ፓይዱዋ 14

አሳ ማካላ

1ሄ ጋላሳ ቃማ ማባራይ ኡባይ ባረንቱ ቃላ ቂሲደ ዬኬድኖ። 2እስራኤልያ አሳይ ኡባይ ሙሴ ቦላነ አሮና ቦላ ዙዙሜድኖ። ማባራይ ኩመንይ ኡንቱንታ፥ “ኑን ግብጼ ጋድያን ደኢደ ሀይቄዳዋ ግዴሮኮ! ዎይ ኑን ሀ መላ ቢታን ሀይቄዳዋ ግዴሮኮ! 3ማሻን ኑና ዎ ዉርሳናዉ መና ጎዳይ ሀ ቢታ ኑና አያዉ አሂ? ኑ ማቼቱነ ኑ ናናይ ኦሞደታና። ሄዋፐ ጉየ ግብጼ ቢታ ስምያዌ ኑዉ ኬከኔየ?” ያጌድኖ። 4ቃይ ኡንቱንቱ እቱ እቱዋ፥ “ኑን ካለያዋ ዶሪደ፥ ጉየ ግብጼ ስሜቶ” ያጌድኖ።

5ሙሴነ አሮን ሄዋን ሺቄዳ እስራኤልያ አሳ ማባራ ኡባ ስንን ሶምኡዋ ሳኣን ጋደ ጉፋኔድኖ። 6ሄ ቢታ ዎቼዳ አሳቱ ግዶፐ ኔዌ ናአይ ኢያሱነ ይፉነ ናአይ ካሌብ ባረንቱ ማዩዋ ፔድኖ። 7እስራኤልያ አሳ ማባራ ኡባዉ፥ “ኑን ካን ከሲደ ዎቼዳ ቢታይ ሎይ ዳሮ ሎአ። 8መና ጎዳይ ኑናን ናሸትያዋ ግዶፐ፥ ማይነ ኤሳይ ጎግያ ሄ ቢታዉ ኑና እ ገልሳና፤ ሄ ቢታ ኑዉ እ እማና። 9ሄዋ ድራዉ፥ መና ጎዳ ቦላ ማካላ ማካሎፕተ። ሄ ቢታ አሳዉ ያዮፕተ፤ ኡንቱንቱ ኑዉ ሃ ኡሻካ ጋክክኖ። ኡንቱንቶ አምቦምያዌ ባዋ፤ ሽን መና ጎዳይ ኑናና ደኤ። ህንተ ኡንቱንቶ ያዮፕተ!” ያጌድኖ።#እብራ. 3:16 10ማባራይ ኡባይ ኡንቱንታ ሹቻን ጫዳናዉ ሃሳዬድኖ።

ሄ ዎደ መና ጎዳ ቦንቹ ጋከትያ ዱንካንያን እስራኤልያ አሳ ኡባዉ ቆንጬዳ። 11መና ጎዳይ ሙሳ፥ “ሀ አሳይ አዉደ ጋካናዉ ታና ካኔ? ታን ኡንቱንቱ ግዱዋን ኦዳ ማላታ ኡባ በኢደ፥ አዉደ ጋካናዉ ኡንቱንቱ ታናን አማነናን እጻኔ? 12ታን ኡንቱንታ ኢታ ሀርግያን ሾጫደ ይሳና፤ ያታደ ታን ኔና ኡንቱንቱፐ ዳርያነ ምንያ ካዉተዉ አዉዋ ኦና” ያጌዳ።

ሙሴ አሳ ድራዉ ዎሴዳ

13ሙሴ መና ጎዳ ሀዋዳን ያጊደ ዎሴዳ፤ “ኔን ነ ዎልቃን ሀ አሳ ግብጼፐ ፑደ ከሴዳዋ ኤርያ ግብጼቱ ሀዋ ስሶፐ፥ ኡንቱንቱ ዋጋኔ?#ከሳ 32:11-14 14ኡንቱንቱ ሀ ጋድያን ደእያዋንቶካ ሄዋ ኦዳና። አቤት መና ጎዳዉ፥ ኔን ሀ አሳ ግዱዋን ደእያዋ ኡንቱንቱ ስሴድኖ። አቤት መና ጎዳዉ፥ ኑን ኔና በኤዳዋ ኡንቱንቱ ኤሬድኖ፤ ነ ሻሪ ኡንቱንቱፐ ቦላና ታክያዋነ ጋላስ ሻርያ ቱሳን፥ ቃማ ታማ ቱሳን ኔን ኡንቱንቱ ስንን ብያዋ በኤድኖ። 15ሀእ ኔን ሀ አሳ ኡባ እት ኩን ዎያዋ ግዶፐ፥ ነ ካሰ ኦዳዋ ስሴዳ ካዉተቱ፥ 16መና ጎዳይ ሀ አሳ፥ ‘ህንተዉ እማና ጊደ ጫቄዳ ቢታ ኡንቱንታ አፋናዉ ዳንዳይቤና ድራዉ፥ መላ ቢታን ኡንቱንታ ዎዳ’ ያጊደ ሃሳያና።

17-18“ሄዋ ድራዉ፥ ጎዳዉ፥ ኔን ነ ዎልቃ ኑና በሳ፤ ኔን ጋደ፥ ‘መና ጎዳይ ዳንዳያንቻነ አገና ሲቁዋን ኩሜዳዋ፤ ናጋራነ ማካላ አቶ ግያዋ፤ ግዶፐነ፥ ባይዛንቻ ሙረናን አገናዋ፤ አዎቱዋ ናጋራ ድራዉ ናናቱዋ ሄዘንነ ኦይደን የለታ ጋካናዉ ሙርያዋ’ ጋደ ኦዳ ዎዳዋ ፖላ።#ከሳ 20:5-6፤ 34:6-7፤ ዛረ. 5:9-10፤ 7:9-10 19ሀ አሳይ ግብጼፐ ከሶደፐ ዶማደ ሀች ጋካናዉ ኔን አቶ ጌዳዋዳን፥ ነ አገና ሲቁዋ ዳሩዋን ሀ አሳ ናጋራ አቶ ጋርኪ!” ያጌዳ።

20መና ጎዳይ ሙሳ፥ “ኔን ኦቼዳዋዳን ታን ኡንቱንቶ አቶ ጋድ። 21ሽን ታ ደኡዋን ጫቃይ፤ መና ጎዳ ቦንቹ ሳኣ ኡባ ኩምያዋዳን፥#እብራ. 3:18 22-23ሀ አሳፐ እቱነ ሄ ቢታ በኤና። ታ ቦንቹዋነ ግብጼ ቢታንነ መላ ቢታ ታን ኦዳ ማላታ ሀ አሳቱ በኤድኖ፤ ሽን ኡንቱንቱ ታሙ ገደ ታና ፓጬድኖነ ታ ቃላ ስሰናን እጼድኖ። ሄዋ ድራዉ፥ ታን ኡንቱንቱ ማይዛ አዋቶ እማና ጋደ ጫቄዳ ቢታ ታና ካዳዋንቱፐ እቱነ ሙለካ በኤና። 24ሽን ታ ቆማይ ካሌብ ኡንቱንቱፐ ዱማትያ ድራዉነ እ ታና ፖሎ ዎዛናፐ ካሌዳ ድራዉ፥ ታን እ ካሰ ቤዳ ቢታ አ ጋና፤ አ ዘረይ ሄ ቢታ ላታና።#ኢያሳ 14:9-12 25ሽን ሀእ አማሌቃቱነ ካናነቱ ዛንጋራን ደእያ ድራዉ፥ ዎንት ጉየ ስሚደ፥ ዞኦ አባኮ አፍያ ኦግያ ኦይቂደ መላ ቢታ ቢተ” ያጌዳ።

ጾሳይ ዙዙሜዳ አሳ ሙሬዳ

26ቃይ መና ጎዳይ ሙሳነ አሮና ሀዋዳን ያጌዳ፤ 27“ሀ ኢታ አሳይ ታ ቦላ አዉደ ጋካናዉ ዙዙማኔ? ታን እስራኤልያ አሳ ዙዙን ኡባ ስሳድ። 28ሄዋ ድራዉ፥ ኔን ኡንቱንቶ ሀዋዳን ያጋደ ኦዳ፤ ‘ታ ደኡዋን ጫቃይ፤ ታን ህንተ ሃሳይሽን ታ ሀይን ስሴዳዋ ህንተንቶ ኦና። ታን መና ጎዳይ ሄዋ ኦዳይ። 29ህንተ አሃይ ሀ መላ ቢታን ኩንዳና፤ አያዉ ጎፐ፥ አሳ ፓይድያ ዎደ ፓይደቴዳ ላታሙ ላይነ ሄዋፐ ቦላና ደእያ አሳይ ኡባይ ታ ቦላ ዙዙሜድታ።#እብራ. 3:17 30ይፉነ ናኣ ካሌባፐነ ኔዌ ናኣ ኢያሱፐ አትና፥ ህንተፐ ኦንነ ታን ህንተና ዎናዉ ጫቄዳ ሄ ቢታ ገለና። 31ህንተ፥ “ኑ ናናይ ኦሞደታና” ጌዳ ህንተ ጉ ናናቱዋ ሄ ህንተ ካዳ ቢታ ገልሳና፤ ቢታይካ ኡንቱንቱሳ ግዳናዋ። 32ሽን ህንተና ግዶፐ፥ ህንተ አሃይ ሀ መላ ቢታን ኩንዳና። 33ህንተ አማነትቤና ድራዉ፥ ህንተ ዉርሰ አሃይ ሀ መላ ቢታ ዉላና ጋካናዉ፥ ህንተ ናናይ ዋየቲደ፥ ሀ መላ ቢታ ኦይታሙ ላይ ሄንንቻ ግዲደ ዩያና።#ኪታ 7:36 34ህንተ ሄ ቢታ ዎቼዳ ሄ ኦይታሙ ጋላሳ ፓይዱዋን፥ እት ጋላሳዉ እት ላይ፥ ሄዌነ፥ ኦይታሙ ላይዉ ህንተ ናጋራ ድራዉ ህንተ ዋየታና፤ ታን ህንተ ቦላ ደንድያዋ ህንተ ኤራና’ ያጋ ኦዳ። 35ታን መና ጎዳይ ሀዋ ኦዳይ። ታ ቦላ ሺቅ ኡቴዳ ሀ ኢታ ማባራ ቦላ ሀዋዳን ቱሙ ኦና: ኡንቱንቱ ሀ መላ ቢታን ዉራና፤ ሀዋን ኡንቱንቱ ሀይቃና” ያጌዳ።

36ሄ ቢታ ዎቻና ማላ፥ ሙሴ ኡንቱንታ ኪትና ቢደ ስሜዳ አሳቱ፥ ሄ ቢታ ኢታ ኦዱዋ ኦዲደ፥ ሙሴ ቦላ አሳይ ኡባይ ዙዙማና ማላ ኦዳዋንቱ፥ 37ሄ ኢታ ኦዱዋ ኦዴዳ አሳቱ፥ መና ጎዳ ስን ቦሻን ሀይቄድኖ። 38ሄ ቢታ ዎቻናዉ ቤዳ አሳቱዋፐ ይፉነ ናአይ ካሌብነ ኔዌ ናአይ ኢያሱ ጻላላይ ፓጻ አቴድኖ።

እስራኤልያ አሳይ ቢታ ቦላ ዎራጃናዉ ኮይሮ ደንዴዳ

(ዛረ. 1:41-46)

39ሙሴ ሀዋ እስራኤልያ አሳዉ ኡባዉ ኦዴዳ ዎደ፥ አሳይ ሎይ ዬኬዳ። 40ዎንተ ጋላስ ዎንታ ጉራን ኡንቱንቱ ደንዲደ፥ ፑደ ገዘ ቢታ ከሲደ፥ “ኑን ናጋራ ኦዶ፤ ሽን ሀእ ጾሳይ ኑዉ እማና ጌዳ ሳኣ ፑደ ከሳና” ያጌድኖ።

41ሽን ሙሴ ኡንቱንታ፥ “መና ጎዳ አዛዙዋ ህንተ አያዉ መንቴ? ህንተዉ ሀነና። 42መና ጎዳይ ህንተናና ደኤና ድራዉ፥ ፑደ ከሶፕተ፤ ህንተ ሞርከቱ ህንተና ጾናና። 43አማሌቃ አሳቱዋናነ ካናነ አሳቱዋና ህንተ ኦለታና፤ ህንተ ማሻን ሀይቃና። መና ጎዳፐ ህንተ ዎራ ስሜዳ ድራዉ፥ መና ጎዳይ ህንተናና ደኤና” ያጌዳ።

44ሽን ኡንቱንቱ መና ጎዳ ጫቁዋ ታቦታይነ ሙሴነ ዱንካኔዳ ሳኣፐ ደንዳና ዮፐካ፥ ገዘ ቢታ ከሳናዉ ጻሊደ ደንዴድኖ። 45ገዘ ጋድያን ደእያ አማሌቃ አሳቱነ ካናነ አሳቱ ዎደ ኡንቱንቱ ኦላይ ጾኒደ፥ ሆርማ ጋካናዉ ኡንቱንታ የደርሴድኖ።

Currently Selected:

ፓይዱዋ 14: DFBE

Highlight

Copy

Compare