ሆሰ 12

1ኤፍሬማ አሳይ ዎንታፐ ኦማርስ ጋካናዉ ኦያባይ ኡባይ፥ አዋይ ዉልያ ባጋፐ ይያ ጫርኩዋ ኩጭያዋዳን ዎይ የደርስያዋ ማላ ጎኤና። ኡንቱንቱ ዎርዱዋነ ማካላ ኦሱዋ ዳርሲኖ፤ አሶረ ቢታና ጫቁዋ ጫቀቲኖ፤ ዎጋራ ዛይትያ ግብጼ ቢታ የዲኖ።

2መና ጎዳዉ ይሁዳ አሳና ሞቱ ደኤ፤ እ ያቆባ አሳ ኡንቱንቱ ኦግያዳን ሙራና፤ ኡንቱንቱ ኦሱዋዳንካ አዉ ዛራና። 3ያቆብ ባረ ዳይ ኡሉዋን ደኢደ፥ ባረ እሻ ግንድያ ኦይቄዳ። ቃይ ጋማ ጋኪደ፥ ጾሳና ባጸቴዳ፤#ዶመ 32:24-26 4ኪታንቻናካ ባጸቴዳ ጾኔዳ። ባረና ኬካ አይፍያን ጼላናዳን፥ ዬኪደ ዎሴዳ። ያቆብ ጾሳ ቤቴለን ደሜዳ፤ ጾሳይ ያን አናና ሃሳዬዳ።#ዶመ 28:10-22 5ሄዌ መና ጎዳ፥ ኡባፐ ዎልቃማ ጾሳ። እ ኤረቴዳ ሱንይካ መና ጎዳ ጌተቴ። 6ሄዋ ድራዉ፥ ህንተ ጾሳኮ ስምተ፤ ሲቁዋነ ሱረ ፕርዳ ምንስ ኦይቂተ፤ ህንተ ጾሳይ ኦናዉ ናግተ።

7ዛልአንቻ ኩሽያን ዎርዶ ሚዛናይ ደኤ፤ አሳ እ ጭምያዋ ዶሴ። 8ኤፍሬመ፥ “ታን ዳሮ ዱረ፤ ታን ታዉ ዱረታ ደማድ። ታ አቁዋ ኡባ ግዶን ታናን ኡንቱንቱ ባላ ዎይ ናጋራ ግድያባ ደምክኖ” ያጌዳ።

9መና ጎዳይ ሀዋዳን ያጌ፤ “ታን ህንተና ግብጼ ጋድያፐ ከሳደ አሄዳ መና ጎዳ ህንተ ጾሳ፤ ዳስያ ባላ ጋላሳዳን፥ ታን ህንተና ላኤንዋካ ዱንካንያን ዎና።#ዎጋ 23:42-43 10ታን ትምቢትያ ኦድያዋንቶ ሃሳያድ። ዳሮ ሳጻካ ኡንቱንቶ እማድ፤ ቃይ ኡንቱንቱ ባጋና ዳሮ ሌምሳቱዋ ኦዳድ” ያጌ።

11ጋላኣደን ናጋራይ ደኤ፤ ጋላኣደ አሳቱ ቱሙዋፐ ፓናዋንታ። ኡንቱንቱ ገልጋላን ኮሩማቱዋ ያርሺኖ። ሄዋ ድራዉ፥ ኡንቱንቱ ያርሽያ ሳአቱ ጎሻ ግዶን ኬሌዳ ሹቻ ማላ ግዳናዋ።

12ያቆብ ሶርያ ቢታ ባቃቴዳ፤ እስራኤሊ ማጫ አሳ አካናዉ ከራ ኦዳ። ማጫ አሳ አካና ድራዉ፥ እ ያን ዶርሳ ሄሜዳ።#ዶመ 29:1-20 13መና ጎዳይ እስራኤልያ አሳ ትምቢትያ ኦድያዋ ባጋና ግብጼ ጋድያፐ ከሴዳ፤ ሄ ትምቢትያ ኦድያዋ ባጋና ኡንቱንታ ናጌዳ።#ከሳ 12:50-51 14ሽን ኤፍሬመ ጾሳ ሎይ ሀንቀሴዳ፤ ሱ እ ጉሴዳዋ አጩዋ አ ጎዳይ አ አቻና፤ ቃይ አ ጫሻ አዉ ዛራና።

Currently Selected:

ሆሰ 12: DFBE

Highlight

Copy

Compare