YAKOBO 2

1BAKUNYI bamene, kanwakadi yi kwetabusa kwa Fumwecu Yisu Kalistu, Fumu a dikai, yi kuyila kwa kikanda. 2Akali muntu amabwela mu kixingidilu kienu udi yi kikyeta kia ôlo yi bilamba bia dikai dingi, yi mwokombi amabwela kabidi udi yi bilamba bia kanana ; 3yi nonu nwelela you meso amalata bilamba bia dikai dingi yi nwamatôya ene, Xikama owe kunu ku kidi kinengela ; yi nwamatôyela mwokombi ene, Emana owe koku, ndo ene, Xikama muxi mwa katanda kamene ; 4ki nudi mu kuxiyañanisa bantu kunudi, yi nwamafwa basambodi badi yi nkanyi mibi ? 5Nwombwi, bakunyi bamene banangibwi. Ki Ncembi amasungula bakombi ku bwalo bwa loboko lolu, bena madidi ku bwalo bwa kwetabusa, bena miekito ba bufumu bwamabaxiyilayi kilaka bamwananga ? 6Mo nonu nwamakisa mwokombi lukisu. Ki bena madidi bamanufina ñna ? Ki mikyeabo bamanuputulula ku bimu ? 7Ki bamatangola Dina dedi dia kinemu diamatambibwa kulu kwenu ? 8Kaninga ndo nwanama bwadi bwa bufumu luna biamatôya mukanda ă Ncembi ene, Unananga muna kwebe bea mikyebe, nwencenca loko ; 9mo ndo nwamayila bantu kikanda, nudi mu kukisa bubi, yi nwamakwebexebwa boni ku bwadi. 10Bwalo ndo muntu mwoso unanama bwadi buncimancima, kaninga ndo unapona ku diyi dimodimwe, amalwa muna bwalo ku mucwe ă bungi bwabu. 11You akatôya ene, Kwendedi mukaxi abene, akatôya kabidi ene, Kuxipi. Akali lolo owe kusokwendela mukaxi abene, mo ndo wamaxipa, wamalwa mwoni a bwadi. 12Nutôyi nako, yi nukisi nako, bea bantu bamalanda kusambolebwa ku bwadi bwa bwana bwa bula ; 13bwalo bunabelebwa you lopelo lutena mwengo utasokwebesa mwengo. Mwengo ndo ănana mwanu ku mpala a lopelo.

14Kutetowa kudi beci bakunyi bamene, ndo muntu amatôya ene, udi yi kwetabusa, mo kiena yi makisa ? Kwetabusa kubili kumupandisa ? 15Akali muna kwenu a babalumi ndo a babakaxi udi yi butaka, yi amasaka yi bidya ku dituku ku dituku, 16yi munga muna kwenu amabambila ene, Nuyi polo ; nwoti mudilu, nwokuti ; mo kasobapela bintu biamasakabo bwalo bwa mumbidi, kutetowa kudi kupai ? 17Mo nako kwetabusa, ndo kakuna yi makisa, kudi kufu pabwaku. 18Kate munga unatôya ene, Owe udi yi kwetabusa, yi meme ndi yi makisa ; ungwebesi kwetabusa kwebe kutena makisa, yi meme nakukwebesa kwetabusa kwamene ku makisa amene. 19Wamakwetabusa ene, Ncembi udi umoumwe. Wamakwenca loko. Bidimu bibi kabidi biamakwetabusa, yi biamaxixumuka. 20Mo owe wananga kulubukwa, muna kimbombo, ene, kwetabusa kutena makisa kudi kufu ? 21Ki Abalami tetecu akasuwixibwa ku makisa pakadi amalongola Isaka mwananci kulu kwa kilongolelu ? 22Wamona mwakakwencañana kwetabusa yi makisa anci, yi ku makisa kwakakukixibwa kwetabusa kwanci. 23Yi mukanda ă Ncembi ăkafikixibwa ămatôya ene, Abalami akakwetabusa Ncembi, yi kwakamubadidibwa nkwami ; yi akabikidibwa ene, Kimbila kia Ncembi. 24Nwamona, ku makisa ndo kwamasuwixibwa muntu, yi kumoni ku kwetabusa kutupu. 25Ki noku kabidi Layaba mudibi akasuwixibwa ku makisa, pakadi amangata mikyenci yi amababatusa munga ncila ? 26Bwalo bea bidi mumbidi mufu utena yi kidimu, ndo bidi kwetabusa kufu kabidi kutena makisa.

Currently Selected:

YAKOBO 2: Luna_NT

Highlight

Copy

Compare