रोमियो 9
9
परमेसर और यहूदी लोग
1मैं मसी मै सच कैबौ हौं, झूँट ना बोलौ हौं और मेरे भीतर की आत्मा बी पबित्तर आत्मा मै गभाई देवै है। 2कै मैं भौत दुखी हौं, और मेरो मन हमेसा बेचैन रैहबै है। 3कास ऐंसो हो सकतो कै मैं अपने भईयौ, बहनौ और रिस्तेदारौ के ताँई मसी को सराप अपने ऊपर ले लेतो और मसी सै अगल हो जातो। 4जो ईसराइली हैं और जिनकै परमेसर की औलाद होनै को अधकार है, जे परमेसर की महिमा कै देख चुके हैं, और परमेसर नै इनके संग करारनामो करो है। जिनकै मूसा के दुआरा देए भए नियम, सच्ची आराधना, और बचन दओ है। 5बापदादा बी उनई के हैं और मसी बी सरीर के अनुसार उनई सै पैदा भओ है, जो सबको परमेसर है और हमेसा धन्न है! ऐंसोई होए।
6इसको मतलब जौ ना है कै परमेसर नै अपनो बचन पूरो ना करो है, कैसेकै ईसराइल के बंस मै पैदा सबई लोग सच्चे ईसराइली ना हैं। 7और इब्राहिम के बंस मै जलम लैनै सैई सबई उसकी सच्ची औलाद ना हो जावै हैं। कैसेकै परमेसर नै बोलो है कै, “तेरो बंस इसहाक सैई अग्गे बढ़ैगो।” 8यानी सरीर की औलाद परमेसर की औलाद ना हैं, बलकन परमेसर के बादे के अनुसार जो पैदा भए हैं बेई इब्राहिम की सच्ची औलाद हैं। 9और बादे को बचन ऐंसे कैओ गओ हो कै, “ठीक उसई टैम मै मैं लौहटंगो और सारा के एक लौंड़ा होगो।”
10और सिरप जौई ना, पर जब रिबका बी एक आदमी सै यानी हमरे अब्बा इसहाक सै गरबबती भई, 11तौ बालकौ के पैदा होनै सै पैले और उनको कुछ बी भलो बुरो कन्नै सै पैले परमेसर नै उनके करमौ के अनुसार ना छाँटो पर परमेसर नै अपनी मरजी सै एक बौ चुनो जिस्सै बाकी मरजी पूरी हो जाऐ। 12और रिबका कै जौ कैओ गओ हो, “बड़ो लौंड़ा छोटे लौंड़ा की सेवा करैगो।” 13जैसो पबित्तर सास्तर मै लिखो है, “मैंनै याकूब कै पियार करो और ऐसाब सै नफरत करी।”
14तौ फिर हम का कैंऐ? का परमेसर अनियाय कन्नै बारो है? बिलकुल ना! 15कैसेकै बौ मूसा सै कैबै है कै,
“मैं जिस किसी के ऊपर दया कन्नो चाँहौ,
उसई के ऊपर दया करंगो,
और जिस किसी के ऊपर तरस खानो चाँहौ,
उसई के ऊपर तरस खांगो।”
16इसताँई जौ सब कुछ आदमी की मरजी या उसकी मैहनत के ऊपर ना, बलकन दया कन्नै बारे परमेसर के हात मै है। 17कैसेकै पबित्तर सास्तर मै परमेसर नै फिरौन सै जौ कैओ हो कै, “मैंनै तेकै इसताँई खड़ो करो हो कै मैं अपनी सकति तेरे ऊपर दिखा सकौं, और मेरो नाम सिगरी धरती मै फैल जाऐ।” 18इसताँई परमेसर जिस किसी कै चाँहबै है, उसके ऊपर दया करै है, और जिस किसी कै ना चाँहबै उसकै कठोर बना देवै है।
परमेसर की घुस्सा और दया
19तौ सायद तू मैंसै फिर कैगो, “फिर बी परमेसर हम्मै काए बुराई ढूंड़ै है? कैसेकै कौन उसकी मरजी को बिरोद कर सकै है?” 20भलो आदमी तू कौन है जो परमेसर कै पलट कै जबाब देवै है? का कोई चीज अपने बनानै बारे सै पूँछ सकै है कै, “तैनै मैं ऐंसे काए बनाई?” 21का कुम्हार कै जौ हक ना है, कै बौ एकई गौंदा मै सै, एक बरतन इज्जत के ताँई और दूसरे कै बेजती के ताँई बनाऐ?
22तौ का भओ अगर परमेसर नै अपनी घुस्सा दिखानै और अपनी सकति परकट कन्नै के ताँई उन लोगौ की जो घुस्सा के हकदार हे और जिसको बिनास होनै बारो हो, बड़े सबर के संग उनकी बरदास करी। 23जो दया के लोग बानै अपनी महिमा के ताँई पैलेसैई तईयार करे हे, उनके ऊपर बानै अपनी महिमा भरपूरी सै चमकाई। 24उस दया के हकदार हम हैं, जो बानै ना सिरप यहूदिऔं मै सै बलकन गैर यहूदिऔं मै सै बी बुलाए। 25जैसो कै होसे नबी की किताब मै लिखो है,
“जो लोग मेरे ना हे
उनकै मैं ‘अपने लोग’ कैंगो।
और बौ बईयर जिस्सै मैं पियार ना करौ हौं,
मैं उसकै ‘अपनी पियारी’ कैंगो।”
26और,
“जिस जघै बानै उनसै जौ कैई ही,
‘तुम मेरी परजा ना हौ।’
बाई जघै मै बे ‘जिन्दे परमेसर की औलाद कैलांगे।’”
27और यसाया ईसराइल के बारे मै जोर सै चिल्लाकै कैबै है,
“चाँए ईसराइलिऔ की संखिया समन्दर के रेता के कड़ौं के हाँई भौस्सी होए
तौबी उनमै सै थोड़े सेई बचंगे।
28कैसेकै परभु धरती के ऊपर अपने नियाय कै पूरी तरै सै जल्दी पूरो करैगो।”
29जैसे यसाया नै पैले बी कैई ही,
“अगर सरब सकतिमान परभु हमरे ताँई,
बंस ना छोड़तो
तौ हम सदोम के जैसे
और अमोरा जैसेई नास हो जाते।”
ईसराइल को अबिसवास
30तौ फिर हम का कैंऐ? जौ कै गैर यहूदी लोगौ कै जो धारमिकता की खोज मै ना हे, उनौनै धारमिकता कै पा लओ, जो बिसवास सै मिलै है। 31मगर ईसराइल के लोग जो ऐंसे नियम मै चलनो चाँहै हे जो उनकै धरमी बनाबै है, बे उसके अनुसार ना जी सके। 32ऐंसो काए भओ? कैसेकै ईसराइली बिसवास सै ना, बलकन अपने करमौ सै पानै की कोसिस कर रए हे, उनौनै उस पत्थर सै ठोकर खाई, जो “ठोकर को पत्थर” है। 33जैसो पबित्तर सास्तर मै लिखो है,
“देखौ मैं सिओन मै एक पत्थर रख रओ हौं, जो लोगौ कै ठेस लगाबै है,
और एक चट्टान जो ठोकर लगाबै है।
मगर जो कोई उसके ऊपर बिसवास करैगो उसकी कबी बेजती ना होगी।”
Currently Selected:
रोमियो 9: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
