YAKOBO 1

1YAKOBO, musadi a Ncembi yi a Fumu Yisu Kalistu, kudi malungu disangi yi abidi adi Lucakacaka, môyo ěnu.

2Nubali bwalo kiango kitupu, bakunyi bamene, panwapona mu bielekyexelu bia ntonga yi ntonga ; 3bwalo bunwalubukwa ene, kiebexelu kia kwetabusa kwenu kiamakwenca bwika. 4Mo bwika bwakali yi mudimo ăbu dyendeli, binuxeakala nwamakuka, yi nudi bileli, kutena kusaka yi kintu kioso.

5Mo ndo muntu enu mwoso amasaka yi bwinu, alombi kudi Ncembi upapa bantu boso bintu yi mucima ă loko, yi kasokama măkamu ; yi bunamupebwa. 6Mo alombi yi kwetabusa kutena mwoxituxitu mwoso ; bwalo budi muna mwoxituxitu bea diele dia mai manene diamakwendexebwa kudi lupepele, yi diamatepexebwa. 7Muntu you noku kakixi ene, unangata kintu kioso kudi Fumu ; 8muna nkanyi ibidi amacingacinga mu miesambu yenci nioso.

9Mo mwakunyi mubende ani mwanu bwalo bwa kubandixibwa kwanci ; 10yi mwodidi ani bwalo bwa kupwexebwa kwanci ; bwalo bunadikayi bea disusu dia bilo. 11Bwalo bwamabanda diba yi kilungu kia mudilu, yi diamakwomesa bilo ; yi disusu diabio diamapona paxi, yi lwoxixi lwa butonga bwadio lwamafwa ; mo nako kabidi kunakwoma mwodidi mu ncila yenci mioso.

12Mulwangwasanibwi ndo mwamulumi you udi yi bwika mu bielekyexelu ; panakaia amakwalakanibwa, unangata kilongo kia môyo kiamabaxiyila Fumu kilaka bamwananga.

13Muntu katôyi pa kwelekyexebwa ene, Namakwelekyexebwa kudi Ncembi ; bwalo butena Ncembi yi kielekyexelu kia kwelekyexebwa ku malo mabi, yi yei mikyenci kasokwelekyesa muntu mwoso. 14Momuntu mwoso amakwelekyexebwa panakala amasomonebwa, yi amapucibwa bea ku lundolu, ku luxindilu lwanci mikyenci. 15Kunyuma, luxindilu panakala lwamakwembita, ludi yi bubi ku mwana ; yi bubi, panakala bwamalunda, bwamalela lufu. 16Kanuungixibwi, bakunyi bamene banangibwi. 17Kupa kwoso kunengela, yi dilongi dioso diamalelekyela, biamalwa kulu, biamapweka kudi Tete a obo mioso. Munda mwanci kamuna mucimbucimbu pô, ndo mudingidingi ă yilayila. 18Ku nyinga yenci mikyenci ndo kwakatulelayi ku diyi dia sôsôlwo, bituxeakala luna somo a buxi a bipangu bienci.

19Nwalubukwa noku, bakunyi bamene banangibwi. Mo muntu mwoso akali yi lungwoso lwa kwombwa, yi bukodyu bwa kutôya, yi bukodyu bwa bisusu ; 20bwalo butasokwenca bisusu bia muntu nkwami ya Ncembi. 21Mbwôso nwekyeyi mbindu mioso, yi mwoxingi ămapulcwa ku bungi, yi nwangati diyi yi diedya diamasokyeyebwa munda, dibili kupandisa micima yenu. 22Mo nwakali bakixi ba diyi, yi kumoni bombwi batupu, nudi mu kudidimba mikyenu. 23Bwalo ndo muntu mwoso udi mwombwi a diyi yi kumoni mukixi, udi luna muntu amatebela mpala anci mu diba ; 24bwalo bwamaditebelayi mikyenci, yi amancuka, yi amakwelwa mangwoso butonga bwa muntu budiyi. 25Mo you amatebela mu mulangu ou ămakuka, ou ă bwana bwa bula, yi amaxina yinau, yi kiena mwombwi amakwelwa bwilwa, kate mukixi amakisa mudimo, muntu you unalwangwasanibwa ku kukisa kwanci. 26Aka muntu mwo so udi yi mpala a muna kixingilu, mo kasoximba ludimi lwanci kate amadimba mucima ănci, kixingilu kia muntu you kidi kanana. 27Kixingilu kia babala kitena mbindu ku mpala a Ncembi Tetecu kidi noku ; kuxexela bana ba xiyi yi bakaxi ba bafu mu buxitu bwabo, yi kudinama mikyenci ku loboko kutena kantobo.

Currently Selected:

YAKOBO 1: Luna_NT

Highlight

Copy

Compare