उत्पत्ति 25
25
अब्राहमन दिसरी ओवलीयाद
(1 इतिहास 1:32,33)
1ती अब्राहम न एक आरु लाड़ी बनायो जेरो नाव कतुरा हुतो। 2हेरेसी जीम्रान, योक्षान, मदान, मिद्यान, यिशबाक, आरु शुह पोयदा हुया। 3योक्षान सी शबा आरु ददान पोयदा हुया; आरु ददान क ओवलीयाद मा अश्शुरी, लतुशी, आरु लुम्मी लुग हुया। 4मिद्यान क पुर्या एपा, एपेर, हनोक, अबीदा, आरु एल्दा हुया, ये सब कतुरा की ओवलीयाद हुया। 5इसहाक क ते अब्राहम न आपसो आखो काय आप्यो। 6बाखुन अब्राहम आपसी रखेलीयो क पुर्या क काहीन आपीन आपसा जीवतात आपसा पुर्या इसहाक क पास सी उगेवनो देश मा मोकली देदो।
अब्राहम क मौत
(1 इतिहास 1:28-31)
7अब्राहम क पुरी ओमोर एक सोव पचहत्तर साल क हुयो। 8अब्राहम क डोबोल ओमोर होयने क कारण अर्थात् आखा डाहवारा क टेमे जीव छूट गयो, आरु हुयो आपसा मानषो मा जाय भेटायु। 9हेरा पुर्या इसहाक आरु इश्माएल न, हित्ती सोहर क पुर्या एप्रोन क मम्रे क ओगोळवाळी जागा मा, जी मकपेला क गुफा हुती, ओको गाड़्या; 10अर्थात् जु जागु अब्राहम न हित्तीयो सी मुले लेदो हुतो; ओकाज मा अब्राहम आरु ओकी लाड़ी सारा दुयो क गाड़ दिदा। (उत्पत्ती 23:16) 11अब्राहम क मोरने क वाद मा परमेश्वर न ओका पुर्या इसहाक क जु लहेरोई नावोन कुवा क पास रोहतो हुतो, बोरकोत आप्यो।
इश्माएल क ओवलीयाद
(1 इतिहास 1:28-31)
12अब्राहम क पुर्य इश्माएल जु सारा क मिसरी दासी हाजीरा सी पोयदा हुयो होतो, ओकी यि ओवलीयाद छे। 13इश्माएल क पुर्या क नाव आरु ओवलीयाद यि छे: अर्थात् इश्माएल क मोटलो पुर्य नबायोत, ओळी केदार, अद्बेल, मिबसाम, 14मिश्मा, दुमा, मस्सा, 15हदद, तेमा, यतुर, नापीश, आरु केदमा। 16इश्माएल क पुर्या ये ओतरात हुया, आरु ईनु क नावो क ओनसारे इन्दरो गाँव, आरु छावनियो क नाव वी पोड़्यो; आरु येत बारे आप आपसा कुक का डाहला हुया। 17इश्माएल क पुरी ओमोर एक सोव तीन कोम चावीस साल क हुयो; ती ओका जीव छूट गयो, आरु हुयो आपसा मानषो मा भेसकाय गोयो। 18ओका ओवलीयाद हवीला सी शुर लोगुन, जे मिसर क ओगोळ अश्शुर क वाटो मा छे, बोस गोया; आरु हेन्दरु वाटू ओका भाई बोन्या क ओगोळ पोड़्यो।
इसहाक क पुर्या क उबेजनेन वर्णन
19अब्राहम क पुर्या इसहाक क ओवलीयाद यी छे : अब्राहम सी इसहाक पुयदा हुयो; 20आरु इसहाक न चावीस साल क होईन रीबका सी, जी पद्दनराम क वासी, अरामी बतुएल क पुराय आरु अरामी लाबान क बहनीष हुती; इयाव कोर लेदु। 21इसहाक क लाड़ी वान्टी होती, ओतरान कोरीन हुयो हेरा योहोवा सी वीनता कोर्यो; आरु योहोवा न ओकी वीनता सोमळीयो, ओसकोरीन ओकी लाड़ी रीबका भारपाये होयी 22पुर्या ओका पेटो मा आम्बासाम्बा थाबाईन एक दीसरा क कुटने लाग्या। ती हुयी कोहि, “मारी जी ओसी वेला रोहसे ती हांव कोसी जोवत्ली रोहिस?” आरु हुयी योहोवा क मोरजी पुछने क गोय। 23ती योहोवा न हेनी सीइ कयो, “तारा पेटो मा दुय जाती छे, आरु तारा कुखो सी जोसा निकोळसे दुय राज्य क मानुस आंग्ये होयसे, आरु एक राज्य क मानुस दुसरा सी वोदु ताकोतवाळा रोहसे, आरु मोटलो पुर्यु नानला क होको मा रोहसे।” 24जोत्यार हेरो पोखड़ायने क टेम आयो, ती काय देखा पोड़्यो की ओका कुखो मा जोवळीया पुर्या छे। 25पेहलु जु पोयदा होयु चू रातलु निकोळ्यु, आरु ओको आखो डील काम्बवा क जोसो रोममय हुतो; ओतरान कोरीन ओको नाव एसाव पाड़्या। 26पोछोळ ओको भाई आपसा हातो सी एसाव क पायोनपाटली क धोरीन पोयदा हुयो; आरु ओको नाव याकुब पाड़्या। जोत्यार रीबका न हेनुक जोन्म देदी ती इसहाक साठ साल क हुतो। 27ओळतेन हुये पुर्या मोटा होयने लाग्या, आरु एसाव ते जोन्गोलो मा रोहीन चतुर शिकार खेलनेवाळो हुय गोयो, बाखुन याकुब सुदो मानुस हुतो आरु तोम्बुत मा रोया कोरतु होतु। 28इसहाक एसाव क अहेर क मांस खाया कोरतो हुतो, ओतरान कोरीन हुयो हेनासी मोंग रोखतो हुतो; बाखुन रीबका याकुब सी मोंग राखती हुती। 29एक दाहड़ो याकुब खाने क लीय काहीन दाळ चुड़ेवतु होतु; आरु एसाव जोन्गोल सी घाबरायीन आयु। 30ती एसाव न याकुब सी कयो, “हुयी जी रातली चीज छे, हेनी रातली चीजों मासी मेसे काहीन खावाड़, काहकी हांव घाबराय रोयु।” ओस कोरीन हेरो नाव एदोम वी पोड़्यो। 31याकुब न कयो, “आपसा पहिलौठेक होक आज मारे हातोम वेच दे।” 32एसाव न कयो, “देख, हांव ते हीमी मोरने पोर छे : ओतरान कोरीन पहिलौठे क होक सी मारो काय फायदु होयसे?” 33याकुब न कयो, “मार सी हीमी शपथ खा,” अत: हुयो हेना सी शपथ खादो, आरु आपसा पहिलौठा क होक याकुब क हात वेच देदो। 34इना पोर याकुब न एसाव क रुटा आरु चुड़वली मसुर की दाळ आप्यो; आरु हुयो वी खादा पीदा, आरु उठीन जात रोयो। यो एसाव न आपसो पहलौठे क होको क भुण्डोत जान्यो।
Currently Selected:
उत्पत्ति 25: Dii25
Highlight
Copy
Compare
Share
Want to have your highlights saved across all your devices? Sign up or sign in
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025
