रोमियो 1
1
नमस्कार
1जौ चिट्ठी ईसु मसी के दास पौलुस की ओर सै है, जो परमेसर दुआरा भेजो भओ चेला बन्नै के ताँई बुलाओ है, और उसकी अच्छी खबर दैनै के ताँई छाँटो गओ है। 2मैं उन सबई के नाम जौ चिट्ठी लिख रओ हौं, जो रोम मै परमेसर के पियारे हैं और जो पबित्तर होनै के ताँई बुलाए गए हैं, हमरे पिता परमेसर और परभु ईसु मसी की ओर सै तुमकै किरपा और सान्ति मिलती रैह। 3-4परमेसर नै अपने नबिऔ दुआरा पबित्तर सास्तर मै पैलेसैई उस अच्छी खबर को बादो करर खाओ है। जौ अच्छी खबर अपने लौंड़ा के बारे मै है, बौ सकति के संग आदमी के रूप मै दाऊद के बंस मै पैदा भओ। 5और मरे भए मै सै जी उठनै सै पबित्तर आत्मा दुआरा सकति के संग परमेसर को बेटा ठैराओ गओ, और बौ हमरो परभु ईसु मसी है। 6बासै हमकै किरपा, और खास भेजे भए चेला बन्नै को बरदान मिलो है, जिस्सै गैर यहूदी लोग बिसवास करैं और उसकी मानैं। 7जिनमै सै तुम बी ईसु मसी के होनै के ताँई बुलाए गए हौ।
धन्नबाद की पिराथना
8पैले मैं तुम सबके ताँई ईसु मसी के दुआरा अपने परमेसर को धन्नबाद करौ हौं, कैसेकै तुमरे बिसवास की चरचा सैरी दुनिया मै फैल गई है। 9परमेसर जिसकी सेवा मैं पूरे मन सै करौ हौं और जिसके लौंड़ा की अच्छी खबर मैं देवौ हौं, बौई मेरो गभा है कै मैं कैसे कैसे तुमकै हमेसा याद करौ हौं। 10और रोज अपनी पिराथनाऔ मै बिनती करौ हौं कै किसी तरै सै अब तुमरे धौंरे आनै की मेरी चाहत परमेसर की मरजी सै पूरी हो।
11कैसेकै मेरी तुमसै मिलनै की बड़ी इच्छा है, कै मैं तुमकै कोई आत्मिक बरदान दौं जिस्सै तुम मजबूत हो जाऔ। 12मतलब, हम उस बिसवास के दुआरा जो मैं मै और तुम्मै है एक दूसरे सै हिम्मत लैं।
13 #
चेलौ 19:21
हे भईयौ, मैं जौ चाँहौ हौं कै तुम जौ बात जानलो कै जैसे मैंनै गैर यहूदिऔं मै मसी के ताँई लोगौ कै चेला बनाओ, बैसेई तुमरे बीच मै बी लोगौ कै मसी के चेला बनानै के ताँई तुमरे धौंरे भौत दफै आनो चाँह रओ हो, पर कुछ ना कुछ मुसीबत की बजै सै आ ना सकै हो। 14मैं यूनानिऔं को और जो यूनानी ना हैं उन लोगौ को और बुद्धिमानौ और मूरखौं को करजदार हौं। 15इसताँई मैं तुमकै बी जो रोम मै रैहबै हैं, अच्छी खबर सुनानै के ताँई तरस रओ हौं।
अच्छी खबर की सकति
16 #
मरकु 8:38
मैं अच्छी खबर सै ना सरमाबौ हौं, कैसेकै अच्छी खबर मुक्ति पानै के ताँई, जो उसके ऊपर बिसवास करै है, उन सबके ताँई परमेसर की सकति है पैले यहूदी के ताँई फिर यूनानी के ताँई। 17कैसेकै अच्छी खबर जौ बताबै है कै परमेसर के संग आदमी को सई रिस्ता कैसे बनै है। जौ रिस्ता सुरू सै लेकै आखरी तक बिसवास मै टिको है, जैसो लिखो है, “धरमी आदमी बिसवास सै जिन्दो रैहगो।”
सबनै पाप करो है
18परमेसर को कोप सुरग सै उन लोगौ के सब तरै के अधरम और अनियाय मै परकट होवै है, जो बुराई के दुआरा सच्चाई कै दबाए रक्खै हैं। 19परमेसर उन लोगौ कै सजा देवै है, कैसेकै बाके बारे मै बे अच्छे सै जानै हैं, और अपने बारे मैं परमेसर नै उनके ऊपर परकट कर दओ है।
20जब सै परमेसर नै दुनिया कै बनाओ तब सै उसकी कबी खतम ना होनै बारी सकति और उसको परमेसर बारो सौभाब जो हमकै दिखाई ना देवै हो, बौ हमकै उसकी बनाई भई चीजौ मै दिखाई देवै है और हम समजै हैं। इसताँई लोगौ के धौंरे कोई बहानो ना है।
21 #
इफि 4:17,18 कैसेकै उनौनै परमेसर कै जानते भए बी परमेसर लायक बड़ाई और धन्नबाद ना करो, पर बेकार बात सोचल लगे, बे मूरख बन गए और उनकी बुद्धि भरस्ट हो गई। 22बे अपने आपकै समजदार कैबै हैं पर बे मूरख बन गए। 23कबी खतम ना होनै बारी परमेसर की महिमा कै खतम होनै बारे आदमी और पंछिऔ, जनाबरौ और रिंगनै बारे जनाबर के हाँई मूरतिऔं मै बदल दओ।
24इस कारन परमेसर नै उनके मन की बुरी इच्छाऔं के अनुसार छोड़ दए कै बे एक दूसरे के संग गलत तरीका सै सरीर को रिस्ता बनाकै आपस मै अपने सरीरौं की बेजती करैं। 25कैसेकै उनौनै परमेसर की सच्चाई की जघै मै झूँट अपनाओ और बनाई भई चीजौ की पूजा और सेवा करी, पर उस बनानै बारे की ना, जो युगौं-युगौं तक धन्न है। ऐंसोई होए।
26इसताँई परमेसर नै उनकै बुरी इच्छा के बस मै छोड़ दओ, हिंया तक की उनकी बईयरौं नै मरदौं के संग को सम्बंध छोड़कै आपस मै बईयरौं के संग सम्बंध बनाल लगीं। 27बैसेई आदमी बी बईयरौं के संग सौभाबिक सम्बंध कै छोड़कै आपस मै गलत सम्बंध बनानै की इच्छा मै जरल लगे, और आदमिऔ नै आदमिऔ के संग गलत सम्बंध करकै अपने सरीर मै उसकी ठीक सजा पाई।
28जब उनौनै परमेसर को सच्चो गियान पानो सई ना समजो, तौ परमेसर नै बी उनकै जो ना सोचनो चँईऐ, बौई सोचनै के ताँई और जो ना कन्नो चँईऐ बौई कन्नै के ताँई छोड़ दए। 29इसताँई बे सब तरै के अधरम और बुराई, लालच, दुसट कामौ सै भर गए। और बे जरन, कतल, लड़ाई, छल और नफरत सै भर गए, और चुगलखोर। 30दूसरौं कै बुरी बातौं सै बदनाम कन्नै बारे, परमेसर सै नफरत कन्नै बारे, दूसरौं की बेजती कन्नै बारे, घमंडी, डींगमार, बुरे-बुरे कामौ कै ढूंड़नै बारे, अईया-अब्बा की आगियाँ ना माननै बारे। 31बेबकूफ, बादो तोड़नै बारे हैं, उनमै पियार और दया ना है। 32बे तौ परमेसर को जौ नियम जानै हैं, कै ऐंसे ऐंसे काम कन्नै बारे मौत की सजा के लायक हैं, तौबी ना केबल खुदई ऐंसे काम करैं हैं, पर बैसेई काम कन्नै बारौ की पीठ थप थपामै हैं।
Currently Selected:
रोमियो 1: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
