1 कुरन्थियों 7
7
बिहा
1अब उन बातौं के बारे मै जिनकै तुमनै लिखो है। आदमी के ताँई जौ अच्छो है कै बौ बिहा ना करै। 2पर कुकरम सै बचनै के ताँई हर एक आदमी की अपनी बईयर और हर एक बईयर को अपनो लोग होए। 3लोग अपनी बईयर को हक पूरो करै, और बैसेई बईयर बी अपने लोग को। 4बईयर को अपने सरीर के ऊपर हक ना है, पर बाके लोग को है, बैसेई लोग कै बी अपने सरीर के ऊपर हक ना है, पर बाकी बईयर को है। 5तुम आपस मै एक दूसरे सै अगल ना रौह, पर रैहनो है तौ आपस मै बातचीत करकै कुछ बखत पिराथना के ताँई जरूर लिकारिओ और फिर उसके बाद संगई रैहईओ। कहीं ऐंसो ना हो जाऐ कै तुम खुद के ऊपर काबू ना रख सकौ और सैतान तुमकै परखै। 6मैं जौ बात आगियाँ के रूप मै ना कैरओ हौं, पर मंजूरी देरओ हौं। 7पर मैं तौ जौ चाँहौ हौं कै, सिगरे आदमी ऐंसेई बनै जैसे मैं हौं। पर परमेसर की ओर सै हर एक कै अगल अगल बरदान मिले हैं, किसी कै किसी तरै को, किसी कै किसी और तरै को।
बिना बिहाले लोगौ के ताँई सला
8पर जिनको बिहा ना भओ है और जो राँड़ हैं। उनसै मैं जौ कैबौ हौं कै उनके ताँई जौ अच्छो है कै बे बिन बिहाले रैंह जैसो मैं हौं। 9पर जो अपने ऊपर काबू ना रख सकै है, बाकै बिहा कर लैनो चँईऐ, कैसेकै सरीर की बुरी इच्छा मै पड़नै सै अच्छो बिहा कन्नो है।
बिहालेऔ के ताँई सला
10 #
मत्ती 5:32; 19:9; मरकु 10:11,12; लूका 16:18 जिनको बिहा हो गओ है, उनकै मैं ना, पर परभु आगियाँ देवै है कै बईयर अपने लोग सै अगल ना होए। 11और अगर बौ बईयर छोड़कै चली जाय, तौ बौ दूसरो बिहा ना करै, या अपने लोग सै फिर सै मेलजोल करकै संग रैह। ना लोग अपनी बईयर कै छोड़ै।
12पर दूसरे लोगौ सै परभु को ना पर मेरो कैनो जौ है, अगर किसी बिसवासी भईया की बईयर मसी मै बिसवास ना करै है, और बौ बाके संग रैहनो चाँहै है तौ बौ बाकै ना छोड़ै। 13और जिस बिसवासी बईयर को लोग अबिसवासी होए, और बौ बाके संग रैहनै सै खुस है, तौ बौ अपने लोग कै ना छोड़ै। 14कैसेकै अबिसवासी आदमी अपनी बिसवासी बईयर के दुआरा पबित्तर ठैराओ जावै है, और अबिसवासी बईयर अपने बिसवासी आदमी के दुआरा पबित्तर ठैराई जागी। ना तौ तुमरी औलाद असुद्द होतीं, पर अब बे पबित्तर हैं।
15अगर अबिसवासी छोड़कै जानो चाँहै है तौ बौ चलो जाऐ। ऐंसी घड़ी किसी बिसवासी भईया या बहन के सामने आवै है तौ बे बिहा के रिस्ता मै बंधे ना रैहंगे। परमेसर नै तौ तुमकै सान्ति की जिन्दगी जीनै के ताँई बुलाओ है। 16हे बईयर, तेकै तौ जौ बी पतो ना है कै तू अपने लोग कै बचा पागी कै ना पागी। और हे आदमी, तेकै तौ जौ बी पतो ना है कै तू अपनी बईयर कै बचा पागो कै ना पागो।
जैसे हौ बैसेई जिऔ
17पर परभु नै जिसकै जैसो दओ है और जो जिस रूप मै परमेसर नै बुलाओ है, बाकै बैसेई जीनो चँईऐ। मैं सबई बिसवासिऔ की मंडलिऔ के ताँई इनई नियम को हुकम देवौ हौं। 18अगर परमेसर के दुआरा किसी कै बुलाओ गओ है, और बाको खतना हो गओ है, तौ बौ जा बात कै लुकानै की कोसिस ना करै और अगर किसी कै परमेसर दुआरा बिना खतना बारे कै बुलाओ गओ है, तौ बौ अपनो खतना ना कराऐ। 19खतना और बगैर खतना कुछ बी ना है, पर परमेसर की आगियाँऔ कै माननोई सबई कुछ है। 20हर एक आदमी जिस हालत मै बुलाओ गओ है बौ उसई मै रैह। 21अगर तू गुलाम की हालत मै बुलाओ गओ है, तौ फिकर ना कर, पर अगर तेकै आजाद होनै को मौको मिलै है तौ बा आजादी को फाएदा उठा। 22कैसेकै जो गुलाम की हालत मै परभु मै बुलाओ गओ है, बौ परभु को आजाद करो भओ आदमी है, और बैसेई जो आजादी की हालत मै बुलाओ गओ है, बौ मसी को गुलाम है। 23तुमकै परमेसर नै मोल ले लओ है, इसताँई आदमिऔ के गुलाम ना बनौ। 24हे भईयौ और बहनौ, जो जिस हालत मै बुलाओ गओ है, बौ उसई मै परमेसर के संग रैह।
कुँआरिऔं और राँड़ौ कै सला
25कुँआरी लौंड़िऔ और राँड़ौ के बारे मै परभु की ओर सै मैंकै कोई आगियाँ ना मिली है, पर परभु की दया सै बिसवास के जोग होनै के नाते मैं अपनी सला देरओ हौं। 26मेरे हिसाब सै जौ अच्छो है कै आज कल की मुसीबतौं की बजै सै आदमी जिस हालत मै है, उसई हालत मै रैह। 27अगर तू बिहालो है तौ अपनी बईयर सै अगल होनै की कोसिस ना कर, और अगर तू बिहालो ना है, तौ बईयर पानै की कोसिस मत कर। 28पर अगर तू बिहा करै है, तौ बामै कोई पाप ना है, और अगर कुँआरी लौंड़िया बिहा करै है, तौ बौ बी कोई पाप ना करै है। पर जो लोग बिहाली जिन्दगी जी रए हैं उनकै भौस्सी परेसानिऔ को सामनो कन्नो पड़ैगो। पर मैं तुम लोगौ कै इनसै बचानो चाँहौ हौं।
29हे भईयौ और बहनौ, मैं तुमसै जौ कैरओ हौं, कै बखत कम है, इसताँई जो बिहाले हैं, बे ऐंसे रैह मानौ कै उनको बिहई ना भओ है। 30और रोनै बारे ऐंसे रैंह, मानौ रोतेई ना हौं, और खुसी मनानै बारे ऐंसे रैंह, मानौ खुसी ना मना रैंह हौं और मोल लैनै बारे ऐंसे हौं, कै मानौ उनके धौंरे कुछ बी ना हो। 31और जो जा दुनिया की चीजौ के लेन-देन मै डूबै हैं, बे ऐंसे रैह, मानौ इन चीज को उनसै कोई मतलब ना हैं, कैसेकै जो दुनिया हम देख रए हैं बौ जादा बखत तक टिकी ना रैहगी।
32मैं तौ चाँहौ हौं, कै तुमकै चिन्ता ना होए, एक कुँआरो आदमी परभु की बातौं की चिन्ता मै रैहबै है, कै परभु कै कैसे खुस रक्खै। 33पर बिहालो आदमी दुनिया की बातौं की चिन्ता मै रैहबै है, कै अपनी बईयर कै किस तरै सै खुस रक्खै, 34और बाको धियान भटको भओ है। पर जिस बईयर को बिहा ना भओ है या कुँआरी लौंड़िया बे परभु की चिन्ता मै रैहबै हैं। बे सरीर और आत्मा दौनौ मै पबित्तर रैहनै की कोसिस करैं। पर बिहाली दुनिया की बातौं की चिन्ता मै रैहबै हैं कै अपने आदमी कै खुस रक्खै। 35मैं जौ बात तुमरेई फाएदा के ताँई कैरओ हौं, ना कै तुमरे रुकाबट के ताँई, पर इसताँई कै जैसो सोहै, बैसोई करो जाय, कै तुम एक मन होकै परभु की सेवा मै लगे रौह।
36अगर किसी लौंड़ा की सगाई किसी लौंड़िया के संग होई पड़ी है, और बाकी बिहा की उमर लिकरी जा रई होए, और बा लौंड़ा कै लगै कै मैं बाके संग अच्छो बरताब ना कर रओ हौं, तौ बौ बासै बिहा कर लै और ऐंसो कन्नो पाप ना है। 37पर जिसको मन पक्को है, और बाके ऊपर किसी बी तरै को दबाब ना है और खुद के ऊपर पूरो भरोसो है, तौ अगर बौ बिहा ना करै है, तौ बाको फैसला सई है। 38इसताँई जो अपनी मंगेतर सै बिहा कर लेबै है तौ बौ सई करै है। जो बिहा ना करै है बौ और बी जादा अच्छो करै है।
39जब तक जिस बईयर को लोग जिन्दो है, तब तक बौ बासै बंधी भई है। पर जब बाको लोग मर जाय, तौ जिस्सै चाँहै बासै बौ बिहा कर सकै है, पर सिरप परभु मै बिसवास कन्नै बारो आदमी होनो चँईऐ। 40पर जैसी है अगर बौ बैसीई रैह, तौ मेरी सोच सै और बी जादा अच्छो है। कैसेकै मैंनै जौ बात इसताँई कैई कै, मैं ऐंसो बिसवास करौ हौं कै परमेसर को आत्मा मेरे भीतर बी है।
Currently Selected:
1 कुरन्थियों 7: TKB
Highlight
Copy
Compare
Share
Want to have your highlights saved across all your devices? Sign up or sign in
New Life Compute Institute [NLCI] - CC BY-NC-ND 4.0
