1 ካታቱዋ 17
17
ናብያ ኤላሳ
(1 ካታ. 17:1—19:21)
1ጋላኣደን ትሽበ ግያ ሳፐ ዬዳ፥ ትምቢትያ ኦድያ ኤላሳ ጌተትያ እት ብታኒ ካትያ አካባ ሀዋዳን ያጌዳ፤ “ታን አዉ ኦያ መና ጎዳይ እስራኤልያ ጾሳይ ኤሮ! ሀ ስንና ይያ ላይቱዋን ታን ኦደናን ደእሽን፥ ሳኣን እራይ ቡከና ዎይ ከተርሳይ ቤተና” ያጌዳ።#ያቆባ 5:17
2ሄዋፐ ስሚደ መና ጎዳ ቃላይ ትምቢትያ ኦድያ ኤላሳኮ ዪደ አ ሀዋዳን ያጌዳ፤ 3“ሀዋፐ ደንዳደ አዋይ ዶልያ ባጋ ባ፤ ያን ዮርዳኖሳ ሻፋፐ አዋይ ዶልያ ባጋና ደእያ ካሪታ ሻፋ ማታን ቆሰታ። 4ኔን ሄ ሻፋፐ ሃ ኡሻና፤ ቁራቱ ኔና ሄ ሳኣን ቁማ ምዛናዳን ታን ኡንቱንታ አዛዛድ” ያጌዳ። 5ኤላስ መና ጎዳይ ጌዳዋ ኦዳ፤ ዮርዳኖሳ ሻፋፐ አዋይ ዶልያ ባጋና ደእያ ካሪታ ሻፋ ቢደ፥ ያን ኡቴዳ። 6ዎንታነ ኦማርስ ቁራቱ ኡክነ አሹዋ ኤላሳዉ አሂኖ፤ ሃካ ሻፋፐ ኡሼ። 7ጋድያን እራይ ቡከና ድራዉ፥ ጉ ዎድያፐ ጉይያን ሻፋይ መሌዳ።
ኤላሳነ ስራፍታን ደእያ አምአቶ
8ሄዋፐ ጉይያን መና ጎዳ ቃላይ ኤላሳኮ ዪደ፥ አ ሀዋዳን ያጌዳ፤ 9“ሀ ሳፐ ደንዳደ፥ ሲዶና ማታን ደእያ ስራፍታ ባ፤ ያን ደአሻ። እት አምኤ ምሽራታ ኔና ቁማ ምዛናዳን ታን አዛዛድ” ያጌዳ።#ሉቃሳ 4:25-26
10ኤላስ ደንዲደ ስራፍታ ቤዳ፤ እ ካታማ ፐንግያኮ ጋክያ ዎደ፥ እት አምኤ ምሽራታ ም ምጻዉ። ኤላስ ምሽራቶ ጼሲደ፥ “ሀያና፥ ታዉ ኡሻናዉ ሃ ቡልያን አካ ያርኪ” ያጌዳ። 11ምሽራታ ሃ አሀናዉ ቢሽን እ ጼሲደ፥ “ሀያና ጉ ባሶ ኡክካ አካደ ያርኪ” ያጌዳ።
12ምሽራታ አዉ፥ “መና ጎዳይ ነ ጾሳይ ኤሮ! ታዉ ኡክይ ባዋ። ታዉ ኦቱዋን እት ኩቻ ሊነ ጻሩዋን ጉ ዛይተ ጻላላይ ደኤ። ታን ሀዋ ዬዳዌ ጉ ም ምጻደ፥ ሶ ስማደ፥ ህኖካ ታዉነ ታ ናአዉ እት ገደ ኡካናሳነ ሚደ ሀይቃናሳ” ያጋዱ።
13ኤላስ ምሽራትዉ፥ “አየነ ባዋ፥ ያዮፓ፤ ባደ ኔና ጌዳዋዳን ኦ። ሽን ካሰታደ ነ ልያፐ ጉ ኮምፑዋ ኮምፓደ ታዉ አካ ያ፤ ሄዋፐ ስማደ ነዉነ ነ ናአዉ ኮምፓ። 14አያዉ ጎፐ፥ መና ጎዳይ እስራኤልያ ጾሳይ፥ ‘ሳኣ ቦላን መና ጎዳይ እራ ቡክሳና ጋካናዉ፥ ሊ ኦቱዋፐ ዉረና፤ ዛይቲካ ጻሩዋፐ ዉረና’ ያጌ” ያጌዳ።
15ሄዋ ድራዉ፥ ምሽራታ ባደ፥ ኤላስ ኦዴዳዋዳን ኦዱ፤ ሄዋን ኤላስ፥ ምሽራታነ እ ሶ አሳይ ኡባ ጋላስ ቁማ ሜድኖ። 16አያዉ ጎፐ፥ መና ጎዳይ ኤላሳ ባጋና ኦዴዳ ቃላ ናጊደ፥ ኦቱዋፐ ሊ ዉርቤናነ ጻሩዋፐ ዛይቲካ ዉርቤና።
17ጉ ዎድያፐ ጉይያን ሄ ጎልያ ጎዳት ናአይ ሀርጌዳ፤ ሀርጊ ጎብ ጎብ ቢና፥ ዉርሰን ናአይ ሸምፑዋ ተኤቲደ ሀይቄዳ። 18ያትና፥ ምሽራታ ኤላሳ፥ “ጾሳ አሳው፥ ኔን ታና ሞርክያባይ አያነ? ኔን ታ ናጋራ ሀሳይሳደ ታ ናኣ ዎናዉ ያድ?” ያጋዱ።
19ኤላስ እዞ፥ “ነ ናኣ ታዉ ሀማ” ያጌዳ። ናኣ እ ክዉዋፐ አኪደ፥ ፑደ ባረ ደእያ ፖቅያ አፊደ ባረ አርሳን ግስሴዳ። 20ያቲደ መና ጎዳዉ ሀዋዳን ያጊደ ዋሴዳ፤ “አቤት መና ጎዳዉ፥ ታ ጾሳዉ፥ ቃይ ሀ ታን ደእያ ምሽራት አምአት ናኣ ዎደ፥ እ ቦላካ መቱዋ አያይ?” ያጌዳ። 21ሄዋፐ ስሚደ ናኣ ቦላ ሄዙ ገደ ዛቁሊደ፥ መና ጎዳዉ ሀዋዳን ያጊደ ዋሴዳ፤ “አቤት መና ጎዳዉ፥ ታ ጾሳዉ፥ ሀ ናኣ ሸምፑዋ ዛራ” ያጌዳ።#2 ካታ. 4:34-35
22መና ጎዳይ ኤላሳ ዋሱዋ ስሴዳ። ናኣ ሸምፑካ ስምና፥ ናአይ ፓጼዳ። 23ኤላስ ናኣ አኪደ ፖቅያፐ ዱገ ዎዳ፤ ናኣ አትዉ እሚደ ሀዋዳን ያጌዳ፤ “በአ፥ ነ ናአይ ፓጼዳ” ያጌዳ።
24ሄዋፐ ጉይያን ምሽራታ ኤላሳ፥ “ኔን ጾሳ አሳ ግዴዳዋነ ነ ዶናፐ ኦደትያ መና ጎዳ ቃላይ ቱማ ግዴዳዋ ታን ሀእ ኤራድ” ያጋዱ።
Currently Selected:
1 ካታቱዋ 17: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
