गलातिऔ 2
2
भेजे भए चेलौ दुआरा पौलुस कै साती माननो
1 #
चेलौ 11:30; 15:2 चौदैह साल के बाद बरनबास के संग जब मैं फिर ऐरूसलेम गओ तौ तीतुस कै बी अपने संग ले गओ। 2परमेसर नै मैंकै कैई और इसताँई मैं बहाँ गओ और जिस अच्छी खबर को मैंनै गैर यहूदी लोगौ के बीच मै परचार करो हो बाके बारे मै उनकै बताओ। हाँ सिरप उनकै बताओ हो जो जानेमाने लोग हे। कैसेकै ऐंसो ना होए कै बे काम जो मैंनै पैले करे हे और जो काम मैं कर रओ हौं बे बेकार ना जाऐ।
3पर तीतुस कै बी जो मेरे संग हो और जो यूनानी हो, तौबी बाकै जा बात के ताँई किसी नै मजबूर ना करो कै तू अपनो खतना करा। 4पर जौ बात उन झूँटे भईयौ की बजै सै भई जो चोरी चोरी हमरे बीच मै घुस आए हे। बे हमरी आजादी खतम कन्नै की सोचै हे, जो हमकै मसी ईसु मै मिली। और बे हमकै यहूदी रीती रिबाजौ को गुलाम बनानो चाँहै हे। 5पर हमनै उनके सामने एक घड़ी भर के ताँई अपने घूंटे ना टेके। कैसेकै जो अच्छी खबर की सच्चाई है, बौ तुम्मै बनी रैह।
6मैंकै जा बात सै कोई मतलब ना है कै बे जानेमाने लोग हे, पैले का हे। मेरे ऊपर उनको कोई असर ना पड़ो है और नाई उन्नै मेरी अच्छी खबर मै कुछ और कैई। परमेसर किसी के संग बी भेदभाब ना करै है। 7पर उन लोगौ नै जौ मान लओ कै जिस तरीका सै परमेसर नै पतरस कै यहूदी लोगौ के बीच मै अच्छी खबर सुनानै को काम सौंपो हो, बैसेई परमेसर नै मैंकै गैर यहूदी लोगौ के बीच मै अच्छी खबर सुनानै को काम सौंपो है। 8कैसेकै जैसे परमेसर नै भेजो भओ चेला पतरस कै यहूदी लोगौ के बीच मै परचार कन्नै की तागत दई। बैसेई मैंकै बी गैर यहूदी लोगौ के बीच मै भेजो भओ चेला के रूप मै परचार कन्नै की तागत दई। 9याकूब, पतरस और यहून्ना बिसवासी लोगौ के बीच मै जानेमाने नेता हे। जो किरपा मैंकै परमेसर सै मिली ही जब उन्नै बाकै जान लओ तबई मैंकै और बरनबास कै अपनो साती मानो। और बे जा बात मै राजी हो गए कै हम गैर यहूदी लोगौ के धौंरे जांऐ और बे यहूदी लोगौ के धौंरे जांगे। 10उनौनै हमकै बस जौ कैई कै तुम गरीब लोगौ को धियान रखिओ और मैंकै खुद जौ काम कन्नै की बड़ी इच्छा ही।
पौलुस दुआरा पतरस को बिरोद
11पर जब पतरस अन्ताकिया मै आओ, तौ मैंनै बाके सामनेई बाको बिरोद करो, कैसेकै बाकी गलती ही। 12जब पतरस गैर यहूदी लोगौ के संग रोटी खा रओ हो, तौ याकूब के भेजे भए कुछ आदमी बहाँ आए, और पतरस उन खतना बारौ के डर सै गैर यहूदी लोगौ के धौंरे सै अलग होकै दूर रैहल लगो। 13और जो बहाँ के यहूदी लोग हे बे बी पतरस के हाँई ढौंग करल लगे और बरनबास बी उनके ढौंग के चक्कर मै पड़कै भटक गओ।
14पर जब मैंनै जौ देखो कै अच्छी खबर की सच्चाई के हिसाब सै उनको चाल-चलन ना हो, तौ तबई मैंनै सबई के सामने पतरस सै कैई कै, “तुम यहूदी होते भए बी गैर यहूदी की तरै जीवौ हौ, तौ तुम गैर यहूदी लोगौ कै यहूदी रीती रिबाज माननै के ताँई काए मजबूर कर रए हौ?”
15हम और तुम तौ जलम सैई यहूदी हैं और गैर यहूदी लोगौ के हाँई पापी ना हैं। 16#रोमी 3:20; रोमी 3:22पर हम जौ बात जानै हैं कै आदमी नियम के काम सैई धरमी ना ठैरै है, पर ईसु मसी मै बिसवास कन्नै के दुआराई धरमी ठैरै है। इसताँई हम मसी ईसु मै बिसवास करै हैं, और बिसवास कन्नै की बजै सै मसी हमकै धरमी ठैरागो, ना कै नियम के काम की बजै सै। कैसेकै कोई बी आदमी नियम के काम कन्नै की बजै सै धरमी ना ठैराओ जा सकै है।
17“पर अगर हम मसी मै धरमी बन्नै की कोसिस करै हैं, और बाई मै हम पापी लिकरे, तौ का मसी पाप को दास है? बिलकुल ना। 18कैसेकै अगर मैं उनई चीजौ कै फिर सै सिकाऔं जिसकै मैंनै पैलेई पिच्छे छोड़ दओ, तौ मैं खुद परमेसर के नियम कै तोड़नै बारो बनंगो। 19-20कैसेकै मैं तौ नियम के दुआरा नियम के ताँई मर गओ जिस्सै कै मैं परमेसर के ताँई जिऔं। मैं मसी के संग कुरूस मै चढ़ाओ गओ, पर अब जो जिन्दो है बौ मैं ना हौं, पर मसी मेरे भीतर जिन्दो है। पर अब मैं जा सरीर मै जिन्दो हौं, तौ सिरप बा बिसवास के दुआरा जो परमेसर के लौंड़ा ईसु मसी मै है, जिसनै मैंसै पियार करो और मेरे ताँई अपनी जान तक दे दई। 21अगर नियम के दुआरा धरमी बनो जातो, तौ मसी को मरनो बेकार होतो। मैं परमेसर के किरपा कै बेकार ना करौ हौं।”
Currently Selected:
गलातिऔ 2: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
