YouVersion Logo
Search Icon

ሮመ 5

5
አማኑዋን ቤትያ ሳሮተነ ስጋተ
1ሄዋ ድራዉ፥ ኑን አማኑዋን ጽሌዳዋን፥ ኑ ጎዳ የሱስ ክርስቶሳ ባጋና ኑዉ ጾሳና ሳሮተይ ደኤ፤ 2ቃይ እ ኑና ሀእ ኑን ደእያ ጾሳ አ ኬካተ ግዶ አማኑዋን አሄዳ፤ ያትና፥ ኑን ጾሳ ቦንቹዋ ሻካናዉ ኑዉ ደእያ ህዶታን ጬቀቴቶ።
3-4ሄዋ ጻላላ ግደና፤ ኑን ኑ ዋይያንካ ናሸቴቶ፤ አያዉ ጎፐ፥ ዋይያፐ ዳንዳያይ፥ ቃይ ዳንዳያፐ ፓጭያን ምንያዌ፥ ፓጭያን ምኖታፐ ህዶታይ ይያዋ ኑን ኤሬቶ። 5ጾሳይ ኑዉ እሜዳ ጌሻ አያና ባጋና ባረ ሲቁዋ ኑ ዎዛናን ጉሴዳ ድራዉ፥ ሄ ኑን ደማናዉ ናሸቻን ናግ ኡቴዳዌ ኑና ዬላየና።
6አያዉ ጎፐ፥ ኑን ብሮ ዎልቃይ ባይናዋንታ ግዲደ ደእሽን፥ ጾሳይ ዶሬዳ ዎዲ ጋክና፥ ክርስቶስ ናጋራንቻቱዋ ድራዉ ሀይቄዳ። 7ጽሎ ኡራ ድራዉ፥ እት ኡራይ ሀይቃናዌ ዳሮ መቶባ፤ ሽን ሎኦ አሳ ድራዉ ሀይቃናዉ፥ “ኤኖ” ግያ ኡራይ ኦን ኤር ቤተናን አገና። 8ሽን ኑን ብሮ ናጋራንቻ ግዲደ ደእሽን፥ ክርስቶስ ኑ ድራዉ ሀይቄዳ፤ ሄዌ ጾሳይ ኑና አይ ኬና ሲቅንቶነ አ ሲቁዋ ኤርሴ። 9ስም ኑን ሀእ አ ሱን ጽሌዳዋ ግዶፐ፥ አ ባጋና ጾሳ ሀንቁዋፐ አታና። 10አያዉ ጎፐ፥ ኑን ጾሳና ካሰ ሞርከ፤ ሽን አ ናኣ ሀይቁዋን አናና ስገቴዶ። ሄዋፐ አደ፥ ሀእ ኑን ጾሳና ስገቴዳዋፐ ጉይያን፥ እ ፓጻ ግድያ ድራዉ ኑና አሻና። 11ሽን ሄዋ ጻላላ ግደና፤ ሀእ ኑና ጾሳና ስገዳ ኑ ጎዳ የሱስ ክርስቶሳ ባጋና ኑና ጾሳባይ ናሸቼ።
ሀይቁ አዳማን ዪና፥ ደኡ ክርስቶሳን ዬዳ
12ሄዋ ድራዉ፥ ናጋራይ ሀ ሳኣ እት አሳ ባጋና ገሌዳ፤ ሄ ናጋራይ ባረናና ሀይቁዋ አሄዳ፤ ሄዋ ጋሱዋን፥ አሳይ ኡባይ አዳማ ባጋና ናጋራ ኦዳ ድራዉ፥ ሀይቁ አሳ ዛርያ ኡባ ጋኬዳ።#ዶመ 3:6 13ህጊ እመታናፐ ካሰ፥ ሀ አላምያን ናጋራይ ደኤ፤ ሽን ህጊ ባይና ዎደ ናጋራይ ፓይደተና። 14ሽን አዳማ ዎድያፐ፥ ሙሴ ዎድያ ጋካናዉ፥ ሀይቁ አሳ ኡባ ሞዴዳ፤ ሀራይ አቶ አዳም ጾሳ ህገዉ አዛዘተናን እጼዳዋዳን፥ ናጋራ ኦቤናዋንታካ ሀይቁ ሞዴዳ።
አያዉ ጎፐ፥ አዳም ያናዎ ሌምሱዋ። 15ሽን ጾሳ እሞታይ አዳማ ናጋራ ኬና ግደና ድራዉ፥ ኡንቱንቱ እት ማላ ግድክኖ፤ እት ብታንያ ናጋራ ድራዉ፥ ጮራ አሳይ ሀይቄዳዌ ቱማ፤ ሽን ጾሳ አ ኬካተይነ አ እሞታይ እት አሳ አ ኬካተ ባጋና፥ የሱስ ክርስቶሳ አ ኬካተ ባጋና ጮራ አሳዉ ዳሬዳ። 16ጾሳ እሞታይ ናጋራ ኦዳ ብታንያ ባጋና ዬዳዋ ማላ ግደና፤ አያዉ ጎፐ፥ አዳም እት ናጋራ ኦዳዋፐ ጉይያን፥ ጾሳይ አ ባይዜዳዋዳን ፕርዴዳ፤ ሽን አሳይ ዳሮ ናጋራ ኦዳዋፐ ጉይያን ጾሳይ፥ “ህንተንቱ ባይዝበይክታ” ጊደ፥ ባረ አ ኬካተ ኡንቱንታ በሴ። 17አያዉ ጎፐ፥ እት ብታንያ ናጋራ ጋሱዋን፥ አ ናጋራ ባጋና፥ ሀይቁ ካዉቴዳዌ ቱማ፤ ሽን እት ኡራይ፥ የሱስ ክርስቶስ ኦዳባይ አይ ኬና ዳሬ፤ ጾሳ ዳሮ አ ኬካተነ ጽሎተ እሞታ አክያ ኡባይ ክርስቶሳ ባጋና ጾኒደ ደአና።
18ስም እት ኡራይ ናጋራ ኦዳ ጋሱዋን አሳ ኡባ ቦላ ባይዜዳዋዳን ፕርዳይ ዬዳ። ሄዋዳንካ እት ኡራይ ጽሎባ ኦዳ ጋሱዋን፥ ጾሳይ አሳ ኡባ፥ “ባይዝበይክታ” ጊደ ኡንቱንቶ ደኡዋ እሜዳ። 19አያዉ ጎፐ፥ እት ኡራይ አዛዘተናን እጼዳ ጋሱዋን፥ ዳሮ አሳይ ናጋራንቻ ግዴዳ፥ ሀዋዳንካ ቃይ እቱ ኤኖ ጌዳዋን ጮራ አሳይ ጽላና።
20ናጋራ ዳርሳናዉ፥ ህጊ ዬዳ፤ ሽን ናጋራይ ዳርያ ዎደ ጾሳ አ ኬካተይ ሎይ ዳሬዳ። 21ናጋራይ ሀይቁዋ ዎልቃን ካዉቴዳዋዳን፥ ሀዋዳንካ ቃይ ጾሳ አ ኬካተይ ጽሎተ ዎልቃን ካዉቲደ፥ ኑ ጎዳ የሱስ ክርስቶሳ ባጋና፥ ኑና መና ደኦ ካለ።

Currently Selected:

ሮመ 5: DFBE

Highlight

Share

Compare

Copy

None

Want to have your highlights saved across all your devices? Sign up or sign in