ሮመ 4
4
አብራሃሞ አማኑዋን ጽሌዳ
1ያትና፥ ኑን ኑዉ አሹዋን ዛረ ግድያ አብራሃሞ አያ ደሜዳ ጋኔ? 2አያዉ ጎፐ፥ አብራሃሞ ኦሱዋን ጽሌዳዋ ግዶፐ፥ አዉ ጬቀትያባይ ደኤ፤ ሽን ጾሳ ስንን ጬቀታና ዳንዳየና። 3አያዉ ጎፐ፥ ጾሳ ማጻፋይ ዋጊ? “አብራሃሞ ጾሳ አማኔዳ፤ ጾሳይ ሄዋ አዉ ጽሎተን ፓይዴዳ” ያጌ።#ዶመ 15:6፤ ጋላ. 3:6
4ኦያ ኡራይ አክያ ሚሻ ባረዉ በስና አኬፐ አትን፥ አዉ ጮ እመትያዋዳን ፓይደተና። 5ሽን ኦሱዋ ኦናን፥ ናጋራንቻ ጽልስያ ጾሳ አማንያ ኡራ፥ ጾሳይ አ አማኑዋን አ ጽልሴ። 6ሀዋዳንካ፥ አይ ኦሱነ ባይናን፥ ጾሳይ ጽሉዋዳን ፓይዴዳ አሳ ናሸችያባ ዳዊተ ሃሳዬዳ ዎደ ጌዳዌ ሀዋ።
7“ጾሳይ ኡንቱንቱ ባይዙዋ
አቶ ጌዳዋንቱነ
ኡንቱንቱ ናጋራ ካሜዳዋንቱ
አንጀቴዳዋንታ።#ማዝ. 32:1-2
8ጎዳይ አ ናጋራ ፓይደና አሳይ
አንጀቴዳዋ”
ያጌ።
9ያትና፥ ሀ ዳዊተ ሃሳዬዳ አንጁ ቃጻረቴዳ አሳ ጻላላሴየ? ዎይ ቃይ ቃጻረትቤና አሳቱዋሴ? አያዉ ጎፐ ኑን፥ “ጾሳ ማጻፋይ፥ ‘አብራሃሞ ጾሳ አማኔዳ፤ ጾሳይ ሄዋ አዉ ጽሎተን ፓይዴዳ’ ያጌ” ጎይተ። 10ያትና፥ ሀዌ አዉደ ሀኔዴ? አብራሃሞ ቃጻረት ስምነየ? ዎይ ቃጻረታናፐ ካሰኔ? ቃጻረታናፐ ካሰናፐ አትን፥ ቃጻረትና ግደና።
11ጉየፐ እ ቃጻረቴዳ፤ ጾሳይ አ አማኑዋ ድራዉ፥ እ ቃጻረታናፐ ካሰ አ ጽሎ ኦዳዋ ኤርሳናዉ፥ አ ቃጻራይ ማላ ግዴዳ። ሄዌካ ቃይ ቃጻረተናን ጾሳ አማንያ ኡባቱዋ ጾሳይ ጽሎ ኦደ ፓይዳናዳን፥ ኡንቱንቶ አብራሃሞ አዉዋ ግዳናሳ።#ዶመ 17:10 12እ ቃጻረቴዳዋንቶካ አዉዋ፤ ግዶፐካ፥ ኡንቱንቱ ቃጻረቴዳ ድራሳ ግደና፤ ሽን ኑ አዉዋ አብራሃሞ ቃጻረታናፐ ካሰ አማንያ አማኑዋ ማላ ካልያዋንቶካ አዉዋ።
ጾሳይ እማና ጌዳባይ አማኑዋን አከቴ
13አብራሃሞስነ አ ዘረዉ ጾሳይ፥ “ሀ ሳኣ ታን ህንተንቶ እማና” ያጌዳዌ፥ አብራሃሞ ጾሳ አማኒደ ጽሌዳ ድራሳፐ አትን፥ ህገዉ እ አዛዘቴዳ ድራሳ ግደና።#ዶመ 17:4-6፤ 22:17-18፤ ጋላ. 3:29 14አያዉ ጎፐ፥ ህገዉ አዛዘትያዋንቱ ጾሳይ እማና ጌዳዋ ላትያዋንታ ግዶፐ፥ አሳ አማኑ ማደናባ ግዴዳ፤ ጾሳይ ጌዳዌካ መላ ግዴዳ፤ 15ህጊ ጾሳ ቦሻ አሄ፤ ሽን ህጊ ባይናሳን ህግያ መንያባይ ባዋ።
16-17ሄዋ ድራዉ፥ ህግያ ናግያዋንቱ ጻላላዉ ግደናን፥ ቃይ አብራሃሞ አማኔዳዋዳን፥ አማንያ አብራሃመ ዘረ ኡባዉ ጾሳይ እማና ጌዳዌ፥ ዎይታዳን ቱማታናዌ አማኑዋና። አብራሃሞ ኑዉ ኡባዉ አዉዋ። ጾሳ ማጻፋይ፥ “ታን ኔና ጮራ ካዉተቶ አዎ ኦድ” ግያዋዳን፥ ሀይቄዳዋንቶ ደኡዋ እምያ፥ ባረ አዛዙዋን ባይናባ ደእያባዳን ኦደ ጼስያ፥ እ አማኔዳ ጾሳ ስንን አብራሃሞ ኑዉ ኡባዉ አዉዋ።#ዶመ 17:5
18ጾሳ ማጻፋይ አብራሃሞ፥ “ነ ዘረይ ሀዋ ኬና ግዳና” ያጌዳዋዳን፥ ሀዋ ኬና ግዳና ጊደ፥ ናሸቻን ናጋናዉ ዳንዳየና ዎደ፥ አብራሃሞ አማኒደነ ስንፐ ደማና ጊደ፥ ናሸቻን ናጊደ፥ ጮራ ዘረዉ አዉዋ ግዴዳ።#ዶመ 15:5 19ሄ ዎደ፥ አብራሃሞ የለቶደፐ ጼቱ ላይ ኩማና ሀንያ ጭማ፤ ሽን ባረ ዳቡራንቻ አሳተነ ሳራ ናኣ የላናዉ ዳንዳየናዋ ቆፔዳ ዎደ፥ እ ባረ አማኑዋን ዳቡርቤና።#ዶመ 17:17
20-21ጾሳ እ ቦንቺደ፥ አዉ እማና ጌዳ ጾሳይ ቃይ ፖላናዉ ዳንዳይያዋ ሎይ ኤሪደ ባረ አማኑዋን ምኔዳዋፐ አትን፥ አማነናን እጺደ፥ ጾሳይ እማና ጌዳዋ ስቤና። 22ሄዋ ድራዉ፥ ጾሳይ ቃይ አ አማኑዋ ጽሎተን ፓይዴዳ።
23“አዉ ጽሎተን ፓይዴዳ” ግያ ቃላይ አ ጻላላዉ ጻፈትቤና። 24ሄ ቃላይ ኑ ጎዳ የሱሳ ሀይቁዋፐ ደንዳ ጾሳ አማንያ ኑዉካ ጽሎተን ፓይደታና ማላ ጻፈቴዳ። 25ጾሳይ አ ኑ ናጋራ ድራዉ፥ ሀይቆ አደ እምና፥ እ ኑና ጽልሳናዉ ሀይቁዋፐ ደንዴዳ።#ኢሳ. 53:4-5
Currently Selected:
ሮመ 4: DFBE
Highlight
Share
Compare
Copy
Want to have your highlights saved across all your devices? Sign up or sign in
The Word for the World Ethiopia
