KIEBEXELU 9

1YI mwangele amutano akakuma mpungi ; yi nakamona mutoto ămapona mu diulu pôi loboko ; yi lufungula lwa dina twakô lwakamupebwa, 2yi akadipula dina twakô ; yi mu dina mwakaximuna munyinga, luna munyinga ă dilungu dinene dia mudilu ; yi diba diakapindixibwa, yi mwoxixi kulu, bwalo bwa munyinga ă dina.

3Yi munda mwa munyinga mwakabatuka minkumbi ku loboko ; yi bumanya bwakayipebwa luna bidi tuminyi twa loboko yi bumanya. 4Yi bakakwambidibwa ene, kabatatixi bilo bia loboko ndo kidibwa kioso kidi mai, ndo muci mwoso kumoni ; mo bantu baba batupu batena yi kilembetelu kia Ncembi ku mpala yabo. 5Kwakabapebwa lolo ene, Kababaxipi ; kate batatixibwi ngondo itano ; yi kusama kwabo kwakadi bea kusama kwa kaminyi papusumako muntu. 6Ku matuku yia kunapalala bantu lufu, kate kabanalusañana pô, yi banakyeba kufwa mo lufu Iwamabacina lubilu.

7Yi bifwanisa bia minkumbi biakadi luna tubala twamalungikibwa ku bwalo bwa mbita ; yi ku micwe yabo luna bilongo bia olo, yi mpala yabo yakadi luna mpala ya bantu. 8Yi bakadi yi nyonyi luna nyonyi ya babakaxi, yi meno abo luna meno a ntambwi. 9Bakadi yi bibukilu bia biedi luna bibukilu bia kidimadima ; yi mulaku ă bipambwi biabo ăkadi luna mulaku ă bicwadilu bia tubala tungi tungi tudi mu kuya mbilu mbilu ku mbita. 10Bakadi yi miexi luna miexi ya tuminyi, yi bisuminu ; yi mu miexi yabo mudi bumanya bwabo bwa kutatisa bantu ngondo itano. 11Bakadi yi fumu kulu kwabo, mwangele a dina twakô ; udi yi dina dienci dia luna Ebeleo ene, Abadono ; yi udi yi dina dia luna Ngiliki ene, Apoliono.

12Mpeya a buxi amadika ; mona, minga mpeya ibidi yikilolwa kabidi.

13Yi mwangele amusambomo akakuma mpungi ; yi nakakwombwa diyi ku xiba inai ya kilongolelu kia ôlo kidi ku mpala a Ncembi ; 14diakatôyela mwangele amusambomo akadi yi mpungi ene, Sula bangele banai bamasukibwa ku ncedi munene a Ufulatese. 15Yi bangele banai bakasudibwa, bakadi bamalungikibwa bwalo bwa kikondo kia ola umoumwe yi dituku yi ngondo yi mbula muncima, bixexipabo kicini kimokimwe kia bicini bisatu bia bantu. 16Yi lubadi lwa miebanga ya bena tubala lwakadi binunu bia binunu bibidi. Meme nakakwombwa lubadi lwabo. 17Yi nakamona tubala mo nako mu kiebexelu, yi bobo bakaxikama kulu kwatu. Bakadi yi bibukilu bia biedi bia mumbidi ă mudilu, yi bia yasinti yi bia sulufa ; yi micwe ya tubala yakadi luna micwe ya ntambwi, yi ku misuku yabo kwakabatuka mudilu yi munyinga yi sulufa. 18Ku masama aa asatu ndo kwakaxipibwa kicini kimokimwe kia bicini bisatu bia bantu ; ku mudilu, yi ku munyinga, yi ku sulufa, biakabatuka ku misuku yabo. 19Bwalo butani bumanya bwa tubala mu misuku yatu yi mu miexi yatu ; bwalo budi miexi yatu luna miexi ya nyoka, idi yi micwe ; yi kudiyo ndo kwatatisatu.

20Yi bantu bakasala, bakadi kabasoxipibwa ku masama aa, bakadi kabasodibela bwalo bwa makisa a makaci abo, bitaxexingilabo bidimu bibi yi ngixi ya ôlo, yi ya mpalata, yi ya kiengele, yi ya mabwe, yi ya mici ; yitabiyi ndo kumona, ndo kwombwa, ndo kwenda kumoni. 21Yi bakadi kabasodibela bwalo bwa monda akakwondabo, ndo bwa maloxi abo, ndo bwa mendela akakwendelabo, ndo bwa misaka yabo kumoni.

Currently Selected:

KIEBEXELU 9: Luna_NT

Highlight

Copy

Compare