ዛረዋ 7

ጾሳይ ዶሬዳ አሳ

(ከሳ 34:11-16)

1“መና ጎዳይ ህንተ ጾሳይ ህንተ ላታናዉ ብያ ቢታ ህንተና ገልስያ ዎደነ፥ ቃይ ህንተፐ ዎልቃምያነ ምንያ ላፑን ካዉተቱዋ፥ ሄዋንቱካ ሂተቱዋ፥ ገርጌሰቱዋ፥ አሞረቱዋ፥ ካናነቱዋ፥ ፓርዘቱዋ፥ ሂዌቱዋነ ያቡሳቱዋ ህንተ ስንፐ ቆልያ ዎደ፥#ኪታ 13:19 2ኡንቱንቱካ መና ጎዳይ ህንተ ጾሳይ ህንተ ኩሽያን አ እምና፥ ህንተ ኡንቱንታ ጾንያ ዎደ፥ ኡንቱንታ ኡባና ሱፑ ኦደ ይስተ። ኡንቱንቱና አያ ጫቁዋነ ጫቀቶፕተ። ኡንቱንቶ አይነ ቃረቶፕተ። 3ህንተ ኡንቱንቱና አከቶፕተነ ገለቶፕተ። ህንተ ማጫ ናናቱዋ ኡንቱንቱ አቱማ ናናዉ እሞፕተ። ዎይ ኡንቱንቱ ማጫ ናናቱዋካ ህንተ አቱማ ናናዉ አኮፕተ። 4አያዉ ጎፐ፥ ኡንቱንቱ ህንተ ናናቱዋ ታና ካልያዋፐ ሀራ ኤቃቱዋ ጎይናናዳን፥ ዎራ ዛራና። ሄ ዎደ መና ጎዳ ሀንቁ ህንተ ቦላ ኤጽ ከሳና፤ ህንተናካ ኤለካ ይስ ባሻና። 5ሄዋ ድራዉ፥ ኡንቱንቱ ያርሽያ ሳኣ ኮልተ። ኡንቱንቱ ጎይንያ ሹቻቱዋ መንሬተ። አሼሮ ግያ ማጫ ጾሳት ምስልያ ክንቼሬተ፤ ኡንቱንቱ ማሰቴዳ ምስለቱዋካ ታማን ጹግተ።#ዛረ. 12:3 6አያዉ ጎፐ፥ ህንተ መና ጎዳዉ፥ ህንተ ጾሳዉ፥ ጌሻ አሳ። መና ጎዳይ ህንተ ጾሳይ ህንተና ባረዉ ዱማ አልኦ ሚሻ ግድያ አሳ ኦደ፥ ቢታ ቦላን ደእያ አሳ ኡባፐ ዶሬዳ።#ከሳ 19:5፤ ዛረ. 4:20፤ 14:2፤ 26:18፤ ቲቶ 2:14፤ 1 ጰጽ. 2:9

7“መና ጎዳይ ህንተና ሲቄዳዌነ ዶሬዳዌ ህንተ ሀራ አሳፐ ፓይዱዋን ዳሬዳ ግሻሳ ግደና። ህንተ ሀራ አሳ ኡባፐካ ፓይዱዋን ጉጽያዋንታ። 8ሽን መና ጎዳይ ህንተና ሲቄዳ ግሻዉነ ህንተ ማይዛ አዋቶ ጫቄዳ ጫቁዋ ናጌዳ ድራዉ፥ እ ህንተና አይለተ ጋድያፐ፥ ግብጼ ካትያ ኩሽያፐ፥ ባረ ዎልቃማ ኩሽያን ከሴዳነ ዎዜዳ። 9ሄዋ ድራዉ፥ መና ጎዳይ ህንተ ጾሳይ ጾሳ ግድያዋ ኤርተ። እ ባረና ሲቅያዋንቶነ ባረ አዛዙዋ ናግያዋንቶ ሻአ የለታ ጋካናዉ፥ ባረ አገና ሲቁዋ ጫቁዋ ናግያ፥ አማነትያ ጾሳ።#ከሳ 20:5-6፤ 34:6-7፤ ፓይ. 14:18፤ ዛረ. 5:9-10 10ሽን እ ባረና እጽያዋንቶ ኡንቱንቱ ታልእያ ዛሬ፤ እ ኡንቱንቱ ታልእያ ዛራናዉ ጋምኤና። 11ሄዋ ድራዉ፥ ታን ሀች ህንተንቶ እምያ አዛዞቱዋ፥ አዋዮቱዋነ ህገቱዋ ናግተ።

ጾሳዉ አዛዘትና ቤትያ አንጁዋ

(28:1-14)

12“ህንተ ሀ አዛዞቱዋ ስሲደ፥ ኡንቱንታ ምንስ ናጎፐ፥ መና ጎዳይ ህንተ ጾሳይ ህንተ ማይዛ አዋቶ ጫቄዳዋዳን፥ ባረ አገና ሲቁዋ ጫቁዋ ህንተንቶ ናጋና።#ዛረ. 11:13-17 13እ ህንተና ሲቃና፤ ህንተና አንጃና፤ ህንተ ፓይዱዋ ዳርሳና። ቃይ እ ህንተንቶ እማናዉ ህንተ ማይዛ አዋቶ ጫቄዳ ጋድያን ህንተ ኡሉዋ አይፍያ፥ ህንተ ቢታ አይፍያ፥ ካ፥ ዎይንያ፥ ዛይትያ፥ ህንተ መህያ ማራቱዋነ ህንተ ዶርሳ ማራቱዋ ጮርሲደ አንጃና። 14ህንተ ሀራ አይ አሳፐነ አደ አንጀቴዳዋንታ ግዳና። እቱነ አቱማ ግድና፥ ማጫ ግድና ማይነና። ህንተ መሂካ ማይነና። 15መና ጎዳይ ሀርገ ኡባፐ ህንተና ናጋና። ህንተ ኤርያ ግብጼ ቢታ ኢታ ሀርግያ ህንተ ቦላ አሄና፤ ሽን እ ህንተና እጽያ ኡባ ቦላን ሄ ሀርግያ አሀና። 16መና ጎዳይ ህንተ ጾሳይ ህንተንቶ አ እምያ አሳ ኡባ ይስተ፤ ኡንቱንቶ አይነ ቃረቶፕተ። ኡንቱንቱ ጾሳቱዋዉካ ጎይኖፕተ። አያዉ ጎፐ፥ ሄዌ ህንተንቶ ጲረ ግዳና።

17“ህንተ ህንተ ዎዛናን፥ ‘ሀ ካዉተቱ ኑፐ ምኒኖ፤ ያትና፥ ኑን ኡንቱንታ ዋቲደ የደርስ ከሳኔ?’ ጋናዉ ዳንዳዪታ። 18ሽን ኡንቱንቶ ያዮፕተ። መና ጎዳይ፥ ህንተ ጾሳይ፥ ግብጼ ካትያ ቦላነ ግብጼ ቢታ ኡባ ቦላ ኦዳዋ ሀሳይተ። 19መና ጎዳይ ህንተ ጾሳይ ህንተና ግብጼፐ ከስያ ዎደ ኦዳ ዎልቃማ ቦሻቱዋ፥ ማላታቱዋ፥ ማላልስያባቱዋ፥ አ ዎልቃማ ኩሽያነ አ ምጨቴዳ ቀስያ ህንተ ህንተ አይፍያን በኤድታ። ሀእ ህንተ ያይያ አሳ ኡባ ቦላንካ መና ጎዳይ፥ ህንተ ጾሳይ ሄዋዳን ኦና። 20ቃይ ኡንቱንቱፐ አደ ባቃቲደ፥ ህንተፐ ቆሰቴዳዋንቱካ ያና ጋካናዉ፥ መና ጎዳይ ህንተ ጾሳይ ኡንቱንቱ ግዶን ሻብረ የዳና።

21“ሄዋ ድራዉ፥ ህንተ ኡንቱንቶ ያዮፕተ፤ አያዉ ጎፐ፥ ህንተናና ደእያ መና ጎዳይ፥ ህንተ ጾሳይ፥ ግታነ ያሽያ ጾሳ። 22መና ጎዳይ ህንተ ጾሳይ ሄ ካዉተቱዋ ጉ ጉ ቆሊደ፥ ህንተ ስንፐ ይሳና። ህንተ ኡንቱንታ ኡባ እት ኩን ይስክታ፤ ሄዋ ህንተ ኦፐ፥ ጋድያን ደእያ ዶአቱ ዳሪደ፥ ህንተና ዋይሳና። 23ሽን መና ጎዳይ ህንተ ጾሳይ ኡንቱንታ ህንተ ኩሽያን አ እማና፤ ኡንቱንቱ ያና ጋካናዉ፥ እ ኡንቱንታ ሻቢራና። 24ቃይ ኡንቱንቱ ካተቱዋካ እ ህንተ ኩሽያን አ እማና። ህንተካ ኡንቱንቱ ሱን ሳሉዋፐ ጋርሳ ባጋፐ ፕቲደ ይሳና። ኦንነ ህንተናና ኤቀት ዳንዳየና፤ ህንተ ኡንቱንታ ይሳና።

25“ማሰቴዳ ኡንቱንቱ ጾሳቱዋ ምስለቱዋ ታማን ጹግተ። ሄ ምስለቱዋ ቦላን ደእያ ብራ ዎይ ዎርቃ አሞቶፕተ። ሄዌ መና ጎዳዉ፥ ህንተ ጾሳዉ፥ ቱና ግድያ ድራዉ፥ ህንተ አ ጲርያን ኦይቀተናዳን፥ አ ህንተንቶ አኮፕተ። 26ህንተ ሄ ቱና ኤቃቱዋ ህንተ ጎለ ገልሲደ፥ ኡንቱንቱዳን ሸቀቴዳዋንታ ግዶፕተ። ህንተ ኡንቱንታ ኡባናካ እጽተነ ሻተትተ፤ አያዉ ጎፐ፥ ኡንቱንቱ ባረንቱ ሁጲያዉ ሸቀቴዳዋንታ።

Currently Selected:

ዛረዋ 7: DFBE

Highlight

Copy

Compare