خروج ۲۷
۲۷
مذبح
1 «اقاقیا چو جَا مذبحَ چأکون، مربع مأنستَن کی اونی هرتأ بٚرٚ درأزأ دو متر و نیم و اونی بولندی ای متر و نیم بٚبه. 2 ایجور اونَ چأکون کی اونٚ چأرتأ گوشه میأن چأرتأ ایضأفه چی شأخٚ مأنستَن بٚمأنه. تومأمٚ مذبح و شأخأن مفرغٚ اَمرأ رو بیگیفته بٚبد. 3 اونٚ اسبأب اَثأثیه مٚفرغٚ جَا وأستی بٚبه کی اَشأن ایسٚد چنتأ بٚدره خأکسترٚ اوسأدنٚ رِه، خأکیندأزأن، قدأره‌یأن، چنگکأن و آتشدأنأن. 4 مٚفرغ جَا ایتأ منقل مذبحٚ رِه چأکون کی سولأخ سولأخ بٚبه کی ایتأ مٚفرغی حلقه اونٚ هرتأ گوشه میأن بٚمأنه، 5 مذبح لبه جیر اَ منقلَ بٚنه ایجور کی مذبحٚ بولندی نیمه میأن بٚمأنه. 6 اقاقیا دأرٚ جَا کی مٚفرغٚ اَمرأ رو بیگیفته بٚبه دوتأ چو مذبحٚ رِه چأکون 7 و چوبأنَ فوقأ مذبحٚ دو ورٚ حلقه‌یأنٚ میأن کی مذبحٚ اَرأ اورأ بردنٚ زمأت، اونٚ دو ورٚ میأن بٚمأنٚد. 8 هوطؤ کی کوه جؤر نیشأن بٚدأم، وأستی مذبحٚ دورون هیچی نمأنه و تخته اَمرأ چأکوده بٚبه.
عیبأدتٚ خیمه صأرأ
9 «ایتأ صأرأ عیبأدتٚ خیمه رِه چأکون. جونوبٚ ورٚ پرده‌یأن درأزأ پنجأ متر و ریز بأفٚ کتأنٚ جَا بٚبه 10 بیست‌تأ سوتونٚ و بیست‌تأ مٚفرغی پأیه اَمرأ، و سوتونأنٚ رو قولأبأن و پوشت‌دٚوٚدأن نوقره جَا بٚبد. 11 صأرأ شومألٚ ورٚ وأسی‌یٚم هه کأرَ بوکون. 12 صأرأ پرده‌یأنٚ حیصأرٚ درأزأ کی غربٚ ور نٚهأ بیست و پنج متر وأستی بٚبه ده‌تأ سوتون و ده‌تأ پأیه اَمرأ. 13 پرده‌یأنٚ حیصأرٚ درأزأ کی شرقٚ ور نهأیم بیست و پنج متر وأستی بٚبه. 14 بودورون شؤئؤن جیگأ ایوٚرٚ میأن، چنتأ پرده کی اونی درأزأ هفت متر و نیم و سه‌تأ سوتون و سه‌تأ پأیه اَمرأ بٚمأنه، 15 بودورون شؤئؤن جیگأ اویتأ ورٚ میأنم چنتأ پرده کی اونی درأزأ هفت متر و نیم و سه‌تأ سوتون و سه‌تأ پأیه اَمرأ بٚمأنه.
16 «ایتأ پرده ریز بأفٚ کتأنٚ جَا کی اونٚ درأزأ ده متر بٚبه صأرأ بودورون شؤئؤن جیگأ رِه آمأدَه کون و آبی، ارغوأنی و سورخٚ نخأنٚ اَمرأ گولدوجی بوکون و اونَ وأرگأن چأرتأ سوتونٚ سٚر کی چأرتأ پأیه رو نهأده. 17 نوقره‌یی قولأبأن و پوشت‌دٚوٚدأنٚ اَمرأ وأستی تومأمٚ صأرأ دؤرٚوٚرٚ سوتونأن کس‌کسَ دوچوکسته بٚبد. سوتونأن وأستی مٚفرغی پأیه‌یأنٚ میأن بٚمأنٚد. 18 پٚس وأستی صأرأ پنجأ متر درأزأ و بیست و پنج متر پأنأ و دو متر و نیم بولندی بٚدأره. ریز بأفٚ کتأنٚ جَایٚم اونٚ پرده‌یأن و مٚفرغٚ جَا اونٚ پأیه‌یأن بٚبد.
19 «تومأمٚ البأقی اسبأب اَثأثیه‌یأن کی خیمه میأن ایستفأده بٚده و خیمه و صأرأ مِخأن مٚفرغٚ جَا وأستی بٚبد.
چرأغأنٚ جَا مورأقبت کودن
20 «بنی‌ایسرأییلَ دستور بٚدٚن چرأغأنٚ همیشٚک روشن دأشتنٚ رِه فیچألسته زیتونٚ جَا خألیصٚ روغن بأوٚرد کی چرأغدأنٚ میأن دوکونٚد. 21 مولأقأتٚ خیمه میأن، او پرده بیرون کی عهدٚ صوندوقٚ روبرو نٚهأ، هارون و اونی پٚسرأن شب تأ صُب اَ چرأغدأنَ خوداوندٚ حوضورٚ میأن روشن بٚدأرٚد. اَن تومأمٚ بنی‌ایسرأییلٚ نتأجأنٚ رِه ایتأ اَبدی قأنون ایسٚه.
Currently Selected:
خروج ۲۷: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org