ኢያሳ 7

አካና ናጋራ

1እስራኤልያ አሳይ ጾሳዉ አማነተናን እጺደ፥ ጺነ ግ ዎዳባፐ አኬዳ። ሄዋ አኬዳዌ አካና፤ አካን ካርማ ናኣ፤ ካርም ዝምራ ናኣ፤ ዝምር ይሁዳ ዛርያ ግዴዳ ዛራሀ ናኣ። ያትና፥ ጾሳ ሀንቁ እስራኤልያ አሳ ቦላ ኤጼዳ።

2ኢያሱ ያርኮን ደኢደ ቤቴለ ካታማፐ አዋይ ዶልያ ባጋና ቤት-አዌና ግያሳ ማታን ደእያ አይ ጌተትያ ካታማ አሳ ኪቲደ፥ “ቢተ፤ ሄ ቢታ ጌድተ” ያጌዳ። አሳቱ ቢደ፥ አይ ካታማ ጌዴድኖ።

3ጌዴዳ አሳቱ ኢያሱኮ ስም ዪደ፥ “ኡባ አሳይ አይ ካታማ ኦላናዉ ባና ኮሸና፤ ላኡ ዎይ ሄዙ ሻአ አሳ የዳ። ያን አማሬዳ አሳይ ደእያ ድራዉ፥ አሳይ ኡባይ ዳቡሮፖ” ያጌድኖ። 4ያትና፥ ሄዙ ሻአ ግድያ አሳቱ ኦለታናዉ አይ ካታማ ቤድኖ። ሽን ኡንቱንቱ አይ ካታማ አሳ ስንፐ ባቃቴድኖ። 5አይ ካታማ ድርሳ ፐንግያፐ ዶሚደ፥ ሹቻ ቆእያ ሳኣ ጋካናዉ እስራኤልያ አሳ የደርሴድኖ፤ ደርያ ዱገን ሀታማነ ኡሱፑን ግድያ አሳ ዎድኖ። ሄዋን አሳ ዎዛናይ ኮልዲደ፥ ሃ ከሴዳ።

6ሄዋፐ ጉይያን ኢያሱ ካዮቲደ፥ ባረ ማዩዋ ፔደ ጾሳ ታቦታ ስንን ኦማርስ ጋካናዉ ጉፋኔዳ። እስራኤልያ ጭማቱካ አዋዳን ሀኔድኖ፤ ባረንቱ ሁጲያንካ ባና ቆሌድኖ። 7ሄዋፐ፥ ኢያሱ ሀዋዳን ያጌዳ፤ “ሀይ ፖራ! ኡባ ሞድያ ጾሳዉ፥ ኑና አሞረ አሳዉ አ እማደ ዉርስሳናዉ አያዉ ዮርዳኖሳ ሻፋ ፕን አሃድ? ኑን ዮርዳኖሳ ሻፋፐ ሄፍን ባጋን አቴዶ ግዴሮኮ! 8አቤት ጎዳዉ፥ እስራኤልያ አሳይ ጾነቲደ፥ ባረ ሞርከቱዋ ስንፐ ባቃቶፐ፥ ታን ዋጎ? 9ካናነቱነ ሀ ቢታን ደእያ አሳይ ኡባይ ሀ የዉዋ ስሲደ፥ ኑና ዶዳናዋንታ፤ ጋድያፐካ ይሳናዋንታ። ስም፥ ነ ዎልቃማ ሱንዉ ኔን ኦያባይ አዬ?” ያጌዳ።

10ጾሳይ ኢያሳ፥ “ደንዳ ኤአ! ሀዋዳን አያዉ ጉፋናድ? 11እስራኤልያ አሳይ ናጋራ ኦዳ፤ ታን ኡንቱንቱና ጫቀቴዳ ታ ጫቁዋ አድኖ። ኡንቱንቱ ማጋራ ጌተቴዳ ሚሻቱዋፐ አኬድኖ፤ ዉኤድኖ፤ ዎርዶቴድኖ። ቃይ ሄ ሚሻ ኡንቱንቱ ባረንቱ ሚሻና ጋ ዎድኖ። 12ሄዋ ድራዉ፥ እስራኤላቱ ባረንቱ ሞርከቱዋ ስንን ኤቃናዉ ዳንዳይክኖ። ኡንቱንቱ ያናዉ በስያ ድራዉ፥ ባረንቱ ሞርከቱዋ ስንፐ ባቃቴድኖ። ማጋራ ጌተቴዳ ሚሻ ህንተንቱ ማታን ደእያዋ ህንተንቱ ይሳና ዮፐ፥ ሀዋፐ ስንዉ ታን ህንተንቱና ግድከ።

13“ደንዳ፤ አሳ ጌሻ። ኡንቱንቶ ሀዋዳን ያጋደ ኦዳ፤ ‘ዎንትዉ ህንተንቱ ሁጲያዉ ጌይተ። ጾሳይ እስራኤልያ ጾሳይ ህንተንታ፤ “እስራኤላቶ፥ ማጋራ ጌተቴዳ ሚሻይ ህንተንቱ ማታን ደኤ። ህንተንቱ ሄ ሚሻ ህንተንቱ ማታፐ ድጋና ጋካናዉ፥ ህንተንቱ ሞርከቱዋ ስንን ኤቃናዉ ዳንዳይክታ” ያጌ። 14ዎንታ ጉራ፥ ህንተንቱ ዛርያን ዛርያን ሺቅና ጾሳይ፥ “ሀዋ” ጌተትያ ዛሪ፥ ባረ ያራን ያራን ሺቃና፤ ቃይ ጾሳይ፥ “ሀዋ” ግያ ያራይ ባረ ሶ አሳን አሳን ሺቃና፤ ቃይ ጾሳይ፥ “ሀዋ” ግያ ሶ አሳይ እት እት አሳይ ታራን ታራን ሺቃና። 15ሄዋፐ ጉይያን ማጋራ ጌተቴዳዋና ኦይቀቴዳ አሳይ፥ ባረዋ ኡባና ታማን ጹገታና። አያዉ ጎፐ፥ ጾሳ ቃላ ጫቁዋ እ አደ፥ እስራኤልያ አሳ ግዶን ካዉሻባ ኦዳ’ ያጋ” ያጌዳ።

16ኢያሱ ዎንተ ጋላስ ጉራን ደንዲደ፥ እስራኤልያ አሳ ዛርያን ዛርያን ሺሽና ይሁዳ ዛሪ አከቴዳ። 17ይሁዳ ዛሪ ሺቅና፥ ዛራሀ ያራይ አከቴዳ፤ ዛራሀ ያራይ ሺቅና፥ ዝምራ ሶ አሳይ አከቴዳ። 18ዝምራ ሶ አሳይ ሺቅና፥ ዉርሰን ዝምራ ናኣ ናአይ፥ ካርማ ናአይ አካን አከቴዳ። 19ሄዋፐ፥ ኢያሱ አካና፥ “ታ ናአዉ፥ ጾሳ እስራኤልያ ጾሳ ቦንቻ፤ አ ጋላታ። አነ ኔን ኦዳዋ ታዉ ቆሰናን ኦዳ” ያጌዳ።

20ሄዋፐ ጉየ አካን ኢያሳ፥ “ኤ ቱማ! ታን ጾሳ እስራኤልያ ጾሳ ናቃድ። ታን ኦዳዌ ሀዋ: 21ኑን ኦሞዴዳ ሚሻ ግዶን ታን እት ሎእያ ባብሎነ ጋድያ ካባ፥ ላኡ ጼቱ ጻጋራ ብራነ ባጋ ኪሎ ግድያ ዎርቃ በኣድ፤ አካናዉ አሞቴዳ ድራዉ አካድ። ያታደ ታ ዱንካንያ ግዶን ቢታ ጋርሳን ቆሳድ፤ ብራይካ ኡባፐ ጋርሳና ደኤ” ያጌዳ።

22ኢያሱ አሳ ኪትና፥ ኡንቱንቱ ዱንካንያ ዎጺደ ገልያ ዎደ፥ ዱንካንያ ግዶን ሚሻ ቆስ ዎዳዋ ደሜድኖ፤ ብራይካ ሚሻቱዋፐ ጋርሳና ደኤ። 23ኪተቲደ ቤዳ አሳቱ ሚሻ ዱንካንያ ግዶፐ አኪደ፥ ኢያሱኮነ እስራኤልያ አሳ ኡባኮ አሄድኖ፤ ጾሳ ስንን ዎድኖ።

24ሄዋፐ ጉይያን ኢያሱነ እስራኤልያ አሳይ ኡባይ አካና ብራ፥ ካባ፥ ዎርቃ፥ አ አቱማ ናናነ ማጫ ናና፥ አ ሚዛ፥ ሀረቱዋነ ዶርሳቱዋ፥ አ ዱንካንያነ አዉ ደእያዋ ኡባ አኪደ፥ መቱዋ ዎምባ ግያሳ አሄድኖ። 25ኢያሱ አካና፥ “ሀ መቱዋ ኑ ቦላ አያዉ አሃድ? ጾሳይ ሀቼ ነ ቦላካ መቱዋ አሀና” ያጌዳ።

እስራኤልያ አሳይ ኡባይ አካናነ አ ሶ አሳ ሹቻን ጫድ ዎደ፥ አዉ ደእያዋ ኡባ ታማን ጹጌዳ። 26ኡንቱንቱ አካና ቦላን ሀቼ ጋካናዉ ደእያ ዳሮ ሹቻ ኬሌድኖ። ያትና፥ ጾሳይ ባረ ኤጽያ ሀንቁዋ ዛሬዳ። ሀቼ ጋካናዉ ሄ ሳአይ መቱዋ ዎምባ ጌተቴዳዌ ሀዋሳ።

Currently Selected:

ኢያሳ 7: DFBE

Highlight

Copy

Compare