ሆሰ 13

እስራኤልያ ዉርሰ ፕርዳ

1ኤፍሬማ አሳይ ሃሳዬዳ ዎደ፥ ስሴዳ አሳይ ያሻዉ ኮኮሬዳ፤ እስራኤልያ ጋድያን ኡንቱንቱ ቦንቼቴዳ አሳ። ሽን ባኣላ ግያ ኤቃዉ ጎይኔድኖ፤ ሄ ባይዙዋ ጋሱዋን ሀይቄድኖ። 2ሀእካ ናጋራ ቦላ ናጋራ ኦኖ፤ ቃይ ባረዉ ጎይናናዉ፥ ሲልሲደ ምስለቱዋ መኖ። ሄ ምስለቱ ሂላን ብራፐ መቴዳዋንታ፤ ኡንቱንቱ ኡባይካ ኩሽያ ሂላይ መዳዋንታ። ኡንቱንቱዋ አሳይ ሃሳዪደ፤ “አሳ ያርሹዋ ያርሽተ፤ ሀ ማራ ምስልያካ የርተ” ያግኖ። 3ሄዋ ሀዳን ኡንቱንቱ ዎንታ ሻርያ ማላ፥ ዎይ ጉራን ቆለትያ ዎንታ ከተርሳ ማላ ዎይ ጫርኩ ኡዱማፐ ደንደ አፍያ ሱላ ማላ ዎይ ማስኮትያና ከስያ ፔኑዋ ማላ ግዳናዋ።

4ጾሳይ ሀዋዳን ያጌ፤ “ታን ህንተና ግብጼ ጋድያፐ ከሳደ አሄዳ መና ጎዳ ህንተ ጾሳ። ህንተ ታፐ አትና፥ ሀራ ጾሳ ኤርክታ፤ አሽያዌካ ታፐ አትና፥ ሀራይ ባዋ። 5መላ ቢታን፥ መላ ጋድያን ታን ህንተና ናጋድ።#ዛረ. 8:11-17 6ታን ህንተና ምዝና፥ ሚደ ካሌድታ፤ ካሊደ ኦቶረቴድታ፤ ሄዋፐ ጉይያን፥ ታና ዶጌድታ። 7ሄዋ ድራዉ፥ ታን ህንተ ቦላ ጋሙዋ ማላ ግዳናዋ፤ ቃይ ማህያዳን፥ ኦግያ ዶናን ዙጋና። 8ማራቱዋ ዎ አኬዳ ማሀቲዳን፥ ታን ህንተናና ጋከታና፤ ህንተና ዳከሬና። ቃይ ታን ህንተና ጋሙዋዳን ያን ማና፤ ባዙዋ ዶኣዳን፥ ህንተና ፖሸረና።

9“እስራኤልያ አሳቶ፥ ህንተ ታ ቦላ፥ ህንተና ማድያዋ ቦላ ሞርከተን ደንድያ ድራዉ፥ ታን ህንተና ይሳና። 10ህንተ ታና፥ ‘ኑዉ ካትያነ ጋድያ ሞድያዋንታ እማ’ ያጊደ ኦቼድታ። ህንተና አሻናዉ ህንተ ካቲ አኔ? ህንተ ጋድያ ሞድያዋንቱ ህንተ ካታማቱዋ ግዶን ሀቃን ደኢኖ?#1 ሳሜላ 8:5-6 11ታን ታ ሀንቁዋን ህንተንቶ ካትያ እማድ፤ ታ ይሉዋን አ ድጋድ።#1 ሳሜላ 10:17-24፤ 15:26

12“ኤፍሬማ ባይዙነ ናጋራይ ጻፈቲደ፥ ማዝጎባ ጎልያን ኡቴዳ። 13የሉ ኦይቄዳ ምሽራታ ቱጋትያዋ ማላ ቱጋይ አ ቦላ ያና። ሽን እ ኤር ባይና ናኣ፤ አያዉ ጎፐ፥ እ የለትያ ዎዲ ጋክና፥ ባረ ዳይ ኡሉዋፐ ዎናን እጽያ ናኣ ማላ። 14ኡንቱንታ ታን ዱፉዋፐ አሻና፤ ሀይቁዋ ዎልቃፐካ ዎዛና። ሀይቆ፥ ነ ኢታ ሀርገቱ ሀቃነ? ዱፎ፥ ነ ባሻይ ሀቃነ?#1 ቆሮ. 15:55

“ታን ታ አሳዉ ቃረትከ። 15ኤፍሬመ ባረ እሻቱዋ ግዶን ምንንቶካ፥ መና ጎዳይ የዴዳ አዋይ ዶልያ ባጋ ጫርኩ መላ ቢታፐ ጫርኪደ ያና። አ ፑልቶቱ ቶአና፤ አ ሃ ኦላቱካ መላና። እ ምንጅያ ጎለቱዋን ደእያ አልኦ ሚሻ ኡባይ ቦንቀታናዋ። 16ሳማርያ አሳይ ባረንቱ ጾሳ ቦላ ማካሌዳ ድራዉ፥ ባረንቱ ባይዙዋ ሙራ አካናዉ በሰ። ኡንቱንቱ ማሻን ቡሳከታና፤ ኡንቱንቱ ጉ ናናይካ ክንቼታና፤ ኡንቱንቱ ሻሃራ ማጫ አሳቱዋ ኡሉካ ጳልቀታና” ያጌ።

Currently Selected:

ሆሰ 13: DFBE

Highlight

Copy

Compare