1 ኦዱዋ 14

ዳዊተ የሩሳላመን ኦዳ ኦሱዋ

1ጺሮሳ ካቲ ኪራም ዳዊታዉ አሳቱዋ ኪቴዳ። ኪተቴዳ አሳቱዋና ጎልያ ኬጻናዳን ዝጋ ሙደነ ቃይ ሹቻ ማስያዋንታነ አናጸቱዋ አዉ የዴዳ። 2መና ጎዳይ እስራኤልያ ቦላ አ ካትያ ኦደ ኤሴዳዋነ ባረ አሳ እስራኤልያ ድራዉ፥ አ ካዉተ ቁ ኦደ ቦንቼዳዋ ዳዊተ ኤሬዳ።

3ሄዋፐ ጉይያን፥ ዳዊተ የሩሳላመን ሀራ ማጫ አሳ ጉጅ አኪደ፥ አቱማዋ ናናነ ማጫ ናና የሌዳ። 4ዳዊተ የሩሳላመን የሌዳ አቱማ ናናይ ሻሙአ፥ ሾባባ፥ ናታና፥ ሶሎሞነ፥ 5ይብሃራ፥ ኤልሹአ፥ ኤልፓሌጻ፥ 6ኖጋሀ፥ ነፌጋ፥ ያፍአ፥ 7ኤልሻማአ፥ በኤልያዳነ ኤልፈሌጻ።#14:7 ዳዊታዉ የሩሳላመን የለቴዳ አቱማ ናና ሱንይ 2 ሳሜላ 5:14-16፣ 2 ኦዱዋ 3:5-7 ነ 14:4-7 ጻፈቴዳ: ሽን እብራዌዋን እቱዋ እቱዋ ሱንይ ኡባ ሳን እት ማላ ግደና።

ዳዊተ ፕልስጼማ አሳ ጾኔዳ

(2 ሳሜላ 5:17-25)

8ዳዊተ እስራኤልያ ኡባ ቦላ ካትያ ግዲደ ኦከቴዳዋ ፕልስጼማ አሳይ ስሴዳ ዎደ፥ ኡንቱንቱ ኡባይ ዳዊታ ኮያናዉ ከሴድኖ። ዳዊተ ኡንቱንቱ ከሴዳዋ ስሲደ፥ ኡንቱንቱና ኦለታናዉ ከሴዳ። 9ፕልስጼማ አሳይ ራፋይማ ዎምባ ዪደ ቦንቄድኖ። 10ዳዊተ ጾሳ፥ “ታን ባደ ፕልስጼማቱዋ ኦሎ? ኔን ኡንቱንቱ ታዉ አ እማኒ?” ያጊደ ኦቼዳ።

ሽን መና ጎዳይ አ፥ “ባደ ኦላ። ታን ኡንቱንታ ነዉ አ እማና” ያጌዳ።

11ዳዊተነ አ አሳይ ባኣል-ፓራጺማ ግያ ሳኣ ቢደ፥ ያን ኡንቱንታ ጾኔድኖ። ዳዊተ፥ “ሃ ድኡ ስ አያዋዳን ጾሳይ ታ ሞርከቱዋ ግዱዋና ታና አዳ” ያጌዳ። ሄዋ ድራዉ፥ ሄ ሳኣ ሱንይ ባኣል-ፓራጺማ ጌተቴዳ። 12ፕልስጼማቱ ባረንቱ ኤቃቱዋ ሄ ሳኣን የጊደ ቤድኖ። ያትና ዳዊተ አዛዚደ፥ ኡንቱንቱ ኤቃቱዋ ታማን ጹግሴዳ።

13ፕልስጼማ አሳቱ ላኤንዋ ሀ ዎምባ ስም ዪደ ቦንቄድኖ። 14ዳዊተ ጾሳ ላኤንዋ ኦቼዳ። ሽን ጾሳይ አ፥ “ኔን ኡንቱንቱ ጌዱዋ ቦፓ። ኡንቱንቱ ጉየና ዩያ አአደ ቦእያ ምፐ ስን ባጋና ኦላናዉ ጊጋ። 15ቦእያ ምፐ ሁጲያን ሳልፕያ ኮሻ ኔን ስስያ ዎደ፥ ኦላናዉ ከሳ። አያዉ ጎፐ፥ ሄዌ ፕልስጼማ ኦላንቻቱዋ ሾጫናዉ ጾሳይ ኔፐ ስንዉ አዳ ግያዋ” ያጌዳ። 16ጾሳይ አዛዜዳዋዳን ዳዊተ ኦዳ። ጋባኦናፐ ቢደ ገዜራ ጋካናዉ፥ እስራኤልያ አሳይ ፕልስጼማ ኦላንቻቱዋ ዎዳ። 17ሄዋፐ ጉይያን፥ ዳዊታ ዎሪ ቢታ ኡባ ጋኬዳ። ካዉተቱ ኡባይ ዳዊታዉ ያያናዳን መና ጎዳይ ኦዳ።

Currently Selected:

1 ኦዱዋ 14: DFBE

Highlight

Copy

Compare