خروج ۲۶
۲۶
عیبأدتٚ خیمه
1 «ده‌تأ پرده، جٚه ریز بأفٚ کتأن و آبی و ارغوأنی و سورخٚ نخأنٚ اَمرأ عیبأدتٚ خیمه‌یَ چأکون. دیقّتٚ اَمرأ فٚرٚشته‌یأنٚ نقش اونٚ رو گولدوجی بٚبه. 2 پرده‌یأن همٚتأ ایتأ قد بٚبد، اوشأنٚ درأزأ چأردَه متر و پأنأ دو متر بٚبه. 3 پنج‌تأ پنج‌تأ، ده‌تأ پرده‌یَ کس‌بٚکس بودوج ایجور کی دوتأ نیمه سیوأ جٚه هم چأکوده بٚبد. 4 چنتأ حلقه جٚه آبی پأرچه اوّلی دسته جَا آخری پرده لچه سٚر چأکون و دویُمی دسته جَا آخری پرده لچه سٚرم اَطؤچی چأکون. 5 ایجور کی حلقه‌یأن کس‌کسٚ موقأبیل بِئیسٚد، ایتأ پرده سٚر پنجأتأ حلقه و اویتأ دسته جَا آخری پرده سٚر پنجأتأ حلقه چأکون. 6 بأزون طلأ جَا پنجأتأ گیره چأکون و اوشأنٚ اَمرأ پرده‌یأنَ کس‌کسٚ اَمرأ دوچوکأن کی عیبأدتٚ خیمه دؤر پرده‌یأن ایتأ تیکه بیرون بأیٚد. 7 عیبأدت خیمه سقفَ لأ دئنٚ رِه چأدرٚ مأنستَن بوزٚ پشمٚ اَمرأ بٚوأف. کس‌کسٚ سٚر یأزده‌تأ تیکه پأرچه بٚبد. 8 اَ یأزده‌تأ تیکه پأرچه ایتأ قد بٚبد، هرتأ اونٚ درأزأ پونزده متر و اونَ پأنأ دو متر. 9 پنج‌تأ جٚه او تیکه‌یأنَ کس‌بٚکس بودوج کی ایتأ پیله تیکه چأکوده بٚبه. هطؤ دأل بٚدأل او شیش‌تأ دِه تیکه‌یَ کس‌بٚکس بودوج. شیشومی تیکه جٚه موقدس خیمه جولو، بوجؤرٚ شرأ آویزأنَ بِه. 10 پنجأتأ حلقه، جٚه ایتأ دسته آخری پرده حأشیه میأن چأکون و پنجأتأ حلقه جٚه اویتأ دسته آخری پرده حأشیه میأنم چأکون. 11 بأزون مفرغٚ جَا پنجأتأ گیره چأکون و اوشأنَ حلقه‌یأنٚ میأن بٚنه کی خیمه لأ دئنٚ رِه کس‌بٚکس دوچوکد، ایتأ بٚبد. 12 او سأمأن ایضأفه پرده‌یأن لأ دئنٚ رِه، ینی او پرده نیمه کی ایضأفَه ایسٚه، خیمه پوشت وأرگأده بٚبه. 13 خیمه لأ دئنٚ رِه پرده‌یأنَ جٚه دو ور نیم متر ویشتر بِه؛ خیمه لأ دٚئنٚ رِه اَ ایضأفه قیسمت جٚه اونٚ دو وٚر آویزأنَ بِه. 14 دوتأ دِه لأ دٚئنٚ رِه چأکون ایتأ قوچٚ پوستٚ جَا کی اونی رنگ سورخ بوبوسته‌بی و اویتأ خزٚ پوستٚ جَا، و اوشأنَ دأل بٚدأل تأوٚد اوّلی لأ رو. اَطؤیی عیبأدتٚ خیمه سقف کأمیلَ بِه.
15 «اقاقیا چوبٚ تخته‌یأنٚ جَا عیبأدتٚ خیمه چوب‌بستَ چأکون. 16 درأزأ هرتأ تخته شین پنج متر و اونی پأنأ ۷۵ سأنت بٚبه. 17 اونٚ وأسی کی تخته هرتأ ور بغلی تخته اَمرأ جوفت بٚبه ایتأ زوأنه بٚمأنه. تومأمٚ عیبأدت خیمه تخته‌یأنَ اَطؤ چأکون. 18 بیست‌تأ تخته عیبأدتٚ خیمه جونوبٚ ورٚ رِه چأکون 19 و چهل‌تأ نوقره‌یی پأیه اوشأنٚ جیرٚ وأسی، ینی هرتأ تخته دؤنه زوأنه رِه دوتأ پأیه. 20 بیست‌تأ تخته عیبأدتٚ خیمه اویتأ ورٚ رِه، ینی شومألٚ ور چأکون 21 و اوشأنٚ جیرٚ رِه چهل‌تأ نوقره‌یی پأیه، ینی هرتأ تخته رِه دونه پأیه. 22 عیبأدتٚ خیمه آخری قیسمتٚ رِه، ینی او غربٚ آخری قیسمتٚ رِه شیش‌تأ تخته چأکون 23 و دؤنه تخته هرتأ گوشه جٚه خیمه آخری قیسمتٚ رِه. 24 اَ دؤنه تخته وأستی حلقه‌یأنٚ اَمرأ جٚه بوجؤر و بیجیر تخته‌یأنَ دوچوکد. 25 پٚس سٚرهم عیبأدتٚ خیمه انتهأ میأن وأستی هشت‌تأ تخته شونزده‌تأ نوقره‌یی پأیه اَمرأ، هرتأ تخته جیر دؤنه پأیه بٚمأنه.
26 «اقاقیا چوبٚ جَا چنتأ پوشت‌دٚوٚد چأکون کی اوفقی تخته‌یأنَ بٚدأرٚد: شومألٚ ور تخته‌یأنٚ رِه پنج‌تأ پوشت‌دٚوٚدٚ تیر، 27 جونوبٚ ور تخته‌یأنٚ رِه پنج‌تأ تیر و خیمه آخرأنٚ شرأ، غربٚ ور تخته‌یأنٚ رِه پنج‌تأ تیر نٚهأ. 28 وسطی تیر وأستی سرتأسر جٚه تخته‌یأنٚ میأنی دٚوأره.
29 «تومأمٚ تخته‌یأن طلأ جَا رو بیگیفته بٚبد. تیرٚکأنٚ دأشتنٚ رِه طلأ جَا چنتأ حلقه چأکون. طلأ جَا تیرٚکأنَ رو بیگیر. 30 خأیٚم اَ خیمه‌یَ هوطؤ چأکونی کی اونی مأنستَنَ کوه جؤر تٚرَه نیشأن بٚدأم.
31 «خیمه دورون، ریز بأفٚ کتأنٚ جَا و آبی، ارغوأنی و سورخٚ نخ ایتأ پرده چأکون و فٚرٚشته‌یأنٚ نقشَ اونٚ رو دیقّتٚ اَمرأ گولدوجی بوکون. 32 اقاقیا چوبٚ اَمرأ کی طلأ اَمرأ رو بیگیفته بوبوسته چأرتأ سوتون بٚپأ بوکون کی طلأ جَا چأرتأ قولأبم بٚدأره. سوتونأن چأرتأ نوقره‌یی پأیه میأن وأستی بٚمأنٚد. پرده‌یَ قولأبأنٚ میأن وأرگأن. 33 اَ پرده وأستی "قدس" و "قدس‌الاقدأسٚ" وسط وأرگأده بٚبه کی او دوتأیَ کس‌کسٚ جَا سیوأ بوکونه. عهدٚ صوندوقَ کی دؤنه سنگٚ لوح اونٚ دورونی نٚهأیَ اَ پرده پوشت بٚنه.
34 «عهدٚ صوندوقَ رحمتٚ تختٚ اَمرأ کی اونٚ رو نٚهأیَ بٚنه قدس‌الاقدأسٚ میأن. 35 میز و چرأغدأنَ پرده بیرون کس‌کسٚ موقأبیل بٚنه، ایجور کی چرأغدأن قدسٚ جونوبٚ ور و میز قدسٚ شومألٚ ور بٚمأنه.
36 «عیبأدتٚ خیمه بودورون شؤئؤنٚ جیگأ رِه ریز بأفٚ کتأنٚ جَا کی آبی، ارغوأنی و سورخٚ نخأنٚ اَمرأ گولدوجی بوبوسته ایتأ پرده آمأدَه کون. 37 اقاقیا چوبٚ جَا کی طلأ اَمرأ رو بیگیفته بوبوسته پنج‌تأ سوتون اَ پرده رِه چأکون. اونٚ قولأبأنم طلأ جَا بٚبه. پنج‌تأ مٚفرغی پأیه‌یٚم اوشأنٚ رِه چأکون.
Currently Selected:
خروج ۲۶: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org