خروج ۱۲
۱۲
پِسَحٚ عَید
1 خوداوند مصرٚ سرزیمینٚ میأن موسا و هارونَ بٚفرمأسته: 2 «اَ مأه جٚه اَنٚ پٚسی وأستی شِمِره سألٚ میأن اوّلی و بوجؤرترین مأه بٚبه. 3 پٚس ایسرأییلٚ تومأمٚ مردومَ بیگید کی هرتأ سأل هه مأه دهومی روجٚ دورون، هرتأ خأنوأر جٚه اَشأن ایتأ بٚرّه یا ایتأ بوزٚ زأی آمأدَه کونه. ایجور کی ایتأ حیوأن ایتأ خأنوأرٚ شین بٚبه. 4 اگه ایتأ خأنوأرٚ نفرأن کم بٚبه تأنه ایتأ جٚه خو همسأده کوجه خأنوأرأنٚ اَمرأ شیریک بٚبه، ینی هرتأ خأنوأر خو نفرأنٚ اَندر، هوندر کی خورٚده، خو سأمٚ شین بٚرّه پولَ فأدٚه. 5 اَ حیوأن، چی گوسوٚند بٚبه چی بوز بٚبه، وأستی نر بٚبه و ای سأله و عأیب نأشتی بی.
6 «تأ اَ مأه میأن چأردهومی روج عصرٚ رِه اَ مخصوصٚ حیوأنَ خُب بٚپأیید. بأزون تومأمٚ ایسرأییلٚ مردوم خوشأنٚ بٚرّه‌یأنَ ذبح بوکوند. 7 و اوشأنٚ خونَ درٚ دو طرفٚ بٚپأ بٚدأشته تیرأنٚ سٚر و خوشأنٚ خأنه سٚر درأنٚ سٚر کی اویَه بٚرّه گوشتَ خوردأندرد، فوکوند. 8 هو شبٚ میأن، گوشتَ بیبیجٚد و فطیرٚ نأن (او نأن کی خمیرمأیه نأره) و زرخٚ سبزیأنٚ اَمرأ بوخورد. 9 نوأستی گوشتَ خأم یا بٚپخته بوخورد، وأستی همه‌یَ بیبیجٚد حتّا اونی کله و پأچه و دیل و جگرَ. 10 تأ صُب وأستی تومأمٚ گوشت بوخوردن بٚشه، و اگه اونی جَا ایچی بٚمأنسته اونَ بوسوجأند.
11 «بٚره خوردنٚ جَا پیشتر، پأ افزأر دوکونید، دٚسٚ‌چو دٚسَ گیرید و سفر کودنٚ رِه آمأدَه بید، و توندٚ تأکیدی اَمرأ بٚرّه‌یَ بوخورید. اَ رسم، خوداوندٚ پِسَح بٚخأنده بِه. 12 چونکی من کی خوداوند ایسٚم، مصرٚ سرزیمینٚ جَا ایمشب دٚوأرٚم و تومأمٚ مصریأنٚ اوّلی پٚسرأن و تومأمٚ اَشأنٚ حیوأنأنٚ اوّلی زأکأنَ جٚه بین بٚرٚم و اوشأنٚ خودایأنَ موجأزأت کونٚم. 13 شومأن شیمی خأنه‌یأنٚ درٚ تیرأنٚ سٚر او خونَ کی فوکونیدی، شیمی خأنه‌یأنٚ رِه ایتأ نیشأنه بِه. من خونَ کی بیدینٚم شیمی جَا دٚوأرٚم و فقد مصری‌یأنٚ جٚه بین بٚرٚم.
14 «همیشٚک اَ مأجیرأ سألٚ دأشتنٚ وأسی خوداوندٚ رِه جشن بیگیرید. اَ رسم اَبدٚ رِه تومأمٚ نتأجأنٚ شین بِه کی دونبألتر اَیٚده. 15 اَ جشنٚ میأن کی هفت روج درأزه کشِه فقد وأستی فطیرٚ نأنَ بوخورید. اوّلی روجٚ میأن، شیمی خأنه جَا خمیرمأیه‌یَ بٚبرید بیرون، چونکی اگه اینفر اَ هفت روجٚ میأن او نأنَ بوخوره کی خمیرمأیه دأره، وأستی ایسرأییلٚ مردومٚ جَا سیوأ بٚبه. 16 اَ جشنٚ اوّلی و هفتومی روجٚ میأن، تومأمٚ مردوم وأستی همٚتأن کس‌کسٚ اَمرأ جمَ بٚد خودایَ عیبأدت بوکوند. اَ دو روجٚ میأن هیتأ دِه کأر جغرز خوردنی آمأدَه کودن نوکونید.
17 «اَ عَیدٚ جشن گیفتن کی فطیرٚ نأنٚ اَمرأ ایسٚه، شٚمٚره خأطر اَوٚره کی من شٚمٚره اَطؤچی روجٚ میأن مصرٚ جَا بأوٚردٚم بیرون. پٚس اَ جشنٚ انجأم دٚئن اَبدٚ رِه شیمی سٚر و شیمی نتأجأنٚ سٚر کی دونبألتر اَیٚده نٚهأ کی وأستی انجأم بٚبه. 18 اَ مأه میأن جٚه چأردهومی روج کی آفتأب کفِه تأ بیست و یکومی روجٚ میأن کی آفتأب کفِه وأستی او نأنَ بوخورید کی خمیرمأیه نأره. 19 نوأستی اَ هفت روجٚ میأن خمیرمأیه جَا حتّا ایتأ مأله شیمی خأنه‌یأنٚ میأن بٚمأنه. اَ زمأتٚ میأن اگه اینفر او نأنَ بوخوره کی خمیرمأیه دأره، وأستی ایسرأییلٚ مردومٚ جَا سیوأ بٚبه. حتّا او غریبه‌یأنم کی شیمی میأن سأمأن بیگفتده وأستی اَ قأنونأنَ انجأم بٚدد. 20 ایوأردِه سفأرش کونٚم کی اَ هفت روجٚ میأن او نأن کی خمیرمأیه دأره‌یَ نوخورید. فقد فطیرٚ نأنَ بوخورید.»
21 بأزون موسا، قومٚ ریش‌سفیدأنَ خو ورجأ دؤخأده و اَشأنَ بوگفته: «بیشید و شیمی خأنوأرٚ رِه چنتأ بٚره فأگیرید و اوشأنَ پِسَحٚ عَیدٚ رِه قوربأنی بوکونید. 22 بٚره خونَ دوکونید ایتأ تشتٚ میأن و خونَ زوفأ گیأ اَمرأ فوکونید شیمی خأنه‌یأنٚ درٚ سٚر و درٚ دو طرفٚ تیرأنٚ سٚر. او شبٚ میأن هیتأ شیمی جَا نوأستی خأنه جَا بٚشه بیرون. 23 خوداوند مصریأنٚ کوشتنٚ وأسی او شب مصرٚ سرزیمینٚ میأن دٚوأره. ولی شیمی خأنه‌یأنٚ درٚ سٚر و درٚ دو طرفٚ تیرأنٚ سٚر خونَ کی بیدینه جٚه اویَه دٚوأره و ولأنه "هلأک کودن کس" شیمی خأنه‌یأنَ بٚشه بودورون و شٚمٚره بوکوشه. 24 اَ مرأسیمٚ انجأم دٚئن شٚمٚره و شیمی زأکأنٚ رِه ایتأ وأجبٚ کأر ایسٚه کی اَبدٚ رِه وأستی انجأم بٚبه. 25 خوداوندٚ وعده بٚدأ سرزیمینَ کی بوشؤیید بودورون، پِسَحٚ عَیدَ جشن بیگیرٚد. 26 شیمی زأکأن هر زمأت شیمی جَا وأوٚرسٚد کی اَ جشن چی وأسی ایسٚه، 27 بیگید: پِسَحٚ عَیدَ او شبٚ وأسی خوداوندٚ رِه جشن گیریمی کی اون مصرٚ جَا دٚوأرٚسته، مصریأنٚ بوکوشته، ولی امّا ایسرأییلیأنٚ خأنه‌یأنَ کی فأرٚسِه اوشأنٚ جَا دٚوأرٚسته و اَمٚرَه کأر نأشتی.»
ایسرأییلٚ مردوم خوداوندٚ ایحترأم نٚئنٚ وأسی خوشأنٚ دیمَ خأکٚ سٚر بٚنأده. 28 بأزون موسا و هارون هوطؤ کی خوداوند اوشأنَ دستور بٚدأ بو، بوکودٚد.
مصریأنٚ اوّلی پٚسرأنٚ مٚردن
29 نیصفٚ شب، خوداوند مصرٚ میأن تومأمٚ اوّلی پٚسرأنَ بوکوشته، جٚه فرعونٚ اوّلی پٚسر کی اونی جیگأ سٚر وأستی بینیشنه بیگیفته تأ او غولأمٚ پٚسر کی سیأچألٚ میأن زندأنی بو. اون حتّا اَشأنٚ تومأمٚ حیوأنأنٚ اوّلی زأکأنم جٚه بین بٚبرده. 30 او شبٚ میأن فرعون و قصرٚ آدمأن و تومأمٚ مصریأن خوفتنٚ جَا ویریشتد و زهأر بٚزِده، ایجور کی اَسٚر تأ اوسٚر مصرٚ میأن اوشأنٚ ایجگره و زهأر زِئن دیپیچسته، چونکی هیتأ خأنه نوبو کی هیکس اویَه نمٚرده بی.
31 فرعون هو شبٚ میأن موسا و هارونَ دؤخأده و اَشأنَ بوگفته: «هرچی زوتر مصرٚ سرزیمینٚ جَا بیشید بیرون و بنی‌ایسرأییلم بٚبرید شیمی اَمرأ. بیشید و هوطؤ کی خأستیدی خوداوندَ عیبأدت بوکونید. 32 شیمی گله و چأرپأیأنم بٚبرید. ولی شؤئؤنٚ جَا پیشتر مِرِه‌یٚم دوعأ بوکونید.» 33 مصرٚ آدمأنٚم ایسرأییلٚ مردومَ پأفیشأری بوکودٚد کی هر چی زوتر مصرٚ جَا بٚشٚد بیرون. اوشأن بنی‌ایسرأییلَ گفتیدی: «تأ امّا همٚتأنَ کوشتنٚ رِه فأندأیید جٚه اَیَه بیشید بیرون.»
34 پٚس ایسرأییلٚ مردوم او تشتأن کی لبألب جٚه او خمیر بو کی مأیه نأشتی‌یَ پأرچه دورون فیویختده و دٚوٚستده خوشأنٚ چأنٚ پٚسٚ سٚر، 35 و هوطؤ کی موسا اَشأنَ بوگفته بو خوشأنٚ مصری همسأده‌یأنٚ جَا رخت و طلأ و نوقره بٚخأستٚده. 36 خوداوند مصرٚ مردومٚ ورجأ، ایسرأییلٚ مردومَ حورمت بٚدأ بو، ایجور کی اوشأنٚ جَا هر چی بٚخأستٚده اَشأنَ فأدأده. اَطؤیی بو کی اوشأن مصرٚ مأل و مینألَ خوشأنٚ اَمرأ بٚبردٚد.
37 هو شبٚ میأن بنی‌ایسرأییل رَمِسیسٚ جَا کوچ بوکوده، بوشؤده سوکوتٚ ور. اَشأنٚ آدم نفرأن جغرز زنأکأن و زأکأن شیشصد هیزأرتأ مردأی بوستیدی کی پیأده شؤئؤندوبود. 38 جٚه البأقی قومأنم اوشأنٚ میأن ایسأبود کی اَشأنٚ اَمرأ مصرٚ جَا بأمؤده بیرون. فرأوأن گله و چأرپأیم اَشأنٚ اَمرأ بوشؤده بیرون. 39 رأ میأن کی خوردنٚ وأسی بِئیسأده، جٚه هو فطیرٚ خمیر کی بأوٚرده بود، نأن بٚپختد. اَنٚ وأسی خوشأنٚ اَمرأ خمیرَ بأوٚرده بود چونکی مصرٚ جَا توندٚ تأکیدی اَمرأ بأمؤده بیرون و نأن پٚختنٚ رِه وخت نأشتیدی.
40 بنی‌ایسرأییل چأرصد و سی سأل مصرٚ میأن زٚندیگی بوکوده بو. 41 چأرصد و سی سألٚ آخری روجٚ میأن بو کی خوداوندٚ لشکرأن مصرٚ سرزیمینٚ جَا بأمؤده بیرون. 42 خوداوند مصرٚ سرزیمینٚ جَا اَشأنٚ سرأ دٚئنٚ رِه او شبَ اینتخأب بوکوده بو و ایسرأییلٚ مردوم وأستی تومأمٚ نتأجأنٚ میأن، کی خأطر بٚدأرٚد مصرٚ مردومٚ دٚسٚ جَا جیویشتده، همٚتأ سأل او شبٚ دورون خوداوندٚ رِه جشن بیگیرٚد.
پِسَحٚ عَیدٚ قأنونأن
43 بأزون خوداوند پِسَحٚ رسمٚ قأنونأنَ موسا و هارونَ اَطؤ بأمؤخته: «هیتأ غریبٚ آدم نوأستی پِسَحٚ بٚرّه گوشتٚ جَا بوخوره. 44 ولی او غولأم کی بیهه و سونَت بوبوسته بٚبه تأنه جٚه اون بوخوره. 45 او خیدمت کودن کس و او میهمأن کی یوهودی نییٚه نوأستی جٚه اون بوخورد. 46 هو خأنه دورون کی نیشتِیید تومأمٚ بٚره گوشتَ بوخورید. خأنه جَا نوأستی او گوشتَ بٚبرید بیرون. هیتأ اونی خأشأنَ نشکنید. 47 تومأمٚ ایسرأییلٚ مردوم وأستی اَ رسمَ انجأم بٚدد.
48 «اگه او غریبٚ آدمأن کی شیمی میأن زٚندیگی کونٚده و اَشأنٚ دیل خأیه کی خوداوندٚ رِه اَ رسمَ بٚدأرٚد، اَنٚ وأسی کی اَشأنَ وئأشته بٚبه کی شیمی مأنستَن اَ رسمٚ میأن بِئیسٚد، وأستی اَشأنٚ مردأکأن و پٚسرأن ختنه بٚبد. ولی اونی کی ختنه نوبوسته نوأستی هی زمأت بٚرّه قوربأنی گوشتٚ جَا بوخوره. 49 اَ جشنٚ تومأمٚ قأنونأن او غریبٚ آدمأنٚ شینم ایسٚه کی سونَت بوبوستده و شیمی میأن سأمأن دأرٚده.»
50 ایسرأییلٚ آدمأن تومأمٚ خودا دستورأنَ کی موسا و هارونٚ اَمرأ اَشأنَ فأدأ بوبوسته بویَ، بٚکأرَ گیفتد. 51 خوداوند هو روجٚ میأن تومأمٚ بنی‌ایسرأییلَ مصرٚ جَا بأوٚرده بیرون.
Currently Selected:
خروج ۱۲: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org