KIEBEXELU 11

1YI lukaku lwakangupebwa luna mulangala, yi yei ene, Bika, elekyesa lwedi lwa tempelo a Ncembi, yi lwa kilongolelu, yi bantu baxingila momu. 2Yi lekyela lumbu lutani kunci kwa tempelo, kulwelekyexi ; bwalo bwamalongebwalu mabila, yi bananyata bula bwa babala muxi mwa makasa abo ngondo masangi anai yi ngondo ibidi. 3Yi nakupa batobôdi bamene ngulu, yi banatôbôla ntôbô lokone lwa matuku yi matuku nkama ibidi yi masangi asambomo, balete makutu. 4Baba badi mici ibidi ya olife yi minda ibidi yamakwemana ku mpala a Fumu a loboko ; 5yi ndo muntu mwoso amakyeba kubencela bubi, mudilu ndo ămabatuka ku misuku yabo yi ămapisa bantu bamatanda yinabo. Yi ndo muntu mwoso amakyeba kubencela bubi, uxexipibwa mo nako. 6Baba badi yi bumanya bwa kuncibika diulu, bitaxeloka mbula ku matuku a kidimuxilu kiabo ; yi badi yi bumanya kulu kwa mai ndo kwakulumuna ku maxi, yi bwa kukuma loboko yi masama moso dituku dioso dianangabo.

7Yi panakala bamamana ntôbô yabo kutôbôla, Nyama you amaximuna mu dina twakô unatanda yinabo mbita yi unabapidila, yi unabaxipa. 8Yi mimbidi yabo mifu yinalala mu mwolongo ă bula bobu bunene, bwamabikidibwa yi mubikidilu ă Mwoxixi ene, Sodomo, yi Ecipito, bwakakopekyebwa koku kabidi Fumwabo ku nkulusu. 9Yi banamona mimbidi yabo mifu kudi bantu yi kudi malungu yi kudi ndimi yi kudi mabila, matuku asatu yi dimo dituku pakacikaci ; yi kabasonanga mimbidi yabo yincikibwi mu nkita. 10Yi bobo bamaxikama ku loboko bamaxekyelela ku bwalo bwabo yi banakala yi kiango, yi banatumañana malongi ; bwalo bwakanyingisa badimuxi baba babidi bantu bamaxikama ku loboko.

11Yi kunyuma kwa matuku asatu yi dimo dituku pakacikaci, mwoxixi ă moya ăkababwela kudi Ncembi, yi bakakwemana ku makasa abo ; yi bowa bungi bwakakwata bantu bakadi mu kubatebela. 12Yi bakakwombwa diyi dikola dia mu diulu didi mu kubambila ene, Nuximuni kunu. Yi bakaximuna munda mwa diulu ku dibaxi ; yi bantu bakatanda yinabo bakabatebela. 13Yi ku ola you kwakadi kutepa kunene kwa loboko, yi kicini kimokimwe kia bicini bisatu bia bula kiakapona paxi ; yi mena a bantu akadi nkone sambwali bamaxipibwa ku kutepa kwa loboko. Banga lolo bakakwolubila bixesa, yi bakatumbisa Ncembi a diulu.

14Mpeya amubidi amadika ; mona mpeya amusatu ulolwa mangwoso.

15Yi mwangele a sambwali akakuma mpungi ; yi mu diulu mwakadi meyi akola, akatôya ene, Bufumu bwa loboko budiko, bwa Fumwecu yi Kalistu anci, yi yei unakala yi bufumu bwanci ku mieciya ya mieciya. 16Yi babakulu masa ngi abidi yi banai, bamaxikama ku nkwasa yabo ku mpala a Ncembi, bakapona mpala muxi yi bakaxingila Ncembi 17ene, Tukwaxingila biloba, Fumu Ncembi, Ncembi Xadai, You udiko, yi akadiko, bwalo bwamangata ngulu yebe minene, yi bwalo bwamangata bufumu bwebe. 18Mabila akadi yi bisusu, yi bisusu biebe biamalwa, yi kikondo kia bafu kusambolebwa, yi kikondo kia kusayila basadi bebe sayi badi badimuxi ; yi bena babala, yi bobo bacina dina diebe yi babende yi banene ; yi kikondo kia kuxipa bantu bamaxipa loboko.

19Yi tempelo akadipudibwa a Ncembi a mu diulu, yi muxete ă disambi dienci ăkamonebwa mu tempelo anci ; yi misadi ya kapenya yakalwa, yi meyi, yi makongola, yi kutepa kwa loboko, yi mabwe a mbula mangi mangi.

Currently Selected:

KIEBEXELU 11: Luna_NT

Highlight

Copy

Compare