रोमी 10

इस्राएल देशके आदमीनके अच्छो समाचारको जरुरत

1हे बिश्वासी ददाभइया, मेरे मनकी अभिलाषा और मेरे अपने यहूदी आदमीनके ताहीं परमेश्वरसे मिर प्राथना हए, कि परमेश्वर उनके बचाबए। 2काहेकी मए उनकी गवाही देत हओं, कि उनके परमेश्वरके ताहीं हौसला रहात हए, पर परमेश्वरको सेवा कैसेकरो जएहए, जाके बारेमे उनको समझ सही नाएहए। 3काहेकी बे, धार्मिकता जो परमेश्वरके घेनसे आतहए बोके पहिचानन्मे बिफल हुइके, बे अपनी तरिकासे धर्मी बनन्के कोसिस करके जो धार्मिकता परमेश्वरसे आतहए बोके अधिनमे नाएभए। 4काहेकी ख्रीष्ट पहिलीएसे बो उदेश्यके पुरा करी, जोके ताहीं नियम कानुन दओगओ रहए। जाकेमारे, जो कोइ फिर बामे बिश्वास करत हए बे परमेश्वरके सँग धर्मी ठहिरत हएं।

5जब मोशाको नियम कानुन पालन करके आदमी, कैसे परमेश्वरद्वारा धर्मी ठहिरनके बारेमे लिखी रहए, बो कही रहए: “जो आदमी नियम कानुनके पालन करत हए, बो उनसे जीवित रहाबैगो।”

6पर बिश्वासमे आधारित धार्मिकता जो परमेश्वरसे आतहए, जाके बारेमे पबित्र-शास्त्र जा कहात हए, “अपनएसे जा मत् कहियओ, कि ‘कौन स्वर्गतक ख्रीष्टके तरे लानके ताहीं उपर जाबैगो?’” 7या “और अपन मनमे अइसो फिर मत् कहियओ, कि ‘ख्रीष्टके मरे भए मैसे उपर लानके ताहीं पातालमे कौन उतरैगो?’”

8जा का कहात हए? तुम जा सन्देश तुमर मुँहुँसे स्वीकार और तुमर मनमे ग्रहण करसकत हओ, जा बो सन्देश हए जौन परमेश्वरमे बिश्वास करन सिखात हए, जो हम परचार करत हएं। 9काहेकी अगर तुम येशूके प्रभु हए कहिके अपनो मुँहुँसे आदमीनके अग्गु स्वीकार करोभओसे जिन्दा करीहए कहिके अपनो हृदयमे बिश्वास करे कहेसे परमेश्वर तुमके उद्धार देबैगो। 10काहेकी हम अपने हृदयमे बिश्वास करत हएं जहेमारे हम परमेश्वर द्वारा धर्मी घोषित करेजात हएं। और हम अपने मुँहुँके इस्तमाल करत हएं जा कहानके ताहीं, कि हम बिश्वास करत हए, और जहेमारे हम उद्धार पातहएं।

11काहेकी अगमबक्ता, यशैया ख्रीष्टके बारेमे पबित्र-शास्त्रमे लिखी हए, “जो कोइ बामे बिश्वास करैगो, बो कभी निरास नाए होबैगो।” 12यहूदी और ग्रीक भाषा मस्कन बारेमे कोइ फरक नाएहए। जहेमारे, कि परमेश्वर सबको प्रभु हए; और मदतके ताहीं बाके बुलान बारे सब उद्धार पातहए। 13काहेकी जा लिखो हए, “प्रभु बे सबके उद्धार करैगो जौन बाके नाउँसे मदत माँगैगो।”

इस्राएल देशके आदमी अच्छो समाचार अस्वीकार करीं

14लेकिन प्रभुसे मदत माँगनसे पहिले आदमीनके बामे बिश्वास करनके चाहो; और बिश्वास करनसे पहिले आदमीनके बाके बारेमे सुननके चाहो; और आदमी प्रभुके बारेमे सुननके ताहीं कोइ आदमीके प्रभुके बारेमे बतान चाहो। 15और कोइ आदमी परमेश्वरके बारेमे बतानसे पहिले बो आदमीके पठान चाहो। जहेमारे पबित्र-शास्त्र कहात हए, “अच्छो समाचार परचार करन बारेनको पाउँ कित्नो सुथ्रो हए!”

16पर बिन मैसे कोइ फिर अच्छो समाचारमे बिश्वास नाए करीं। यशैया अगमबक्ता कहात हए, “हे प्रभु, कोइ फिर हमर सन्देशमे बिश्वास नाए करीं।” 17जहेमारे बिश्वास तब्ही आतहए जब तुम सन्देश सुन्त हओ, और जा सन्देश ख्रीष्टके बारेमे बचन हए। 18पर मए जा पुँछत हओं, “का इस्राएल देशके आदमी ख्रीष्टके बारेमे सन्देश नाए सुनीं?” नेहात्तओ बे सुनीं हएं काहेकी पबित्र-शास्त्रमे लिखो हए,

“बाको बचन पुरा पृथ्वीमे

और पृथ्वीमे हर ठिहतक पुगीगए हएं।”

19मए फिरसे पुँछत हओं। का जा सत्य हए, कि इस्राएल देशके आदमीनके ख्रीष्टके बारेमे सन्देश समझमे आओ? हाँ, बे बुझडारी हएं। पहिले त प्रभु, मोशाके द्वारा जा कही,

“मए तुमके बेहीं जाति-जातिनसे जलन करबामंगो जो इस्राएल देशके नाए हएं,

मए तुमके बेहीं आदमीनसे गुस्सा होनको कारण बनामंगो

जौनन्के यहूदी मुरख सम्झत हएं।”

20तओ अगमबक्ता यशैया बडो सहाससे परमेश्वरके बारेमे कहात हए,

“मोके नाए ढुँणन बारे मोके पाइं और मोके ढुँणन बारेनके ठिन मए देखा पणो।”

21पर इस्राएल देशके आदमीके बारेमे परमेश्वर जा कहात हए, “मिर बात नाए मानन बारे और मेरे बिरोधमे उठन बारे आदमीनके मेरे ठिन घुमके आनके ताहीं मए दिनभर अपनो हात फैलाएके बुलाओ हओं।”

Currently Selected:

रोमी 10: THRNT

Highlight

Copy

Compare