उत्पत्ति 21
21
इसहाक क जन्म
1योहोवा जसो कयो तसोत सारा क फोम राख्यो की ओका सात आपनो बुल क ओनसारे करीयो। 2सारा अब्राहम सी भारेपाय होयी; आरु हेरा डाहवारा मा ओको नावाड़ले टेम पोर जु परमेश्वर तेनाक टाकलो हुतो, एक पुर्य होयो।#इब्रानियों 11:11 3अब्राहम न हेरा पुर्या क नाव जो सारा सी पोयदा होयो थो इसहाक पाड़्यो। 4आरु जोत्यार ओका पुर्य इसहाक आठ दिन क होयो, ती हुयो परमेश्वर क हुकुम क ओनसारे अब्राहम हेको खतनो करीयो। 5जोत्यार अब्राहम क पुर्य इसहाक पोयदा हुयो ती अब्राहम एक सोव साल क थो। 6आरु सारा न कयी, “परमेश्वर न मक घोनो खुश कोरलो छे; ओतरान कोरीन आखा सोमळनेवाळा वी मार सात मा खुश होवसे।” 7ओळी हुयी यो वी कोहि, “काय कुदु कदी अब्राहम सी कय सोकतो हुतो की सारा पुर्या क दुद पावसे? बाखुन देखु, मारसी ओका डाहवारा मा एक पुर्य पोयदा हुय गोयो।” 8चो पुर्य मोटो हुयो आरु ओको दुद छुड़ाय देदा; आरु इसहाक क दुध छुड़ावने क दाहड़े अब्राहम न मोटो भोज कोर्यो।
हाजीरा आरु इश्माएल क निकाळ्नो
9ती सारा क मिसरी हाजीरा क पुर्य, जो अब्राहम सी पोयदा हुयो थो, हासतलो देखा पोड़्यो। 10ओस कोरीन हुयी अब्राहम सी कयो, “इनी दासी क पुर्या भेळ नीकाय दे; काहकी इनी दासी क पुर्य मारा पुर्या इसहाक क सात नी भेसकायसे।”#गलातिया 4:29-30 11यी वात अब्राहम क आपसा पुर्या क कारण बेस भुण्डी लागी। 12बाखुन परमेश्वर अब्राहम सी कयो, “हेना पुर्या आरु आपसी दासी क कारण भुण्डो नी लागे; जी वात सारा तुसे कोहि, तेनीक मान, काहकी जी तारी ओवलीयाद कोवायसे ची इसहाक सीत चालसे।#रोमियो 9:7 13दासी क पुर्या सी वी मे एक जाती उबजाड़ीस, ओतरान कोरीन की हुयो तारो ओवलीयाद छे।” 14ओतरान कोरीन अब्राहम न वेगोत उठिन रुटा आरु पानी सी भरलो चामड़ा क थयलो वी हाजीरा क आप्यो, आरु ओका कान्धा पोर मेल्यो, आरु ओका पुर्या क वी हेनीक आपिन ओको मोकोळी देदो। हुयी जात रोय, आरु बेरसेबा क जोन्गोल मा वाहरायने लागी। 15जोत्यार थोयली मा वाळो पानी सोर गोयो, ती हुयी पुर्याक एक झाड़ो तोळे छेड़ देदी। 16आरु हुयी हेना सी थुड़ी नाम्बे जाईन ओका वाराम यो वीचारीन बोठ गोय, “मेसे पुर्यान मोत देखनो नी पोड़े।” ती हुयी ओका सामने बोठीन आयड़ी आयड़ीन रोड़ने वाज गोय। 17परमेश्वर न हेना पुर्या क सोमळ्यो, आरु ओका दुत न सोरोग सी हाजीरा क आयड़ीन कया, “हे हाजीरा, तारे काय होय गोयो? मा बीहये; काहकी जा तारु पुर्यु छे चां सी ओकी ओवाज परमेश्वर क सोमवली छे। 18उठ, आपसा पुर्या क चूट आरु आपसा हात सी सोमाळ; काहकी हांव ओका द्वारा एक मोटी जाती बोनावीस।” 19ती परमेश्वर न ओका डुळा उगाड़ दिदो, आरु ओको एक कुवो देखा पोड़्यो; ती हुयी जाईन थोयली क पानी भोरीन पुर्या क पावी। 20आरु परमेश्वर हेना पुर्या क सार रोयो; आरु जव हुयो मोटो होयो, ती उजाड़ बयड़ा मा रयीन रोहीन धनुर्धारी बोन गोयो। 21हुयो पारान नावोन जोन्गोल मा रोहतो हुतो; आरु ओको आईश् न ओक लीय मिसर देश सी एक बायोर मांगाड़ी। 22तेनु दाहड़ा मा ओसो हुयो की अबीमेलेक आपसा सिपायड़ा पीकोलक सात लीन अब्राहम सी कोहने लाग्यो, “जो तु काय कोरे ओका मा परमेश्वर तारे साते रोवे; 23ओतरान कोरीन हीमी मेसे यां इना वारामां परमेश्वर क शपथ खाय की तु नी ते मार पुठी धुकु कोरीस आरु नि ते कोदी मेरा होको सी कोरीस, बाखुन जोसी गीन हांव तार पोर कोरलु तोसुत तु मार पोर आरु एना देश पोर वी, जीनामा तु रोहे, कोरजी।” 24अब्राहम न कयो, “हांव शपथ खाईस।” 25ती अब्राहम न अबीमेलेक क एक कुवा क वारा मा जो अबीमेलेक क दासो न ताकोतसी ली लेदा होता, उलाहना आप्यो। 26ती अबीमेलेक न कयो, “हांव नि जानो की कुन यो काम कोर्यो; आरु तु वी मेसे नि कोयु, आरु नी हांव आज सी पेहेल इना वाराम काय सोमळ्यु।” 27ती अब्राहम न गाडरा बुकड़ा आरु गाय–बुईल अबीमेलेक क आप्यो; आरु हिये दुयु आम्बा साम्बा वायदु कोर्या। 28अब्राहम न गाडरा क सात पुर्या ओलोग मेल्यो। 29ती अबीमेलेक न अब्राहम सी पुछ्यो, “ईनु सात पिला क, जो तु नेवाड़ रोयु, काय कोरीस?” 30हुयो कयो, “तु इनु सात गिदल्या क इने वाते गोवा जानीन मारा हातो सि ली के हांव यु कुवु खुंदलु छे।” 31हुये दुयु जे हेना जागा मा आपसा शपथ खादला, ओतरान कोरीन हेना जागान नाव बेरसेबा पोड़यो। 32जोत्यार बेरसेबा मा जोत्यार वाचा बान्धे, ती अबीमेलेक आरु ओको सिपायड़ो पीकोल उठीन पलीश्तीयो क देश मा पोछा गोया। 33ओळतेन अब्राहम न बेरसेबा मा झाऊ क एक झाड़ लागाड़्या आरु होया योहोवा सी जो जलमको परमेश्वर छे वीनता करीयो। 34अब्राहम पलीश्तीयान क देश मा घना दाहड़ा लोगुन हुलक्र्यु रोयु।
Currently Selected:
उत्पत्ति 21: Dii25
Highlight
Copy
Compare
Share
Want to have your highlights saved across all your devices? Sign up or sign in
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025
