रोमियो 8
8
पबित्तर आत्मा सै जिन्दगी
1और अब जो मसी ईसु मै हैं, उनके ऊपर सजा की आगियाँ ना है। 2कैसेकै आत्मा के नियम नै, जो ईसु मसी दुआरा जिन्दगी देवै है, मैंकै पाप के नियम और मौत सै आजाद करो है। 3कैसेकै जो काम सरीर की कमजोरी के कारन नियम ना कर सको, उसकै परमेसर नै करो, यानी अपनेई लौंड़ा कै उसनै पापी आदमी जैसे आदमी के सरीर मै भेजो, इस तरीका सै परमेसर नै आदमी के सरीर मै पाप कै सजा दई। 4जिस्सै कै नियम की बात हमरे भीतर पूरी हो जाऐ और हम सरीर मै ना चलैं पर आत्मा मै चलैं।
5कैसेकै जो आदमी सरीर के अनुसार जीवै है तौ बे सरीर की बातौं मै मन लगाबैं हैं, पर जो आदमी आत्मा के अनुसार जीवै है बे आत्मा की बातौं मै मन लगाबैं हैं। 6सरीर मै मन लगानो तौ मौत है, पर आत्मा मै मन लगानो जिन्दगी और सान्ति है। 7मगर सरीर के ऊपर मन लगानो तौ परमेसर सै दुसमनी कन्नी है, कैसेकै जौ ना तौ परमेसर के नियम कै मानै है, और नाई मान सकै है। 8और जो अपने सरीर की मरजी सै जीवै हैं, बे परमेसर कै खुस ना कर सकै हैं। 9अगर सच्ची मै परमेसर को आत्मा तुम्मै बसै है, तौ तुम सरीर के ना हौ, पर आत्मा के हौ। पर अगर किसी मै मसी को आत्मा ना हो, तौ बौ मसी को ना है। 10पाप की बजै सै सरीर तौ मर रओ है पर अगर मसी तुम्मै है, तौ आत्मा तुमकै जिन्दगी देवै है, कैसेकै परमेसर के संग तुमरो सई रिस्ता हो गओ है। 11#1 कुर 3:16और बौ आत्मा जिसनै ईसु कै मरे भएऔं मै सै जिन्दो करो हो, अगर तुमरे भीतर रैहबै है, तौ बौ परमेसर जिसनै मसी कै मरे भएऔं मै सै जिन्दो करो हो, बौ तुमरे मरे भए सरीरौं कै बी अपनी आत्मा सै जो तुमरे भीतर रैहबै है, जिन्दो करैगो।
12इसताँई मेरे भईयौ, हम सरीर के करजदार ना हैं, कै सरीर के अनुसार दिन काटैं। 13कैसेकै अगर तुम सरीर के अनुसार दिन काटौगे, तौ मरौगे। और अगर आत्मा सै सरीर के बुरे कामौ कै मारौगे, तौ जिन्दे रैहओगे।
14जो परमेसर की आत्मा के हिसाब सै चलैं हैं, बे परमेसर की औलाद हैं। 15#गला 4:5–7#मरकु 14:36; गला 4:6कैसेकै बौ आत्मा जो तुमकै मिली है, फिर सै दास बनानै या डरानै के ताँई ना है, बलकन बौ आत्मा तुमकै परमेसर की गोद लेई भई औलाद बनाबै है। जिस्सै हम “हे अब्बा, हे पिता” कैह कै परमेसर कै बुलाबै हैं। 16बौ आत्मा खुद हमरी आत्मा के संग मिलकै गभाई देवै है, कै हम परमेसर की औलाद हैं। 17और अगर औलाद हैं, तौ बारिस बी हैं, और परमेसर के बारिस और मसी संग के बी बारिस हैं, अगर हम उसके संग दुख उठाबै हैं तौ हमकै उसके संग महिमा बी मिलै है।
हमकै महिमा मिलैगी
18कैसेकै मैं समजौ हौं कै इस टैम के हमरे दुख और मुसीबत उस महिमा के सामने कुछ बी ना हैं, जो हमरे ऊपर परकट होनै बारी है। 19कैसेकै जौ दुनिया बड़ी आस के संग उस टैम को पैंड़ो देख रई ही, जब परमेसर की औलाद कै परकट करो जागो। 20कैसेकै सिगरी दुनिया बेकार बन गई, और जौ दुनिया की मरजी सै ना पर परमेसर की मरजी सै भओ। फिर बी एक उमीद ही, 21जौ दुनिया खुदई बिनास की गुलामी सै छुटकारो पाकै, परमेसर की औलाद की महिमा मै आजाद हो जागी।
22कैसेकै हम जानै हैं कै आज तक सिगरी दुनिया बालक जननै बारे दरद सै कैंखै है। 23#2 कुर 5:2–4और ना सिरप बेई पर हम बी जिनकै आत्मा को पैलो फल मिलो है, खुदई अपने भीतर कैंखैं हैं। कैसेकै हम परमेसर की औलाद बन्नै को और अपने सरीर की मुक्ति पानै को पैंड़ो देख रए हैं। 24इस उमीद सैई हमरी मुक्ति भई है। पर जब हम जिस चीज की उमीद करै हैं और उसकै देख लेबै हैं, तौ फिर बौ उमीद ना है। कैसेकै जिस चीज कै कोई देख रओ है, तौ उस चीज की उमीद कौन करैगो? 25हम उसकी उमीद करै हैं, जिस चीज कै हम ना देख रए हैं। इसताँई हम सबर के संग उसको पैंड़ो देखंगे।
26इसी तरीका सै आत्मा बी हमरी कमजोरी मै सायता करै है, कैसेकै हम ना जानै हैं कै हम कैसे पिराथना करैं। पर आत्मा खुदई हमरे ताँई कैंखते भए बिनती करै है, जो बात हम बोलई ना सकैं हैं। 27परमेसर हमरे मनौ कै जाँचै है बौ जानै है कै आत्मा की मरजी का है, कैसेकै आत्मा पबित्तर लोगौ के ताँई परमेसर की मरजी के अनुसार बिनती करै है।
28और हम जानै हैं, कै जो लोग परमेसर सै पियार रक्खै हैं, मतलब जिसकै परमेसर नै अपनी मरजी सै बुलार खाओ है उनके ताँई सब बात मिलकै भलाई कैई लामै हैं। 29कैसेकै जिनकै उसनै पैलेई चुनो उनकै अपने लौंड़ा के हाँई बन्नै के ताँई ठैराओ ताकि भौस्से भईयौ मै बौ सबसै पैलो बन सकै। 30फिर जिनकै उसनै पैलेई सै ठैराओ है, उनकै बुलाओ बी और जिनकै बुलाओ, उनकै धरमी बी ठैराओ और जिनकै धरमी ठैराओ, उनकै महिमा बी दई है।
परमेसर को पियार
31और इन बातौं के ताँई हम का कैंऐ? अगर परमेसर हमरे संग है, तौ कौन हमरो बिरोद कर सकै है? 32बौ जिसनै अपने लौंड़ा तक की परवा ना करी, पर उसकै हम सबके ताँई दे दओ, तौ बौ उसके संग हमकै सब कुछ मुफत मै काए ना देगो? 33अगर परमेसर अपने चुने भए लोगौ कै धरमी ठैराबै है, तौ कौन है जो उनके ऊपर दोस लगागो? 34फिर कौन है जो सजा की आगियाँ देगो? मसी ईसु बौ हो जो मर गओ पर बौ मुरदौं मै सै फिर जी उठो, और परमेसर के खाने हात की ओर बैठो है, और हमरे ताँई बिनती बी करै है। 35कौन है जो हमकै मसी के पियार सै अगल करैगो? का दुख, मुसीबत, सताब, अकाल, नंगोपन, खतरा, तरवार 36जैसो कै सास्तर मै लिखो है,
“तेरे ताँई हम दिनभर मारे जावै हैं।
हमकै काटी जानै बारी भेड़ौ के जैसो समजो जावै है।”
37पर इन सब बातौं मै हमकै उसके दुआरा जिसनै हम सै पियार करो है, अच्छे तरीका सै जीत पा लई है। 38कैसेकै मैंकै पक्को बिसवास है कै ना मौत, ना जिन्दगी, ना सुरगदूत, ना राज कन्नै बारी आत्मा, ना इस टैम की चीज और ना आनै बारे टैम की कोई चीज, ना सकतिऔं, 39ना ऊपर ना नीचे, और ना दुनिया की कोई बी चीज हमकै परमेसर के उस पियार सै दूर ना कर सकै है, जो हमकै परभु ईसु मसी सै मिलै है।
Currently Selected:
रोमियो 8: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
