ሮመ 1

1ባረ ምሽራቹዋ ቃላ ኦዳናዉ ጾሳይ ዶሪደ ጼሴዳ ክርስቶሳ የሱሳ ቆማይ፥ የሱስ ክርስቶስ ኪቴዳ ጳዉሎስ፥ ታን ሀ ዳብዳቢያ ጻፋይ።

2ጾሳይ ዳሮ ዎደፐ ካሰ ባረ ናባቱዋ ባጋና ምሽራቹዋ ቃላ እማና ያጌዳዌ ጾሳ ጌሻ ማጻፋቱዋን ጻፈቴዳ፤ 3ሄ ምሽራቹዋ ቃላይ አሳ ግዲደ ዳዊተ ዛርያፐ የለቴዳ ጾሳ ናኣ፥ ኑ ጎዳ የሱስ ክርስቶሳባ። 4ቃይ እ ባረ ጌሻ አያናን#1:4 ባረ ጌሻ አያናን፦ ዎይ “አን ደእያ ጌሻ አያና” ሀይቁዋፐ ደንዴዳዋን፥ ጾሳ ናኣ ግድያዋ ዎልቃማ ዎልቃን በሴዳ። 5አይሁዳ ግደና አሳይ ኡባይ አማናናዳንነ አዛዘታናዳን፥ ኑን ኡንቱንታ ካለና ማላ፥ ጾሳይ ክርስቶሳ ሱን ድራዉ፥ ክርስቶሳ ባጋና አ ኬካተነ የሱስ ኪቴዳዋንታ ግድያ ማታ ኑዉ እሜዳ። 6የሱስ ክርስቶሳዋ ግዳናዳን፥ ጾሳይ ጼሴዳ ህንተንቱካ ሄዋንቱ ግዶን ደኢታ።

7ጾሳይ ሲቅያዋንቶነ ጌሻባ ኦናዉ ጼሴዳ ሮመ ጋድያን ደእያ ኡባቶ ጾሳ ኑ አዉዋፐነ ጎዳ የሱስ ክርስቶሳፐ አ ኬካተይነ ሳሮተይ ህንተንቶ ግዶ።

ጋላታ ዎሳ

8ካሰታደ ታን ህንተንቱ አማኑ ሳኣ ኡባን ስሰቴዳ ድራዉ፥ የሱስ ክርስቶሳ ባጋና ህንተንቶ ታን ጾሳ ጋላታይ። 9-10አያዉ ጎፐ፥ ታን ኡባ ዎደ ታ ዎሳን ህንተንታ ሀሳይስያዎ፥ ጾሳይ፥ ታን አ ናኣ ምሽራቹዋ ቃላ ኦድያዋን ታ አያናን አዉ ኦያዌ ማርካ። ጾሳይ፥ ባረ ሸንያን፥ ታን ሀእ ህንተንቱኮ ባናዉ ታ ኦግያ ሚኮያናዳን፥ ኡባ ዎደ ዎሳይ። 11አያዉ ጎፐ፥ ታን ህንተንታ ምንሳናዉ፥ ህንተንቱና እትፐ አያና እሞታ ሻካና ማላ፥ ህንተንታ በአናዉ ላሞታይ። 12ታን ግያዌ፥ ህንተንቱካ ታካ እት ዎደ ምነታና። ህንተንቱ ታ አማኑዋን፥ ቃይ ታንካ ህንተ አማኑዋን ምነታና።

13ታናዳን አማንያዋንቶ፥ ታን ኡባ ዎደ ህንተንቱኮ ባናዉ ቆፓድ። ሽን ታና ድግያባይ ደእያዋ ህንተ ኤራናዉ በሴ፤ ታን ሀራይ አቶ አይሁዳ ግደና ሀራ አሳፐካ አይፍያ ደሜዳዋዳን፥ ህንተንቱፐካ አይፍያ ደማናዉ ኮያይ። 14ታን አሳ ኡባዉ፥ ግሪከ አሳዉነ ታማርቤና አሳዉ ቃይ አ ኤራንቻቶነ ኤያቶ ቃንጻና አጩ ደኤ።

15ሄዋ ድራዉ፥ ታዉ ዳንዳየቴዳ ኬናን ሮመን ደእያ ህንተንቶካ ምሽራቹዋ ቃላ ኦዳናዉ አሞታይ።

ምሽራቹዋ ቃላይ ጾሳ ዎልቃ

16ምሽራቹዋ ቃላይ ታና ዬላየና፤ እ አማንያ ኡባ፥ ካሰቲደ አይሁዳ አሳ ቃይ አይሁዳ ግደና አሳ አሻናዉ ጾሳፐ ይያ ዎልቃ። 17አያዉ ጎፐ፥ ጾሳ ማጻፋይ፥ “ጽሉ ጾሳን አማነቲደ ደአና” ያግያዋዳን፥ ጾሳይ አሳ ኮይሮፐ ዉርሰ ጋካናዉ፥ አማኑዋን ጽልስያዋ ምሽራቹዋ ቃላይ ቆንጭሴ።#እምባ. 2:4

አሳ ኢታ ኦሱዋ

18ቱማተይ ኤረታናዋ ባረንቱ ኢታ ሀኖታን ድግያ ናጋራ ኦሱዋ ኡባ ቦላንነ አሳ ኢታ ኦሱዋ ኡባ ቦላን፥ ጾሳ ሀንቁ ሳሉዋፐ ዎደ ቆንጫና። 19ኡንቱንቱ ጾሳባ ኤራና ዳንዳይያዌ ኡንቱንቶ ቆንጬ፤ አያዉ ጎፐ፥ ጾሳይ ኡንቱንቶ ቆንጭሴዳ። 20ቤተና አ ሀኖታይ፥ ሄዌካ አ መና ዎልቃይነ አ ጾሳተይ እትፐ ጾሳይ ሀ አላምያ መዳዋፐ ዶሚደ፥ ኡንቱንቶ ቆንጪደ ቤቴዳ፤ ኡንቱንቱ ሄዋ ጾሳይ መዳባፐ በአናዉ ዳንዳይያ ድራዉ፥ ኡንቱንቶ ጋሶይያባይ ባዋ።

21አያዉ ጎፐ፥ ኡንቱንቱ ጾሳ ኤሮፐካ፥ አዉ በስያ ቦንቹዋ እምበይክኖ፤ ቃይ አ ጋላትክኖ። ሽን ኡንቱንቱ አላለ ከሰናባ ቆፒኖ፤ ቃይ ኡንቱንቱ አኬከና ዎዛናይ ሜዳ። 22ኡንቱንቱ ባረንታ አዳ ኤራንቻ ጊኖ፤ ሽን ኡንቱንቱ ኤያ። 23ኡንቱንቱ ሀይቀና ጾሳዉ ጎይንያዋ እጺደ፥ ሀይቂያ አሳ መታ፥ ካፋቱዋ መታ፥ ዶአቱዋ መታነ ትራን ጎሸትያዋንቱ መታ መቴዳዋንቶ ጎይኔድኖ።#ዛረ. 4:16-18

24ሄዋ ድራዉ፥ ኡንቱንቱ እቱ እቱዋና ፖኮባ ኦና ማላ፥ ጾሳይ ኡንቱንቱ ዎዛናይ አሞትያ ቱናባ ኦናዳን ኡንቱንታ አጌዳ። 25አያዉ ጎፐ፥ ኡንቱንቱ ጾሳ ቱማተ ዎርዱዋን ላሜድኖ፤ ቃይ መዳ ጾሳ አጊደ፥ እ መዳባዉ ጎይኔድኖነ ኦድኖ። ጾሳይ መናዉ ጋላተቴዳዋ። አመንእ።

26ሄዋ ድራዉ፥ ጾሳይ ኡንቱንቱ ፖኮባ አሞታና ማላ፥ ኡንቱንታ አጌዳ፤ ሀራይ አቶ ኡንቱንቱ ማጫዋንቱ ባረንቶ በስያዋ አጊደ፥ በሰናዋ ሀኔድኖ። 27ሀዋዳንካ፥ አቱማ አሳይ ቃይ ባረንቶ በስያዋዳን ማጫዋንቱና ጋከትያዋ አጊደ፥ እቱ እቱዋና ጋከታናዉ ኮዬድኖ፤ አቱማ አሳይ እቱ እቱዋና ፖኮባ ኦደ፥ ባረንቱ ኦዳ ባላን ባረንቶ በስያ ፕርዳ አኬድኖ።

28ኡንቱንቱ ጾሳ ኤራናዉ ዶሰናን እጼዳዋ ኬና ጾሳይ ኡንቱንቱ በሰናዋ ኦና ማላ፥ ኡንቱንቶ ፓና ቆፋ እሜዳ። 29ኡንቱንቱን ቱናተይ፥ ኢታተይ፥ ዮራተይነ ኢታ ሀኖታይ ኩሜዳ፤ ቃይ ኡንቱንቱን ቃናቲ፥ ሸምፑዋ ዎያ ቆፋይ፥ ፓሉማይ፥ ጭሙሳይነ ኢታ ቆፋይ ኩሜዳ፤ ቃይ ኡንቱንቱ ሶቅያዋንታ፥ 30ዝግርያዋንታ፥ ጾሳ እጽያዋንታ፥ ቦርያዋንታ፥ ኦቶረትያዋንታ፥ ጬቀትያዋንታ፥ ኢታባ ኦናዉ ኮይያዋንታነ ባረንቱ አዎነ አትዉ አዛዘተናዋንታ፥ 31ቆፋይ ባይናዋንታ፥ አማኑ ባይናዋንታ፥ ሀራንቶ ቃረተናዋንታነ ማረናዋንታ። 32ኡንቱንቱ ሀዋንቱ ማላ ኦያዋንቶ ሀይቁ በሴ ግያ ጾሳ ህግያ ኤሪደ፥ ሀዋንታ ኦኖ፤ ሄዋ ጻላላ ግደናን፥ ሀዋንታ ኦያዋንታካ ኦተ ጊደ ምንሲኖ።

Currently Selected:

ሮመ 1: DFBE

Highlight

Compare

Copy