EBELEO 7

1MELEKISEDEKYE you, Fumu a Saleme, bokanda bwa Ncembi adika kulu,—yei akapomana yi Abalami pakapiñanayi ku kuxipa kwa bafumu, yi akamulwangwasana. 2Kudiyi ndo kwakapa Abalami kabidi mulambu ă dikapa dimodimwe dia makapa disangi dia bintu bioso ; akadi ku buxi, pa kusakolebwa, ene, fumu a nkwami, yi kunyuma lolo, fumu a Saleme, kulexi yi kutôya ene, fumu a polo ; 3kutena tete, kutena mama, kutena mukanda ă bakakanci ; akadi kiena yi ndo bubangabanga bwa matuku ndo yi ku sula kwa môyo, mo amatekyebwa yi bufwani bwa Mwana a Ncembi, kayou amasala bokanda kangala kangala.

4Nweli pako bunene bwa muntu you nkanyi, akapa Abalami kakyecu mulambu ă makapa a bintu binene disangi disangi bia lusancu. 5Yi bobo sôsôlwo badi bana ba Lebi badedya bubokanda, badi yi mulangu ă kwangata mulambu ă makapa kudi bantu, luna biamatôya bwadi ; kudi bena kwabo, isanga bamabatuka mu makondo a Abalami ; 6mo you utasoakala yi mukanda ă bulungu bwabo amangata mulambu ă makapa kudi Abalami, yi amamulwangwasana akadi muna bilaka, 7Mo kutena mbata mwoso, muntu mubende amalwangwasanibwa kudi muntu umwadika kunengela. 8Kunu lolo, bantu bafofwa bamangata mulambu ă makapa ; mo koku, you amatôbôlelebwa ene, udi yi moyo. 9Yi ndo kutôya noku, isanga Lebi, amangata mulambu ă makapa, amafuta mulambu ă makapa kabidi munda mwa Abalami ; 10bwalo bwakadiyi ukidi mu makondo a tetenci pakapomana Melekisedekye yinanci.

11Akali lolo kukuka dyendeli kuxelwa ku bubokanda bwa buna Lebi, (bwalo bwakapebwa bantu bwadi ku mucwe ă bubokanda bobu), ku bwalo kai kuxekwemana bunga bokanda bwa butonga bwa Melekisedekye, butasobadibwa muna butonga bwa Alono ? 12Bwalo bwamabambibwa dibambu, pa kukulumunibwa bubokanda, dia kukulumuna kabidi bwadi. 13Bwalo you amatôyebwa bintu bebi ku bwalo bwanci akakwabanya yi bunga bulungu butasoakala yi muntu umoumwe amadingila kilongolelu. 14Bwalo budi ololwo bwa Fumwecu, ene, akabatuka mu Yuda ; yi ku mucwe ă bulungu bobu, Mosese akadi kasotôya diyi dimodimwe dia makanda. 15Yi bwalo bobu bwamadika kwakala ololwo, ndo bunga bokanda bulolwa yi bufwani bwa Melekisedekye, 16bwamalungikibwa kumoni ku bwadi bwa mulangu ă munyu, kate ku ngulu ya môyo utabiyi kuxeleleka pô. 17Bwalo bwamatôbôlebwa ene, Owe udi bokanda bwa kô kô bwa butonga bwa Melekisedekye.

18Nako kudi kulengola mulangu ăkadi ku buxi ku mucwe ă kulebela kwau yi kimbombo kiau, 19(bwalo butakukisa bwadi kintu kioso), yi kudi kukitisa mudingidilu ămadika loko utwakokyela pepe yi Ncembi ku mucwe ău. 20Yi bunga bwalo kabidi ; kakwakadi kutena kiteyelu kia kiteyi. 21Bobo sôsôlwo bakatekyebwa makanda kutena kiteyi ; mo yei akatekyebwa yi kiteyi kiakateyebwa kudi you akatôya ku bwalo bwanci ene, Fumu akateya kiteyi, yi kanakwela lwombixi, ene, Owe ndo bokanda bwa kô kô. 22Mbwôso mo nako Yisu akalwa luba lwa kusubisa disambi diamadika loko. 23Yi bobo sôsôlwo bakatekyebwa makanda mangi, bwalo bwakakandibwabo ku lufu, kabasadi ; 24mo yei, bwalo bwasalayi kô kô, udi yi bubokanda butasodikanana. 25Mbwôso kabidi ubili kubapandisa dyendeli bakokyela pepe yi Ncembi kudiyi, bwalo bwapwakalayi yi môyo matuku moso ndo kubatôyela.

26Bwalo bwakalelekyela bokanda bunene bwa noku ku bwalo bwecu, budi babala, butena nkanyi mibi, butena lobindu, bwamanamunibwa kudi bena bubi, bwamadikixibwa kulu kwa melu kulu ; 27butena yi bwalo bwa kudilongolela malongi, bea makanda aa manene ku dituku ku dituku, ku buxi bwalo bwa mabi anci mikyenci, yi kunyuma bwalo bwa mabi a bantu ; dilongi dedi ndo diakalongolayi ku kikondo kimokimwe dyendeli nya pakadilongolayi mikyenci. 28Bwalo bwamateka bwadi bantu makanda manene badi yi bubombu ; mo diyi dia kiteyi kiakateyebwa kunyuma kwa bwadi diamateka Mwana bokanda bunene amakukixibwa kô kô.

Currently Selected:

EBELEO 7: Luna_NT

Highlight

Copy

Compare