उत्पत्ति 26
26
इसहाक क गरार मा रोहनो
1उका देश मा काळ पोड़्यो, यो उना पेहला काळो सी ओलोग हुतो जो अब्राहम क दाहड़ा मा पोड़लो हुतो। ओतरान कोरीन इसहाक गरार क पलीश्तीया क राजा अबीमेलेक क पास गुयो। 2हुयां योहोवा न ओको दोर्शन आपीन कयो, “मिसर मा मां जाय; जो देश हांव तुखे देखाड़ो तेना मा रोव। 3तु एना देश मा रोवे, आरु हांव तारे साते रोहीस, आरु तुखे बोरकोत आपीस; आरु यो आखो देश हांव तुसेक आरु तारी ओवलीयाद क आपीस; आरु जु वायदु मे तारा बाबा अब्राहम सी खादु होतु, चो हांव पुरो कोरीस। 4हांव तारे ओवलीयाद क वादळा क तारागण क जोसा कोरीस; आरु हांव तारा ओवलीयाद क यो आखो देश आपीस, आरु कोळी क आखी जातीक तारा ओवलीयाद क लारे सोयाव्वु मानायसे। 5काहकी अब्राहम मारी वात मान्यु, आरु जो हांव हेनाक आप्यु होतु हेनाक आरु मारी हुकुम, कायदा आरु व्यवस्था क पाळन कोर्यो।” 6ओतरान कोरीन इसहाक गरार मा रोय गोयु। 7जोत्यार हेना जागा क मानुस हेरी घोरवाळी क वारा मा पुछ्या, तोत्यार हुयु यो बीहिन वीचारीन की काहमाईन हांव इनुक मारी घोरवाळी कोहीस ती यां वाळा मानुस रीबका क लीय यी घोन घाटावी छे मेसेक मार देसे, जोपाप आप्यु, यी ते मारी बोहनीस छे (उत्प 12:12,13. 20:2) 8जोत्यार इसहाक क होंया रोहता बेस दाहड़ा वीत गोया, ती एक दाहड़ु पलीश्तीन राजा अबीमेलेक खिड़की मा सी छापिन काय देख्यु की इसाहक आपसी घोरवाळी रीबका क सात मोंग कोरने बाज रोयु। 9ती अबीमेलेक इसहाक क बुलावीन कोयु, होयी ते खोरी तारी घोरवाळी छे; ते वी तु काहा आपसी बोहनीस कोयु? इसहाक जोपाप आप्यु, “हांव यो वीचारलु की ओसो नी होवे की एरे जुगु मारी मोत होये।” 10अबीमेलेक कोयु, “तु आमरे सी यो काय कोर्यु? ओसो ते पोंचू मासी कोय तारी घोरवाळी क पुठी सहज सी कुकर्म कोर सोकतो, आरु तु आमुक पापो मा फोसाड़तु।” 11ओतरान कोरीन अबीमेलेक न आपसी आखी पोंचू क हुकुम आप्यो, “जु कोय एना मानुस निते एरी घोरवाळी क छीमसे, चो खोरी माराय जासे।” 12ओळतेन इसहाक न तेना देश मा जुप्यु वेर्यु, आरु तेनात साल मा सोव गुणा फोव कोमायु; आरु योहोवा न ओको बोरकोत आप्यु, 13आरु हुयो बोढ़्यो आरु ओकी उन्नती होयती रोही, यां लोगुन की हुयो बेस मोटु मानुस होय गोयु। 14जोत्यार हेरा गाडरा बुकड़ा, गाय बुईल, आरु बेसका चाखर्रीया होया, ती पलीश्ती हेनासी घाड़ाय कोरने लाग्या। 15ओतरान कोरीन जोतरा कुवा क हेरा बाबा अब्राहम क दास न अब्राहम जोवतलो हुतो ती खुंदला, तेनुक पलीश्तीन मानुस धुळा सी भोर देदा। 16ती अबीमेलेक न इसहाक सी कयो, “आमरेन चा रोहीन जात रोव; काहकी तु आमरे सी बेस मोटू होय गोयलु छे।” 17ती इसहाक होयां सी जात रोयु, आरु गरार क घाटी मा आपसु तंबु उबु कोरीन रोहने लाग्यु। 18ती जे कुवा ओको बाबो अब्राहम क दाहड़ा मा खुंदला होता, आरु अब्राहम क मोरने क वाद पलीश्तीन मानुस भोर देला, तेनुक इसहाक पोछू खुंदाड़्यु; आरु हेन्दरा चेत नाव राख्यु, जो हेरु बाबु पाड़लु। 19ओळतेन इसहाक क दासो क घाटी मा खुंद खुंदता उहवता जळ क एक झोर जोड़्यो। 20ती गरार क गुळाव्या न इसाहक क गुळाव्या सी लोड़ाय पाड़ला आरु कोया, “यो जळ आमरो छे।” ओतरान कोरीने हेना कुवा क नाव एसेक पाड़्या; काहकी हुये हेन्दरे सी लोड़ाया हुता। 21ओळतेन हुये दुसरु कुवु खुन्दया, आरु हेये हेना क लीय वी लोड़ाय कोर्या; ओतरान कोरीन हेये ओको नाव सित्ना पाड्या। 22ती हुये होयां गोथा निकोळीन एक आरु कुवु खुंदाड़्यु; आरु हेना वाटु हेये नी लोड़ाया; ओतरान कोरीन हुये ओको नाव यो कोवीन रहोबोत पाड्या, “हिमी ते योहोवा न आमरे लीय बेस जागु आपलु छे, आरु आमु एना देश मा फुले फलेंगे।” 23होयां सी हुये बेरसेबा जात रोया। 24आरु तेने दाहड़ योहोवा राती ओको दर्शन आपीन कोयो, “हांव तारा बाबा अब्राहम क परमेश्वर छे; मा बीहये, काहकी हांव तारे साते छे, आरु मारा दास अब्राहम क लीय तुसे बोरकोत आपीस, आरु तारा ओवलीयाद वोदाड़ीस।” 25ती हुयो होयां एक वेदी बोनायो, आरु योहोवा सी वीनता कोर्यो, आरु आपसु तंबु होयांत उबो कोर्यो; आरु होयां इसाहक क दासो न एक कुवो खुंदो।
इसहाक आरु अबीमेलेक क वीच सन्धि
26ती अबीमेलेक आपसा मुखी अहुज्जत आरु आपसा सेनापती पीकोल क सात लीन गरार सी ओका पास मा गयो। 27इसाहक न हेना सी कयो, “तु मार सी घाड़ाय कोर्यो तुमरे वीच मा सी निकाय देदलु, हिमी मारेनचां काहा आय रोयु?” 28हुयो कयो, “हामु ते प्रत्यक्ष देखला छे की योहोवा तारे साते रवे छे; ओतरान कोरीन आमु वीचार्या की तु ते योहोवा भीनी से सोयाव्वु छे, एने आमरे वीच मा वायदु खादा, आरु हामु तार सी इना वाराम वायदु बान्दे, 29की जसा हामु तुको नी छिम्या, पुन थारे साथ मा वारलोत् करला छे, आरु तुको शान्ती सी मोकलीया, हेकात् अनसारे तुको बी योहोवा सी बरकत जड़से करे।” 30ती हुयो हेनुक खाने आप्यु आरु हेये खादा पिदा। 31सोन्दारे हुये आखा वेगाद उठिन आम्बा साम्बा वायदु खादा; ती इसहाक न हेनुक वीदा कोर्यो, आरु हुये वारु खुशी सी ओका चां सी जोत रोया। 32तेने दाहड़े इसहाक क दासे आवीन आपसा खुंदला कुवा क वाराम कोया, “आमुक जळ क एक सोतो जोड़लो छे।” 33ती हुये ओको नाव शिबा पाड़्यो; एने कारण इना नगर क नाव आज लगुन बेरसेबा छे।
एसाव नी वीदेशी घोरवाळी
34जव एसाव चावीस साल क हुयो, ती त्यो ओकी हित्ती बेरी न बेटी यहुदीत, आरु हित्ती एलोन की बेटी बाशमत सी इयाव कोर लेदी; 35आरु इनु बाय क कारण इसहाक आरु रीबका क मन को बुरो लाग्यो।
Currently Selected:
उत्पत्ति 26: Dii25
Highlight
Copy
Compare
Share
Want to have your highlights saved across all your devices? Sign up or sign in
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025
