارونٚ دستأرَ ایجور کی اون بٚمأنه دستأرٚ جولو. 38 اَ نیصفه تأج هارونٚ پیشأنی رو وأستی بٚمأنه کی اون هرتأ ایشتیوأیَ کی بنی‌ایسرأییل او موقدسٚ قوربأنیأنٚ پیشکش کودنٚ زمأت ایمکأن دأره انجأم بٚدد، خو رو بٚنه. هارون او قوربأنیأنٚ وأسی کی خوداوندٚ رِه قأبیلٚ قوبیل بٚبه همیشٚک وأستی اَ نیصفه تأجَ خو پیشأنی رو بٚدأره.
39 «هارونٚ پیرهنَ ریز بأفٚ کتأنٚ جَا بٚبأف؛ اونٚ دستأرَ هوطؤ. اونٚ رِه ایتأ قئیشم کی گولدوجی بوبوسته بی چأکون.
40 «هارونٚ پٚسرأنٚ رِه رخت، قئیش و کولأیٚم آمأدَه کون. اَ رختأن اَشأنٚ موقدسٚ کأر رِه وأستی قشنگ و شأیسته بٚبه. 41 اَ رختأنَ دوکون هارون و اونی پٚسرأنَ. روغن زیتونٚ اَمرأ اوشأنَ مَسح بوکون و اَشأنَ کأهینی خیدمتٚ وأسی تقدیس و اینتخأب بوکون. 42 اَشأنٚ برأنده لگن تأ رأنَ لأ دٚئنٚ رِه، کتأنٚ جَا رختٚ جیر دوکودنٚ رِه ایتأ لیوأس چأکون کی جٚه کمر تأ زانو جؤر اونی قد بٚبه. 43 هارون و اونی پٚسرأن، او وخت کی مولأقأتٚ خیمه‌یَ شٚده بودورون، یا کی اَیٚده مذبح نیزدیکی کی قدس میأن خیدمت بوکونٚد، اَ رختأنَ وأستی دوکونٚد، نوکونه گونأ بوکونٚد، بیمیرٚد. اَ رسم هارون و اونٚ نتأجٚ رِه ایتأ اَبدی قأنون ایسٚه.»
Currently Selected:
خروج ۲۸: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org