ዛረዋ 30

ጾሳኮ ስሙሳን ቤትያ አንጁዋ

1“ሀ ታ ህንተ ስንን ዎዳ አንጁነ ሸቃይ ህንተ ቦላን ጋክያ ዎደ፥ መና ጎዳይ ህንተ ጾሳይ ህንተና ላልያ ሀራ ካዉተቱዋ ግዶን ደኢደ፥ ሀዋ ህንተ ሀሳያና። 2ሄ ዎደ ህንተነ ህንተ ናናይ መና ጎዳኮ፥ ህንተ ጾሳኮ፥ ስሚደ፥ ህንተ ኩመን ዎዛናፐነ ህንተ ኩመን ሸምፑዋፐ ታን ሀች ህንተና አዛዜዳ ቃላዉ አዛዘቶፐ፥ 3ሄዋን መና ጎዳይ ህንተ ጾሳይ ህንተ ኦሞዱዋ ዛራና፤ እ ህንተንቶ ቃረታና። መና ጎዳይ ህንተ ጾሳይ ህንተና ላሌዳ ካዉተቱዋ ኡባ ግዶፐካ ዛሪደ ሺሻና። 4ቢታ ጋጻ ጋካናዉ ላለቶፐካ፥ ሄዋፐ መና ጎዳይ ህንተ ጾሳይ ህንተና ዛሪደ ሺሻና። 5ህንተ አዎቱ ካሰ ላቴዳ ቢታ ህንተካ ላታናዳን ጾሳይ ህንተ ጾሳይ ህንተና ሄ ቢታዉ አሀና። ያን ህንተና ህንተ አዎቱዋፐ አደ ዱረያናነ ህንተ ፓይዱዋ ዳርሳና።

6“ህንተ ደኡዋን ደአና ማላነ መና ጎዳ ህንተ ጾሳ ህንተ ኩመን ዎዛናፐነ ህንተ ኩመን ሸምፑዋፐ ሲቃናዳን፥ እ ህንተንቶነ ህንተ ናናዉ አዛዘትያ ዎዛና እማና። 7መና ጎዳይ ህንተ ጾሳይ ሀ ሸቃ ኡባ ህንተ ሞርከቱነ ህንተና የደርስያዋንቱ ቦላ አሀና። 8ህንተካ ዛሪደ መና ጎዳዉ፥ ህንተ ጾሳዉ፥ አዛዘታና፤ ታን ሀች ህንተና አዛዝያ አ አዛዙዋካ ናጋና። 9-10ህንተ ሀ ህግያ ማጻፋን ጻፈቴዳ መና ጎዳ ህንተ ጾሳ አዛዞቱዋነ አ ዎጋቱዋ ናጋናዉ መና ጎዳዉ፥ ህንተ ጾሳዉ፥ አዛዘቶፐ፥ ቃይ ህንተ ህንተ ኩመን ዎዛናፐነ ህንተ ኩመን ሸምፑዋፐ መና ጎዳኮ፥ ህንተ ጾሳኮ፥ ስሞፐ፥ እ ህንተና ህንተ ኩሽያ ኦሶ ኡባን፥ ህንተ ኡሉዋ አይፍያን፥ ህንተ መህያ አይፍያንነ ህንተ ቢታ አይፍያን ዳርሲደ አንጃና። አያዉ ጎፐ፥ ካሰ ህንተ አዎቱዋ አንጅያዋን ናሸቴዳዋዳን፥ መና ጎዳይ ሀእ ህንተና አንጅያዋንካ ናሸታና።

11“ታን ሀች ህንተና አዛዝያ ሀ አዛዙ ሄዋ ኬሻ ዴጾ ግደና፤ ህንተፐ ሃኮካ ግደና። 12ህንተ፥ ‘ኑን ስሲደ አዛዘታናዳን፥ ሳሉዋ ከሲደ ኑዉ ዎናዌ ኦኔ?’ ጌናዳን ሳሉዋን ደኤና።#ሮመ 10:6-8 13‘ኑን ስሲደ አዛዘታናዳን፥ ኑዉ አባ ፕኒደ አሀናዌ ኦኔ?’ ጌናዳን አባ ሄፍንን ደኤና። 14ቃላይ ህንተንቶ ሎይ ማታን ደኤ፤ ህንተ ኦናዳን፥ ቃላይ ህንተ ዎዛናንነ ህንተ ዶናን ደኤ።

15“በእተ፥ ታን ሀች ህንተ ስንን ደኡዋነ ሎኦተ፥ ሀይቁዋነ ባሻ ዎድ። 16ህንተ መና ጎዳ ህንተ ጾሳ ሲቅያዋን አ ኦግያን ሀመትያዋንነ አ አዛዙዋ፥ አ አዋዩዋነ አ ዎጋ ናግያዋን፥ ታን ሀች ህንተና አዛዝያ መና ጎዳዉ፥ ህንተ ጾሳዉ፥ አዛዘቶፐ፥ ህንተ ደኡዋን ደአናነ ጮራታና፤ ቃይ ህንተ ላታናዉ ገልያ ጋድያን መና ጎዳይ ህንተ ጾሳይ ህንተና አንጃና።

17“ሽን ህንተ ዎዛናይ ዎራ ስምና፥ ህንተ አዛዘተናን እጾፐ፥ ሀራ ጾሳቶ ጎይኖፐ፥ ቃይ ኡንቱንቶ ኦፐ፥ 18ህንተ ዉር ያናዋ ታን ሀች ህንተንቶ ኦዳይ። ዮርዳኖሳ ፕኒደ፥ ህንተ ላታናዉ ብያ ጋድያን ህንተ ላይይ አዱቀና።

19“ታን ህንተ ስንን ደኡዋነ ሀይቁዋ፥ አንጁዋነ ሸቃ ዎዳዎ ሀች ሳሉዋነ ሳኣ ህንተ ቦላ ማርካያና፤ ስም ህንተነ ህንተ ዛሪ ደኡዋን ደአና ማላ፥ ደኡዋ ዶርተ። 20መና ጎዳ ህንተ ጾሳ ሲቅተ፤ አ ቃላ ስስተ፥ አዉ አዛዘትተ፤ አናና ኦይቀትተ። ሄዋዳን ሀኖፐ፥ መና ጎዳይ ህንተዉ ደኡዋ። ካሰ ህንተ ማይዛ አዋቶ፥ አብራሃማዉ፥ ይሳቃዉነ ያቆባዉ እማናዉ ጫቄዳ ጋድያን ህንተነ ህንተ ናናይ አዱሳ ላይ ደአና” ያጌዳ።#ዶመ 12:7፤ 26:3፤ 28:13

Currently Selected:

ዛረዋ 30: DFBE

Highlight

Copy

Compare