ኪታ 11

ጰጽሮስ አይሁዳ ግደና አሳፐ አማኔዳዋንቱ ሶይ አያዉ ገሌደንቶ ኦዴዳ

1የሱስ ኪቴዳዋንቱነ ይሁዳ ኡባን ደእያ እሻቱ፥ አይሁዳ ግደናዋንቱካ ጾሳ ቃላ አኬዳዋ ስሴድኖ። 2ጰጽሮስ የሩሳላመ ቤዳ ዎደ፥ ቃጻረቴዳ አሳቱ አናና ፓሉመቲደ፥ 3አ፥ “ኔን ቃጻረትቤናዋንቱኮ ገላደ፥ ኡንቱንቱና ቁማ ማዳ” ያጌድኖ።

4ሽን ጰጽሮስ ሀኔዳዋ ኮይሩዋፐ ዶሚደ፥ ማራን ማራን ሀዋዳን ያጊደ ኦዴዳ፤ 5“ታን ዮጰ ካታማን ጾሳ ዎስሽን፥ ታን አያናን ግዳደ ሳፃ በኣድ፤ ዎልቃማ ማዩዋ ማላትያዌ ኦይዱ ባጋና ኦይቀቲደ፥ ሳሉዋፐ ዎደ፥ ታኮ ዬዳ። 6ሄዋ ግዱዋ ታን ጫዳ ጼልያ ዎደ፥ ኦይዱ ገዲ ደእያ መህያ፥ ዱኣ፥ ሾሻ፥ ዛርያነ ካፉዋ በኣድ። 7ቃይ፥ ‘ጰጽሮሳ፥ ደንዳ፤ ሹካ ማ’ ግያ ቃላ ታን ስሳድ።

8“ሽን ታን፥ ‘ታ ጎዳዉ፥ ሀነና! ቱናባይ ዎይ ሸነይያባይ ኡባካ ታ ዶናኮ ሺቅ ኤረና’ ጋድ።

9“ቃላይ ሳሉዋፐ ላኤንዋካ፥ ‘ጾሳይ ጌሼዳዋ ኔን ቱና ጎፓ’ ያጊደ ታዉ ዛሬዳ።

10“ሄዌ ሄዙ ገደ ሀንና፥ ዉርሰን ኡባባይ ሳሉዋ ፑደ ጎሸቴዳ። 11ሄ ማንእያን ሄዙ አሳቱ ቂሳርያፐ ታኮ ኪተቲደ፥ ታን ደእያ ጎልያ ጋክ አጌድኖ። 12ታንካ ስናን ኡንቱንቱና ባና ማላ፥ ጌሻ አያናይ ታዉ ኦዴዳ። ቃይ ሀ ኡሱፑን እሻቱ ዮጰፐ ታናና ቂሳርያ ቢና፥ ኑን ቆርነልዮሳ ሶይ ገሌዶ። 13-14ኪታንቻይ ባረ ሶይን ኤቂደ ባረና፥ ‘ጰጽሮሳ ጌተትያ ስሞና ጼሳናዉ አሳ ዮጰ ኪታ፤ ኔንነ ነ ጎለ አሳይ ኡባይ አትያ ቃላ እ ነዉ ኦዳናዋ’ ጌዳዋ ቆርነልዮስ ዎት ስሴደንቶ፥ ኑዉ ኦዴዳ።

15“ታን ሃሳያናዉ ዶምያዋን ጌሻ አያናይ ኮይሮ ኑ ቦላ ዎዳዋዳን፥ ኡንቱንቱ ቦላካ ዎ አጌዳ። 16ጎዳይ፥ ‘ዮሃንስ ሃን ጻማቄዳ፤ ሽን ህንተንቱ ጌሻ አያናን ጻማቀታንታ’ ያጌዳ ቃላ ታን ሀሳያድ። 17ጾሳይ ኑዉ ጎዳ የሱስ ክርስቶሳ አማኔዳዋንቶ እሜዳ እሞታ ማላ አይሁዳ ግደናዋንቶካ ቃይ እሞፐ፥ ስም ጾሳ ድጋናዉ ታን ኦኔ?” ያጌዳ።

አማንያዋንቱ ክርስታነ ጌተቴድኖ

18ኡንቱንቱ ሀዋ ስሴዳ ዎደ ባረንቱ ፓሉማ አጊደ፥ “ያትና፥ ጾሳይ አይሁዳ ግደናዋንቱካ ቃይ ናጋራፐ ስሚደ ደአናዳን፥ ኡንቱንታ ካጬዳ” ያጊደ ጾሳ ጋላቴድኖ።

19እስጽፋኖሳ ቦላ ጋኬዳ ዋይያ ጌዱዋን ላለቴዳ አማንያዋንቱ ቃላ አይሁዳቱዋ ጻላላፐ አትን፥ ሀራዉ እቶነ ኦደናን፥ ፕንቀ፥ ቆጲሮሳነ አንጾክያ ጋካናዉ ዩዬድኖ። 20ሽን ቆጲሮሳፐነ ቀሬናፐ ዬዳ እት እት አማንያ አሳቱ አንጾክያ ቢደ፥ ጎዳ የሱሳ ዎንጋላ ምሽራቹዋ ኦዲደ፥ ግሪከ አሳዉካ#11:20 ግሪከ አሳ፦ ሀዋ ጉሳይ ግሪከ ቃላ ሃሳይያ አይሁደ ዎይ ሀራ አሳ። ኦዴድኖ። 21ጎዳ ዎልቃይ ኡንቱንቱና ደኤ፤ ቃይ ጮራ አሳይ አማኒደ፥ ጎዳኮ ስሜድኖ።

22ሀ የዉ የሩሳላመን ደእያ አማንያ አሳዉ ስሰትና፥ አማንያ አሳይ ባርናባሳ አንጾክያ ኪቴዳ። 23ባርናባስ አንጾክያ ቤዳ ዎደ፥ ጾሳ አ ኬካተ ኦሱዋ በኢደ ናሸቴዳ፤ ኡንቱንቱ ኡባይ ጎዳን ባረንቱ ኩመን ዎዛናፐ ምን ደአናዳን፥ ኡንቱንታ ዞሬዳ። 24አያዉ ጎፐ፥ ባርናባስ ጌሻ አያናይነ አማኑ ኩሜዳ ሎኦ አሳ፤ ሄ ጋሱዋን ጮራ አሳይ ጎዳኮ ዬድኖ።

25ሄዋፐ ጉይያን፥ ባርናባስ ሳኦላ ኮያናዉ ጸርሴሰ ቤዳ። 26ያቲደ ሳኦላ ደሜዳ ዎደ፥ አንጾክያ አሄዳ። ባርናባስነ ሳኦል አማንያ አሳና እት ላይ ኩመን ኡቲደ፥ ጮራ አሳ ታማርሴድኖ፤ ካልያዋንቱ አንጾክያን አማንያ አሳ ጌተቲደ፥ ኮይሮ ጼሰቴድኖ።

27ናባቱ የሩሳላመፐ አንጾክያ ሄ ዎደ ዎድኖ። 28ኡንቱንቱ ግዶፐ አጋቦሳ ግያዌ ደንዲደ፥ ሳኣ ኡባን ዎልቃማ ኮሻይ ደንዳናዋ አያና ዎልቃን ትምቢትያ ኦዴዳ፤ ሄዌ ሀኔዳዌ ቃላዉደዮሳ ካዉተ ዎድያና። 29ካልያዋንቱ ሁጲያን ሁጲያን ባረንቱ ዎልቃ ኬና ሚሻ ከሲደ፥ ይሁዳን ደእያ ባረንቱ እሻቶ ማዱዋ የዳናዉ ቆፋ ቃቼድኖ። 30ኡንቱንቱ ሄዋዳን ኦደ፥ ሚሻ ባርናባሳ ቦላንነ ሳኦላ ቦላ ዎሳ ጎለ ጭማቶ የዴድኖ።

Currently Selected:

ኪታ 11: DFBE

Highlight

Compare

Copy