1 ካታቱዋ 18

ኤላሳነ ባኣላ ናባቱዋ

1እራይ ዮደፐ ሄዘን ላይን፥ ኡንደና አግናይ አና መና ጎዳይ ኤላሳ፥ “ባ፤ ካትያ አካባዉ ቤታ። ታን ሀ ቢታን እራ ቡክሳና” ያጌዳ። 2ኤላስ አካባዉ ቤታናዉ ደንዲደ ቤዳ።

ሄ ዎደ ሳማርያን ዎልቃማ ኮሻይ ደኤ። 3አካብ ባረ ጎለዉ አዎትያ ኦባድያ ጼሴዳ። ኦባድ መና ጎዳ ምንሲደ አማንያ አሳ። 4ኤልዛቤላ መና ጎዳ ሱንን ትምቢትያ ኦድያዋንታ ዎስያ ዎደ፥ ኦባድ ኡንቱንቱፐ ጼታቱዋ አኪደ፥ እሻታሙዋ እሻታሙዋ ሻክ፥ ጎንጎሎቱዋ ግዶን ቆሲደ፥ ካ ምዚደ ሃካ ኡሺደ ዎዳ።

5አካብ ኦባድያ ጼሲደ፥ “ጋድያን ሳኣን ፑልቱ ደእያ ሳኣ ኡባነ ሻፋ ፑልቱዋ ኡባ ባ። ኦን ኤሪ፥ ኑን ማታ ደሚደ ፓራቱዋነ ባቁሎቱዋ ዎናን አሻናዌንቶነ” ያጌዳ። 6ኡንቱንቱ ቢታ ሻክ ሻክ አክና፥ አካብ እት ኦግያ ኦይቂደ ባረካ ቤዳ፤ ቃይ ኦባደካ ሀራ ኦግያ ኦይቂደ ባረካ ቤዳ።

7ኦባድይ ባረ ኦግያ ኦይቂደ ቢሽን፥ ኤላስ አናና ጋከቴዳ። ኦባድ ኤላሳ ኤሪደ ባረ ዴሙዋን ጉፋኒደ፥ “ታ ጎዳዉ ኤላሳ፥ ሀዌ ኔኔየ?” ያጌዳ።

8ኤላስ አዉ፥ “ኤ ታና። ኔን ባደ፥ ‘ኤላስ ሀዋን ደኤ’ ያጋደ ነ ጎዳዉ ኦዳ” ያጌዳ።

9ኦባድ ኤላሳዉ፥ “ታን ኔና አይ ናቂኔ ኔን ታና ነ ቆማ ሀይቆ ጋደ አካባ ኩሽያን አ እምያዌ? 10መና ጎዳይ ነ ጾሳይ ኤሮ! ታ ጎዳይ ኔና ኮይሳናዉ ኪትቤና ደሪ ዎይ ካዉተ ኡባካ ባዋ። ኡንቱንቱ፥ ‘ኤላስ ሀዋን ባዋ’ ያግያ ዎደ፥ ኔን ሄዋን ባይናዌ ቱማ ግድያዋ ኤራናዉ አካብ ደርያ ሞድያዋንታ ጫቂሴዳ። 11ሀእ ኔን ታና፥ ባደ ነ ጎዳዉ፥ ‘ኤላስ ሀዋን ደኤ’ ያጋደ ኦዳ ያጋሳ። 12ታን ኔና የጋደ ቦዋን፥ መና ጎዳ አያናይ ኔና ደንደ፥ ታን ኤረና ሳኣ አፋና። ታን አካባዉ ኦድና፥ እ ኔና ደማና ዮፐ፥ ታና ዎና። ታን ነ ቆማይ ናአተደፐ ዶማደ መና ጎዳዉ ያይያ አሳ። 13ኤልዛቤላ መና ጎዳ ሱንን ትምቢትያ ኦድያዋንታ ዎስያ ዎደ፥ ታን መና ጎዳ ናባቱዋፐ ጼቱዋ አካደ፥ እሻታሙዋ እሻታሙዋ እት ጎንጎሉዋን ቆሳደ፥ ቁማ ምዛድነ ሃካ ኡሻድ። ያትና፥ ሀ ታን ኦዳባይ ነዉ ታ ጎዳዉ ኦደትቤኔየ? 14ሀእ ቃይ ኔን ታና፥ ባደ ነ ጎዳዉ፥ ‘ኤላስ ሀዋን ደኤ’ ያጋደ ኦዳ ያጋሳ። ኦዶፐ እ ታና ዎና” ያጌዳ።

15ኤላስ አ፥ “ታን አዉ አዛዘትያ፥ ኡባፐ ዎልቃማ መና ጎዳይ ኤሮ! ቱማ ታን ሀቼ አካባዉ ቤታና” ያጌዳ።

16ኦባድ አካባና ጋከታናዉ ቤዳ፤ አካባዉ ኦዴዳ። አካብ ኤላሳና ጋከታናዉ ቤዳ። 17አካብ ኤላሳ በኤዳ ዎደ፥ “እስራኤልያ ጋድያ አ የግያዌ፥ ላ ሀዌ ኔኔ?” ያጌዳ።

18ኤላስ አካባ፥ “እስራኤልያ ቢታ አ የግያዌ ታና ግድከ። መና ጎዳ አዛዙዋ አጊደ፥ ባኣላ ኤቃቶ ጎይኒደ፥ ቢታ አ የግያዌ ኔናነ ነ አዉዋ ሶ አሳ። 19ሀእ እስራኤልያ አሳ ኡባ ቃርመሎሳ ደርያ ታኮ ሺሻ፤ ቃይ ኤልዛቤል ማዳፐ ምያ ትምቢትያ ኦድያዋንታ ኡባ ኡንቱንቱና እትፐ ሄ ሳኣ ሺሻ። ሄዋንቱካ ባኣላ ሱንን ትምቢትያ ኦድያ ኦይዱ ጼታነ እሻታማቱዋነ አሼር ሱንን ትምቢትያ ኦድያ ኦይዱ ጼታቱዋ” ያጌዳ።

20ሄዋ ድራዉ፥ አካብ ኪቲደ፥ እስራኤልያ አሳ ኡባነ ትምቢትያ ኦድያዋንታ ቃርመሎሳ ደርያ ሺሼዳ። 21ኤላስ ሺቄዳ አሳኮ ቢደ፥ “አዉደ ጋካናዉ ላኡ ቆፋን ባንቴ? መና ጎዳይ ጾሳ ግዶፐ፥ አ ካልተ፤ ግደናን ባኣላ ግዶፐ፥ እን አካ ካልተ” ያጌዳ። አሳይ አዉ ቃላነ ቃተናን ጮኡ ጌዳ።

22ሄዋፐ ጉይያን ኤላስ አሳዉ ሀዋዳን ያጌዳ፤ “መና ጎዳ ሱንን ትምቢትያ ኦድያዋንቱፐ ታ ጻላላይ አታድ፤ ሽን ባኣላ ሱንን ትምቢትያ ኦድያዋንቱ ኦይዱ ጼታነ እሻታማ። 23አነ ኑዉ ላኡ ኮሩማ ቦራቱ እመትኖ። ሄ ኮሩማቱዋፐ እቱዋ ኡንቱንቱ ዶርኖ፤ ኮሩማ ሹኪደ ቃንጸሬኖ፤ ያቲደ አሹዋ ም ቦላ ዎኖ፤ ሽን ታማ ኤፕኖ። ታንካ ላኤን ኮሩማ ጊግሳደ፥ ም ቦላ ዎና፤ ታንካ ታማ ኤከ። 24ህንተንቱ ህንተንቱ ጾሳ ሱን ጼስተ፤ ታንካ መና ጎዳ ሱን ጼሳና። ኮዪደ፥ ያርሹዋ ምያ ታማ ኪትያ ጾሳይ ጾሳ ግዶ” ያጌዳ።

አሳይ፥ “ሀዌ ሎኦ ቆፋ” ያጊደ ማዬዳ።

25ሄዋ ድራዉ፥ ኤላስ ባኣላ ሱንን ትምቢትያ ኦድያዋንታ፥ “ህንተንቱ ጮራ ግድያ ድራዉ፥ እት ኮሩማ ዶር አኪደ፥ ካሰቲደ ጊግስተ። ያቲደ ህንተንቱ ጾሳ ሱን ጼስተ፤ ሽን አን ታማ ኤፕተ” ያጌዳ።

26ኡንቱንቱ ባረንቶ እመቴዳ ኮሩማ አኪደ ጊግሴድኖ።

ዎንታፐ ሴታ ጋላስ ጋካናዉ፥ ባኣላ ሱን ጼሲደ፥ “ሀይ ባኣላ፥ ኑ ዎሳ ስሳ” ያጊደ ዎሴድኖ። ሽን ስሰትያ ኮሻይ ባዋ፤ እት አሳይነ ኮይቤና። ያትና፥ ባረንቱ ጊግሴዳ ያርሽያ ሳኣ ዩይ አደ ዱሬድኖ።

27ሳአይ ሴታ ጋላሳ ግድና፥ ኤላስ ኡንቱንቱ ቦላ፥ “ህንተንቱ ቃላ ቁ ኦደ ዎስተ! እ ጾሳ ግደኔ! ኦን ኤሪ፥ እ ቆፋን ሼኬደንቶ፥ ዎይ አዉ ኪታይ ዳሬደንቶ፥ ዎይ ሄራ ከሴደንቶ፥ ዎይ ገምእሼዳዋ ግዶፐ ደንናዉ ኮሼ!” ያጊደ ቅሊጬዳ።

28ያግና ባረንቱ ቃላ ቁ ኦደ ዎሴድኖ። ቃይ ካሰ ባረንቱ ጎይንያ ዎጋዳን ባረንቱ ቦላና ሱይ ጎጋና ጋካናዉ ቶራንነ ማሻን ባረንታ ጫዴድኖ። 29ያርሹዋ ሺሽያ ኦማርሳይ ጋካናዉ ኡንቱንቱ ሄዋዳን ሀኒደ፥ ትምቢትያ ኦዲኖ፤ ሽን ስሰትያ ኮሻይ ባዋ። ኡንቱንቱባ ሀይዚደ ዛሮ እምያባይ እቱነ ባዋ።

30ያትና፥ ኤላስ አሳ ኡባዉ፥ “ሃ ታኮ ሺቅተ” ያጌዳ። አሳይ አኮ ሺቅና፥ መና ጎዳዉ ያርሽያ ሳአይ ኮለት ክቼዳዋ ዛረደ ግምቤዳ። 31መና ጎዳ ቃላይ ያቆባኮ ዪደ፥ “ነ ሱንይ እስራኤልያ ግዳናዋ” ያጊደ ኦዴዳ ያቆባ ናና ዛራቱዋ ፓይዱዋዳን ኤላስ ታማነ ላኡ ሹቻቱዋ አኬዳ።#ዶመ 32:28፤ 35:10 32መና ጎዳ ሱንዉ ሄ ሹቻቱዋን ያርሽያ ሳኣ ግምቤዳ። ታማነ ኦይዱ ባ ሃ ትግና አክያ ኦላ ያርሽያ ሳኣ ዩሹዋን ቦኬዳ።

33ሄዋፐ ጉይያን ያርሽያ ሳኣ ቦላ ም ጊግስ ዎደ፥ ኮሩማ አሹዋ አ ቆሙዋን ቆሙዋን ቃንጸረደ፥ ም ቦላ ዎዳ። አሳቱዋ፥ “ኦይዱ ባቱዋን ሃ ኩንደ፥ ጹጋና ያርሹዋ ቦላነ ም ቦላ ጉስተ” ያጌዳ፤ ኡንቱንቱ ጉሴድኖ። 34ያትና፥ ኤላስ አሳቱዋ፥ “ላኤንዋካ ጉጅተ” ያጌዳ፤ ኡንቱንቱ ላኤንዋ ጉጄድኖ።

ቃይካ ኤላስ አሳቱዋ፥ “ሄዘንዋካ ጉጅተ” ያጌዳ፤ ሄዘንዋካ ጉጄድኖ። 35ሃይ ያርሽያ ሳኣ ዩሹዋን ጎጊደ ኦላን ሃይ ኩሜዳ።

36ኦማርሳ ያርሹዋ ሺሽያ ዎዲ ጋክና፥ ትምቢትያ ኦድያ ኤላስ ያርሽያ ሳኣ ሺቂደ ሀዋዳን ያጊደ ዎሴዳ፤ “አቤት መና ጎዳዉ፥ አብራሃማ ጾሳዉ፥ ይሳቃ ጾሳዉ፥ እስራኤልያ ጾሳዉ፥ ኔን እስራኤልያ ቢታን ጾሳ ግድያዌነ፥ ታንካ ነ ቆማ ግድያዌነ፥ ቃይ ታን ሀዋ ኡባ ነ ቃላን ኦያዌ ሀቼ ኤረቶ። 37አቤት መና ጎዳዉ፥ ኮያ! ኔን መና ጎዳይ ጾሳ ግድያዋነ ኔን ኡንቱንቱ ዎዛና ኔኮ ዛራደ ደእያዋ ሀ አሳቱ ኤራናዳን ኔን ታዉ ኮያ!” ያጌዳ።

38መና ጎዳ ታማይ ዎደ፥ ጹግያ ያርሹዋ፥ ም፥ ሹቻነ ቢታ ሜዳ፤ ኦላ ግዶን ደእያ ሃካ ላጬዳ። 39አሳይ ኡባይ ሄዋ በኤዳ ዎደ፥ ባረንቱ ዴሙዋን ጉፋኒደ፥ “መና ጎዳይ ጾሳ! መና ጎዳ ጻላላይ ጾሳ!” ያጌድኖ።

40ሄዋፐ ጉይያን ኤላስ ኡንቱንታ፥ “ባኣላ ሱንን ትምቢትያ ኦድያዋንታ ኦይቂተ። ኡንቱንቱፐ እት አሳይነ ከስ አኪደ ቦፖ” ያጌዳ። ኡንቱንታ ኦይቄድኖ፤ ኤላስ ኡንቱንታ ቂሾና ሻፋ አፊደ ዎዳ።

ጾሳይ እራ ቡክሴዳ

41ኤላስ አካባ፥ “ከሳደ ባ፤ ማ ኡሻ። አያዉ ጎፐ፥ ዎልቃማ እራ ጉንይ ስሰቴ” ያጌዳ። 42ሄዋ ድራዉ፥ አካብ ማናዉነ ኡሻናዉ ቤዳ። ሽን ኤላስ ቃርመሎሳ ደርያ ጼራ ከሴዳ፤ ባረ ዴሙዋ ባረ ጉልባታቱ ግዶ ዱገ ገልሲደ ጉፋኔዳ።#ያቆባ 5:18

43ሄዋፐ ጉይያን ኤላስ ባረ ቆማ፥ “ባ፤ ፑደ ከሳደ አነ አባኮ ዛራደ ጼላ” ያጌዳ።

አ ቆማይ ብ ጼሊደ አዉ፥ “አያይነ ባዋ” ያጌዳ።

ኤላስ ባረ ቆማ ላፑን ካላ፥ “ቃይካ አነ ጼላ” ያጌዳ።

ቆማይ ላፑ ገደ ጼሌዳ። 44ላፑን ገደ ጼላና፥ “በአ፥ አሳ ኩሽያ ኬሻ ሻሪ አባፐ ከሴዳ” ያጌዳ።

ኤላስ ባረ ቆማ፥ “ባ፤ አካባ፥ ‘እራይ ኔና ቡሳ ድገናዳን፥ ነ ፓራ ጋርያን ኡታደ፥ ዱገ ነ ሶ ዎ’ ያጋ” ያጌዳ።

45ጉ ኬሻ ጋምእሽን፥ ሳሉ ሻርያን ሜዳ፤ ጫርኩካ ጫርኬዳ፤ ዎልቃማ እራይካ ቡኬዳ። አካብ ፓራ ጋርያን ኡቲደ እዝራኤላ ካታማ ቤዳ። 46መና ጎዳ ዎልቃይ ኤላሳ ቦላ ዎዳ፤ ኤላስ ካባ ሳቂያን ፑደ ስርቂደ፥ እዝራኤላ ካታማ ጋካናዉ አካባፐ ስንቲደ ዎጼዳ።

Currently Selected:

1 ካታቱዋ 18: DFBE

Highlight

Copy

Compare