गलातिऔ 4
4
1मैं जौ कैबौ हौं कै जब तक बारिस बालक होवै है तब तक सिगरी चीजौ को मालिक होते भए बी बामै और दास मै फरक ना होवै है। 2पर जो बखत अब्बा नै ठैरार खाओ है तब तक बौ देखरेख कन्नै बारे और परबंधक के बस मै है। 3मसी के आनै सै पैले हमरी हालत बी ऐंसीई ही और हम बी बालकौ के हाँई हे, तब हम बी दुनिया के नियमौ के दास हे। 4पर जब सई बखत आओ, तौ परमेसर नै अपने लौंड़ा कै भेज दओ, जो एक बईयर सै नियम के आधीन होते भए जलमो। 5#रोमी 8:15–17जिस्सै कै जो लोग नियम के आधीन होते भए जिन्दगी जीवै हैं उन सबई कै आजाद कर सकै और हमकै परमेसर की गोद लेई भई औलाद बन्नै को हक मिलै।
6तुम अब परमेसर की औलाद हौ, इसताँई परमेसर नै अपने लौंड़ा की आत्मा कै तुमरे दिल मै बसाओ है, जिस्सै कै तुम “हे अब्बा, हे पिता” कैह कै बुलाबौ हौ। 7इसताँई अब तुम दास ना रैहए पर औलाद बन गए हौ और अगर औलाद हौ तौ परमेसर नै तुमकै बारिस बी बनाओ है।
गलातिया के बिसवासिऔ ताँई पौलुस की फिकर
8पर जब तुम परमेसर कै ना जानै हे, तौ तुम उन देबताऔ के गुलाम हे, जो सच्ची मै परमेसर ना हे। 9पर अब तुमनै परमेसर कै जान लओ है या जौ कैंऐ कै परमेसर तुमकै जानै है। तौ तुम अब दुनिया के कमजोर और बेकार नियमौ के पिच्छे बापस काए जानो चाँहौ हौ? और का तुम उनको फिर सै गुलाम बन्नो चाँहौ हौ? 10तुम अब खास दिन और महीना, रुत और सालौं कै मनाबौ हौ। 11पर मैंकै जा बात सै डर लगै है कै जो मैहनत मैंनै तुमरे बीच मै करी है बौ सिगरी कहीं बेकार ना जाय?
12ओ भईयौ और बहनौ, मैं तुमसै जौ बिनती करौ हौं कै तुम मेरे हाँई बनौ कैसेकै मैं बी तुमरे हाँई बन गओ हौं, तुमनै मेरी कुछ बुराई ना करी। 13पर तुम जौ बात जानौ हौ कै मेरी तबियत खराब होनै की बजै सै मैंनै तुमकै सबई सै पैले अच्छी खबर सुनाई ही। 14और मैं अपनी सरीर की कमजोरी की बजै सै तुमरे ऊपर बोज बनो पर फिर बी तुमनै ना तौ मेरी बेजती करी और ना मैंसै नफरत करी, पर तुमनै मेरो परमेसर के दूत और ईसु मसी के हाँई सुआगत करो। 15तौ तुमरी बा खुसी को का भओ? मैं जा बात को गभा हौं कै अगर जौ हो सकतो तौ तुम अपनी आँख कै लिकारकै मैंकै दे देते। 16तौ का सच बोलनै की बजै सै मैं तुमरो दुसमन हो गओ?
17गलत सिकानै बारे तुमकै अपनो दोस्त तौ बनानो चाँहै हैं, पर उनकी सोच सई ना है कैसेकै बे तुमकै मैंसै दूर कन्नै की सोचै हैं जिस्सै कै तुमकै उनके ऊपर लगाब हो। 18पर हमेसा अच्छे मकसद के ताँई जोसीलो होनो बढ़िया होवै है, और ना सिरप बाई बखत मै जब मैं तुमरे संग हौं। 19ओ मेरे बालकौ, जब तक तुम मसी हाँई ना बन जाऔ, तब तक मैं बा बईयर के हाँई बैसो दरद सैहतो रैहंगो जो बालक जननै के बखत होवै है। 20मैं ऐंसो चाँहबौ हौं कै अब तुमरे धौंरे आकै मीठे बोल सै बताऔ, कैसेकै मैंकै समज मै ना आ रओ है कै मैं तुमकै कैसे समजाऔं।
सारा और हाजिरा को उदाहरन
21-22जो लोग नियम के हिसाब सै जिन्दगी जीनै की सोचै हैं, मैं तुमसै जौ बात पूँछनो चाँहौ हौं, का तुमनै नियम की लिखी भई बात ना सुनी? कै, इब्राहिम के दो लौंड़ा हे, एक लौंड़ा दासी सै भओ और दूसरो लौंड़ा आजाद बईयर सै पैदा भओ। 23और जो लौंड़ा दासी सै पैदा भओ हो, बौ सरीर की मरजी सै भओ हो। पर जो लौंड़ा आजाद बईयर सै पैदा भओ हो, बौ परमेसर के बादे के दुआरा पैदा भओ।
24जा बात को एक मतलब है कै जो जे दो बईयरैं हैं बे दो करारनामे हैं। एक तौ सिने नाम को पहाड़ जिस्सै गुलामई पैदा होवै हैं और बौ हाजिरा है। 25और हाजिरा मानौ एक सिने नाम को पहाड़ है जो अरब देस मै है, और अब बौ आज के ऐरूसलेम की ओर इसारो कर रओ है। कैसेकै बौ अपने बालकौ के संग गुलामी मै है। 26पर जो ऐरूसलेम सुरग मै है, बौ आजाद है और बौ हमरी अईया है। 27कैसेकै पबित्तर सास्तर मै लिखो है कै,
“हे बाँज तू खुसी मना,
तैनै किसी कै पैदा ना करो,
तेकै बालक जननै को दरद ना भओ,
तू खूब हस कै खुसी मना।
कैसेकै छोड़ी भई बईयर की औलाद,
सुहागन की औलाद सै बी जादा हैं।” कैसेकै बा छोड़ी भई बईयर को लोग बाकै फिर सै अपनागो।
28इसताँई ओ भईयौ और बहनौ, जैसे परमेसर के बादे के हिसाब सै इसहाक को जलम भओ है, बैसेई परमेसर के बादे अनुसार तुम बी जलमे हौ। 29और जैसे पैले सरीर की मरजी सै जलमे भए लौंड़ा आत्मा सै जलमे भए लौंड़ा कै सताबै हे, बैसोई अब्बी हो रओ है। 30पर पबित्तर सास्तर मै का लिखो है? कै, “दासी और बाके लौंड़ा कै लिकारकै बाहार करौ, कैसेकै दासी को लौंड़ा आजाद बईयर के लौंड़ा के संग बारिस को हकदार ना होगो।” 31इसताँई मेरे पियारे बिसवासिऔ, हम सबई गुलाम बईयर की ना, पर आजाद बईयर की औलाद हैं।
Currently Selected:
गलातिऔ 4: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
