उत्पत्ति 20
20
अब्राहम आरु अबीमेलेक
1ओळतेन अब्राहम चा सी निकोळीन दोखेवरे देश मा अवीन कादेश आरु शुर क वीच मा रुकायो, आरु गरार मा रोहने लाग्यो। 2आरु अब्राहम न आपसी लाड़ी साराक वारा मा कयो, “हुयी मारी बोहनीस छे,” ओतरान कोरीने गरार क राजा अबीमेलेक न दुत मोकलीन सारा क बुलाय लीदो। 3रात क परमेश्वर न सोपना मा अबीमेलेक क पास आवीन कयो, सोमोळ। जेनी बायोर क तु राख लेदलु छे ओको कारण तु मोर जाईस काहकी हुयी सुहागिन छे। 4बाखुन अबीमेलेक हेरेन्चा नी गयो हुतो; ओतरान कोरीने हुयो कयो, “हे पोरबु, काय तु वीनगुणाकी जाती क वी मार दीस? 5काय होयोत खुद मारे सी नी कोयो, ‘यि मारी बोहनीस छे?’ आरु हुयी बायर वी खुद कोहि, ‘यु मारु भाईश छे’ हांव ते मारा मोनोन सुदो आरु मारा व्यवहारोन क छाचो यो काम करीयो।” 6परमेश्वर न हेनासी सोपना मा कयो, हाव्, हांव वी जानो की आपना मोनो क खोराई सी तु यो काम कोरलु छे, आरु हांव ते तुखे रुकीन राख रोयु की तु मारे वीरुद्ध पाप नी कोरे; ओतरान कोरीन मे तुसेक हेनीक छिमने नी देतु। 7ओतरान कोरीन हीमी हेना मानुसक लाड़ी क हेना पोछू आप दे; काहकी हुयु कागळीयो छे, आरु तारे लीय वीनता कोरसे, आरु तु जीवत्लु रोहिस; बाखुन तु हेनाक नि पोछू आपे ती फोम राखजी की तु आरु जोत्रा मानुस छे, आखा छाचीन मोर जासे। 8सबेरे अबीमेलेक न तड़के उठीन आपसा कामकोरन्याक बुलावीन यो आखाक वात सोमवाळ्यु; आरु चे मानुस बेस बीही गोया। 9ती अबीमेलेक न अब्राहम क बुलावीन कयो, “तु न मारा सार यो काय करीयो? हांव तरो काय बिगाड़ु की तु मारा आरु मारा राजो क उपर ओसो मोटो पाप नाख देदो छे? तु मारा सात चो काम करीयो जो वारु नी हुतो।” 10ओळी अबीमेलेक न अब्राहम सी पुछ्यो, “तु काय सोमझीन ओसो काम सोयो?” 11अब्राहम न कयो, “हांव यो सोच्यो हुतो को इना जागा मा परमेश्वर क काय वी बीक नि रोहसे; ओतरान कोरीन ये मानुस मारी लाड़ी क कारण मेखे मार देसे। 12एर सिवाय छाचीन यी मारी बोहनीस छे; हुयी मारा बाबान पुराय ते छे, बाखुन मारी आयान पुराय नी; ते वी हुयी मारी लाड़ी होय गोय। 13आरु ओसो हुयो की जोत्यार परमेश्वर न मको आपस बाबा क घोर छुड़ीन निकोळने क हुकुम आप्यो, ती हांव ते ओको कयो, ओतरी गीन तारी मार पोर कोरनो पोड़से की हामु जां–जां जाजे चां–चां तु मारा वाराम मा कहनो की यो मारो भाईष् छे।” 14ती अबीमेलेक न गाडरा–बुकड़ा, गाय–बुईल, आरु दास–दासीया लीन अब्राहम क आप्यो, आरु ओकी लाड़ी सारा क वी हुयो पोछो आड़ दिदो। 15आरु अबीमेलेक न कयो, “देख, मारो देश तारे सामने छे, जां तुसे पोटे चां रोव।” 16सारा सी हुयो कयो, “देख, हांव ते तारा भाष्यो क रूप्यान एक होजार भुकरा आपलो छे। देख, तारा आखा संगियो क सामने हुयोत तारो डुला क पोरदो बोनसे, आरु सभो क ओगोळ त वारु होईस।” 17ती अब्राहम न योहोवा सी वीनता करीयो की, आरु परमेश्वर अबीमेलेक, आरु ओकी लाड़ी आरु दासीया क आरगा कोर्यो आरु चे आरगा होय गोया। 18काहकी योहोवा न अब्राहम क लाड़ी साराक कारण अबीमेलेक क घोर क आखा बायरा क कुखों क पुरे रीते सी बोन्द कोर दियो हुतो।
Currently Selected:
उत्पत्ति 20: Dii25
Highlight
Copy
Compare
Share
Want to have your highlights saved across all your devices? Sign up or sign in
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025
